5
Emebhere ghiito n‑kinya ekebhuru ke riibhagha ighuhe mo‑se muno.
Amare ntweche kubha,
hano gheghusarëka,
Eryobha ndeghotuha chanyumba chino cheenyi Mwishaaro emiishe ghyose,
chino chetaakwabhëku na amabhökö gha bhaato.
2 Mo‑mebhere ghiito ghi ibheere ntokubhabhara,
ntoghwighomba chwee kuhaabhu chanyumba chaahë.
Chanyumba chiyo n‑kobheeku emebhere emihë ghino gheekoru Mwishaaro.
3 Hano tokobheeku emebhere emihë ghe Mwishaaro,
totaakubha kingʼaabhi.
4 Eriibhagha tokeere toonyi ne emebhere ghino ghenga kinya n‑ekebhuru,
ntokubhabhara gho ghiri e ghokeyu mo‑maaru.
Taanyi kubha ntokwënda koruusi emebhere ghino gheeghoku,
amare kino tookwënda n‑kobheeku emebhere ghino ghetaaghoku,
kubha emebhere ghino gheeghoku ghemeru na ghino ghetaaghoku.
5 Eryobha niryo retusëëmiri kwo mangʼana ghayo na ndetoheere Akörö yaache,
kubha ibhe ekimanyenkereri ghe kwërëki kubha ghayo ngaghuköru.
6 Ibheere,
eriibhagha ryose ntoonyi ne eriitëngʼërö,
nangabha tweche kubha,
eriibhagha toonyi mo‑mebhere ghino,
ntoonyi kurë no Omutëmi.
7 Eriimanya riito hano mo‑se ntokumanya kwo bhokumi,
taanyi gho korighi na amiisho.
8 Hëënë ntoonyi ne eriitëngʼërö,
wiiki ntokorighi n‑ngʼoni ntongatighiri emebhere ghino,
toghi ghwikara no Omutëmi.
9 Mbe,
tubhe mo‑mebhere ghino,
hamu totabha mo‑mebhere ghino,
ekebhune kiito n‑komuchömëri Omutëmi.
10 Hangʼu keenyi,
gho kubha itu bhoose ntokwimeerera ambërë e ghetumbe ghe Kirisito ghe ghotenera ekiina.
Gho ghayo,
omooto woose naghosongʼaana amareho kurëngʼaana na ghano aghuköra mo‑se ino,
ghabhe amachömu hamu ghabhe amabhe.
Amahöki gha bhoghwani
11 Ibheere,
ntweche kubha nekwëndëru komosooka Omutëmi.
Gho ghayo,
ntoghwiköngʼi kobharuta abhaato kubha bhabhe bharamokumi.
Eryobha ndetweche bhoheene kebhuno toonyi,
na neeni neghwitëngʼëra kubha na niinyu motweche bhoheene mo‑metema gheenyu.
12 Totaakwënda ghwikangateereri wiiki ghokoonyu,
amare ntokwënda kobhaha omweya o kwihacha gho ghiri yiito.
Gho nchëra iyo,
mookubha na amangʼana gha kobhagharokeri bhano bhakwihachera amangʼana ghano ghakorighibhu na abhaato,
ghokera ghotereera amangʼana ghano ghaanyi mo‑metema gheebho.
13 Inyu mokorighi hande abhe m‑bhachuuru toonyi.
Aribha hëënë hangʼu toonyi,
mbe,
n‑gho ghiri e Ryobha,
amare aribha tokorighibhu kubha ntoonyi no obhongo,
hayo hangʼu toonyi gho ghiri yaanyu.
14 Obhosiighi bho Kirisito mboghotukangata itu,
gho kubha ntweche kubha omooto umu ꞉naakuure gho ghiri e bhaato bhoose,
ne ekebhune keeche n‑kubha,
abhaato bhoose mbaghusanga oroko rooche.
15 Iwe ꞉naakuure gho ghiri e bhaato bhoose,
kubha bhano bhaanyi abhahöru bhatighe kumanya gho ghiri yaabho abheene,
amare gho ghiri e uno akuure na koryoka gho ghiri yaabho.
16 Gho ghayo,
korwera ibheere totaakurëngi omooto wowoose kinya bhuno abhaato bhano bhataakomokumi Kirisito bhahaarëngi.
Koru Kirisito totaakomurëngi wiiki gho nchëra iyo,
nangabha eriibhagha nyarebhe ꞉ntuuköriri hangʼu.
17 Omooto wowoose uno akubha aghöötiine na Kirisito,
naakubha omooto omuhë,
a gha kare ngahetiri,
ibheere ngabheere amahë!
18 Ghano ghoose ngakorwera kwo Waryobha uno ꞉atomiri Kirisito atutëmëërani itu nawe.
b Na niitu natoheere emeremo ghe kuraghani obhoghwani bhuyo.
19 Niko kobhugha,
gho kohetera gho Kirisito,
Eryobha ꞉ndiitëmëëriini abhaato na ryo,
na retabhabhariire abhaato obhobhe bhoobho.
Wiiki Eryobha ndetoheere emeremo ghe kobhabhoorera abhaato amangʼana gha bhoghwani bhuyo.
20 Ibheere,
Kirisito natotomiri ghuköra emeremo gheeche,
na gho kohetera ghokwito Eryobha ndekobhasasaama mubhe no obhoghwani naryo.
Nikyo gheghughëri torahënërëra ighoro e Kirisito kubha,
mubhe no obhoghwani ne Eryobha.
21 Kirisito taare na amasari ghoghoose,
amare Eryobha ꞉ndeemubhariire amasari gho ghiri yiito,
kubha itu tubhareru obhuhëënë ambërë e Ryobha gho kohetera ghokooche.