2 Abhakorinto 1

Anyaarubha e kabhere e Bhawuro kwo

Bhakorinto

Amakëërani

Anyaarubha ino neyandëkiri eni Bhawuro, o Yesu kwo mënda gha Ryobha. Eni haghirohamu na Timotewo, mohiiri wiito mo‑bhokumi, ntokobhaandëkëra inyu bhano moonyi mo‑riikanisa re Ryobha re mo‑moghya o Korinto. Ntokobhaandëkëra inyu haghirohamu na abhaato bhoose bha Ryobha bhano bhaanyi mo‑mukööwa o Akaaya.

2 Ntököbhëëndëra aghareeya no omurëmbë koru kwo Waryobha Taata wiito, na kwo Mutëmi wiito Yesu Kirisito, ghibhe haghirohamu na niinyu.

Eryobha ndehaaghambisani mo‑nyaako

3 Aghongibhu Waryobha, Taata o Mutëmi wiito Yesu Kirisito, Taata uno anyi ne ebheghongi, wiiki ne Eryobha rino reghotughambisani mo‑ghoose. 4 Iryo ndeghotughambisani itu mo‑nyaako yiito yoose. Gho nchëra iyo, itu ntoghotora kobhaghambisani abhande bhano bhaanyi mo‑nyaako e manga maaru, kinya bhuno toghughambisanibhu ne Eryobha. 5 Mbe, kebhuno tokwëndërëra kubhöna anyaako kinya bhuno Kirisito ꞉abhwine, hangʼu hangʼu Eryobha ndekwëndërëra ghotughambisani gho kohetera Kirisito. 6 Hano tokunyaaka, ntokunyaaka gho ghiri e ghughambisanibhu koonyu no obhotoori bhoonyu. Wiiki, hano itu toghughambisanibhu, niho na niinyu moghosongʼaana ghughambisanibhu. Ghughambisanibhu kuyo ngokobhatoori ghoghumereri mo‑nyaako yiire yiire ino na niitu tokunyaaka. 7 Eriitëngʼërö riito ghokoonyu n‑ikoro, gho kubha ntweche kinya bhuno mokunyaaka kinya itu, nibhu moghughambisanibhu kinya itu.

8 Abhahiiri bhiito, ntokwënda mumënyë kinya bhuno ꞉tuunyaakiri mo‑mukööwa o Asiya. ꞉Ntoobhwine nyaako inkoro chwee ino etokindiri, koru tokiihëëbha kubha ntongakuure. 9 Kwo bhuhëënë ꞉ntwiyoghwire kinya ntoore toteniiru ekiina ghe ghwitu. Ghayo ꞉ngaarweriire, kubha totighe ghwitëngʼëra changuru chiito, amare toriitëngʼërë Eryobha, rino rekoryoki abhaku. 10 Eryobha niryo ꞉reetotooriri eriibhagha toore mo‑tabhaaribhaari e roko, wiiki ndekwëndërëra ghototoori. Itu ntokoriitëngʼëra iryo kubha ndeekubha reraköra hangʼu eriibhagha ryose, 11 aribha moghusakerani na niitu gho ghotusabhera kwo Waryobha. Iryo ndekooghu amasabhi ghaanyu na ndeghotwitabheri. Niho abhaato bhaaru bhakoriitabheri Eryobha gho ghiri yiito.

Bhawuro aghashaamu orughëndö ro ghuye Korinto

12 Mbe, itu ntokwihachera rino, mo‑metema ghiito ntoonyi no obhuhëënë kubha, mo‑se hano, na ahanene mo‑bhughöötani bhwito na niinyu, ntumanyiri kwo bhughöröröku na kwo bhuhëënë bhuno bhookoru kwo Waryobha. Totaaköriri hangʼu kwo mangʼiini gha se ino, amare n‑gho ghareeya e Ryobha. 13 Totaakobhaandëkëra amangʼana amaköngʼu, amare ntokobhaandëkëra ghano moghotora ghusöma na kumënya bhoheene. Neghwitëngʼëra kubha moghoghamënya bhoheene, 14 nangabha kwi ibheere motweche gho kirëngërë hangʼu. Mokumënya bhoheene kubha, orosiko runo Omutëmi Yesu aghugharuka, mokwihacha ighoro yiito, kinya bhuno na niitu ntokwihacha ighoro yaanyu.

15 Eni neere no obhuhëënë bho mangʼana ghayo, na nikyo neere nërëënda kuucha bhowaanyu hayo ekimbërë, kubha mubhönë orubhango ro ghutaareru na neeni mara kabhere. 16 ꞉Nyëëndiri koheta iyo bhowaanyu, eriibhagha re ghuye mo‑mukööwa o Maketoniya, wiiki ne eriibhagha re koru iyo, kubha munsakeri mo‑rughëndö roone ro ghuye mo‑mukööwa o Yuteya. 17 Kana, mokwihëëbha kubha ꞉niishaamuru ghugharuka bhowaanyu, gho kubha n‑omooto o ghwishoororishoorori neenyi? Hamu mokwihëëbha kubha neghukangatu na amiihëëbhö ghaane hangʼu, nigho ghaghughëri eriibhagha erimu nebhughe “Hee,” ne erende nebhughe, “Tiyaanyi”?

18 Amare ibheere, kinya bhuno Eryobha reenyi ihëënë, ghano tobhabhoriire inyu, ghataare gha mooto kobhugha, eriibhagha erimu “Hee,” ne eriibhagha erende, “Tiyaanyi.” 19 Neghosiikëra hangʼu, gho kubha Kirisito Yesu, Omoona o Ryobha, uno eni, na Sirwano, na Timotewo ꞉toomuraghiini ghokoonyu, taare omooto o kobhugha, “Hee,” eriibhagha erimu, ne erende abhughe, “Tiyaanyi.” Amare ghokooche eriibhagha ryose n‑kobhugha, “Hee.” 20 N‑hangʼu, gho kubha iwe ꞉naabhughiri “Hee,” gho ghano ghoose Eryobha ꞉riiraghiri, ngahikeriine gho kohetera ghokooche. Nikyo kwo Yesu Kirisito ntokobhugha, “Hawubhaabha,” gho ghiri e koreghongi Eryobha. 21 Mbe, Eryobha niryo reghotuköngʼi itu na niinyu gho ghughöötana kwito na Kirisito. Ndetwahwire, 22 na ghototoorera ekingʼöchö ghe kwërëki kubha itu n‑abhaato bhaache toonyi, gho ghotuha Akörö Ahörëëru mo‑metema ghiito, kubha ibhe ekimanyenkereri ghe kwërëki kubha, ghoose ghano returaghiire ndeghotuha.

23 Ghano neghosiikëra n‑gha mahëënë, koru Eryobha ndyeche! Ntigharokiri bhowaanyu iyo Korinto, gho kubha ntyëndiri kunyahaara emetema gheenyu. 24 Kino nekwënda kobhugha n‑kubha, totaakwënda ghukangata obhokumi bhoonyu, gho kubha mumariri ghuköngʼëri mo‑bhokumi. Amare, itu n‑abhatamishi haghirohamu na niinyu, gho ghiri e ghuchömëru koonyu.