Changuru che Ryobha mo‑bheghiro bhe riiröbhë
4
Ibheere,
gho kubha Eryobha gho changori cheeche ndetoheere emeremo ghino,
totaaghoku omukörö.
2 Ntwangiri inkongʼorimu ghuköra ghano ghaanyi mo‑kebhisere na gha chaasoni,
koru kobhangʼiina abhaato,
koru ghusangerani angʼana e Ryobha no obhuröngö.
Amare ntoghosiikëra obhuhëënë haheero,
kubha abhaato bhoose bhamënyë mo‑metema gheebho kubha ntoonyi no obhuhëënë ambërë e Ryobha.
3 Amare aribha Angʼana Anchömu ino tokuraghani nihööchëriiru etamënyu,
neekubha ihööchëriiru kwo bhano bhakorumeera.
4 Angʼana Anchömu timënyuru mo‑bhaato bhano gho kubha,
Erishambu rino reenyi omutëmi o se ino,
ndehunyiri obhongo bho bhano bhataakomokumi Yesu.
꞉Ndiiköriri hangʼu kubha bhakindu korighi obhwero bho Angʼana Anchömu e bhokumi obhokoro bho Kirisito,
uno anyi eghetuubhaani ke Ryobha.
5 Itu totaakuraghani amangʼana ghiito,
amare ntokuraghani kubha Kirisito Yesu niwe Omutëmi,
na niitu n‑abhatamishi bhaanyu toonyi gho ghiri yaache.
6 Eryobha rino ꞉reebhughiri kubha,
“Obhwero bhurëngaari mo‑kengʼuuri,”
a niryo riyo rirëngaariri mo‑metema ghiito,
na ghotuköra tumënyë obhokumi bhooche obhokoro bhuno bhokurëngaari mo‑bhosho bho Yesu Kirisito.
7 Itu ntuhaabhuru obhwero bhuyo,
nangabha toonyi kinya ebheghiro bhino bhebhomburu koru mwiröbhë.
Ibheere imënyu kubha,
changuru chaaru che koroghoori chino cheghuköra emeremo ghiyo chetaanyi chechiito,
nchekoru kwo Waryobha.
8 Ntokubhöna anyaako e manga haghare haghare,
amare totaaghokindu.
Nangabha toteeche ghe ghuköra,
amare totaaghoku omukörö.
9 Ntokunyaakibhu,
amare Eryobha retaaghototigha itu bheene.
Ntoghutëmu haase,
amare totaaghosireekerera.
10 Chaasiko choose emebhere ghiito ngeenyi mo‑tabhaaribhaari e roko kinya Yesu,
kubha obhuhöru bho Yesu,
bhorighibhu mo‑mebhere ghiito.
11 Itu bhano toonyi abhahöru,
eriibhagha ryose ntoonyi mo‑tabhaaribhaari e roko gho ghiri e Yesu,
kubha obhuhöru bhooche bhorighibhu mo‑mebhere ghiito ghino gheeghoku.
12 Mbe,
itu ntoonyi mo‑tabhaaribhaari e roko,
amare gho kohetera ghayo inyu mokubhöna obhuhöru.
13 Amandëkö Amatööbhiyu ngakobhugha,
“꞉Neerekumiri Eryobha,
nikyo ꞉ghiighëriri nesiikërë.”
b Na niitu ntoonyi no obhokumi bhuyo,
nikyo toghosiikëra.
14 Ntoghosiikëra hangʼu,
gho kubha ntweche kubha Eryobha rino remoryokiri Omutëmi Yesu,
ndeghotoryoki na niitu.
Iryo ndeghototoora haghirohamu na niinyu,
kubha twikare na Yesu.
15 Ibheere amangʼana ghoose ghano ghaghotubhöna,
ngaghotubhöna gho ghiri yaanyu,
kubha aghareeya e Ryobha ebhahikere abhaato bhaaru chwee,
kubha abhaato bhëëngërë koriitabheri Eryobha.
Kurëngʼaana na ghayo,
Eryobha ndekwëndërëra ghoghongibhu.
Obhokumi obhokoro bho miishe ghyose
16 Gho ghayo,
totaaghoku omukörö,
nangabha emebhere ghiito gho nche ngeghusarëka,
amare moose yiito Eryobha ndeghotuköra kubha abhahë chaasiko choose.
17 Neghosiikëra hangʼu,
gho kubha anyaako yiito n‑ihoho na n‑e riibhagha ighuhe hangʼu.
Wiiki,
neghotusëëmëra obhokumi obhokoro bho miishe ghyose.
Obhokumi obhokoro bhuyo m‑bhokoro chwee,
mboghotuköra korighi anyaako ino,
n‑egheghiro ghesuuhu hangʼu.
18 Gho ghayo,
totaakwihëëbhëra ebheghiro bhino bhekorighibhu,
amare ntokwihëëbhëra bhino bhetaakorighibhu,
gho kubha,
bhino bhekorighibhu,
m‑bhe eriibhagha ighuhe hangʼu,
amare bhino bhetaakorighibhu,
m‑bhe miishe ghyose.