2
Gho ghayo,
꞉neerooche mo‑motema waane kubha,
netagharuka bhowaanyu,
kubha netaghëri mubhe na amacheeche wiiki.
2 ꞉Neerooche hangʼu,
gho kubha aribha eni neraghëri inyu mubhe na amacheeche,
taanyi‑ho uno aghunköra eni nichömëru,
nanyinga inyu bheene bhano nighëriri mookabha na amacheeche!
3 Kiyo nikyo ꞉ghiighëriri nekaandëka mo‑nyaarubha yiire kubha nteekuucha bhowaanyu,
motaacha ghunkörëra amacheeche,
inyu niinyu mokwëndëru ghunköra eni nichömëru.
Neenyi no obhuhëënë kubha eni nerachömëru,
na niinyu bhoose moghuchömëru.
4 ꞉Neebhaandëkiire anyaarubha yiire kwo nyaako ihaari na gho kwirighora mo‑motema waane,
wiiki gho changishori chaaru.
Ekebhune keene ghetaare kubha mubhe na amacheeche,
amare neere nërëënda mumënyë kinya obhosiighi bhoone bhoonyi bhwaru ghokoonyu.
Kwabhëra omooto uno asariri
5 Ibheere,
omooto uno ataasiiri omughëndi waache aghaghëri abhe na amacheeche,
taghëriri eni omwene nibhe na amacheeche,
amare ꞉naaghëriri na niinyu bhoose,
mubhe na amacheeche.
Amare ibheere,
nteekwënda ghokori angʼana iyo.
6 Anchagho ino omooto uyo abhwine koru mo‑bhaaru bhano bhaanyi ghate yaanyu,
nemwishiri.
7 Ibheere mokwëndëru komwabhëra na komughambisani omooto uyo,
kubha ataacha kubha na amacheeche koheta ekirëngërë,
aku omukörö.
8 Gho ghayo,
nekobhasasaama momwërëki kubha momosiighiri.
9 Ekebhune ekende kino ꞉ghiighëriri nekaandëka anyaarubha yiire n‑kubha,
neere nërëënda korighi aribha mongansookiri mo‑mangʼana ghoose.
10 Omooto wowoose uno mokomwabhëra,
na neeni neekubha nemwabhiire.
Na aribha enyi‑ho angʼana ino nekwëndëru kwabhëra,
neryabhiire ambërë e Kirisito gho ghiri yaanyu,
11 kubha Erishambu retaacha ghotokinda,
gho kubha ntweche obhongʼiiningʼiini bhooche.
Bhawuro mo‑moghya o Torowa
12 Ibheere,
hano nehikiri mo‑moghya o Torowa kuraghani Angʼana Anchömu ighoro e Kirisito,
nekabhöna Omutëmi amariri ghunkörëra anchëra e ghuköra emeremo gheeche hayo.
13 Amare nteere no omurëmbë mo‑körö yaane,
gho kubha ntemorooche omohiiri waane Tiito.
Gho ghayo nekabharagha neghatanura ghuye Maketoniya.
Obhokindi kwo bhotoorereri bho Kirisito
14 Amare ntokoriitabheri Eryobha gho kubha ndeghotukangata eriibhagha ryose mo‑murööbhö o ghuchaghanera obhokindi bho Kirisito ighoro e bhabhisa bhaache.
a Wiiki Eryobha ndeghotuköra itu ghusanchi obhumënyi bho ngʼana ighoro e Kirisito chambaara choose,
nibheere kinya bhuno ekeneeso eghichömu kehaasancha ahaghiro hoose.
15 Hangʼu keenyi,
gho kubha itu n‑kinya ekeneeso eghichömu kino Kirisito akoreruuseri Eryobha.
Ekeneeso kiyo ngekobhahikera abhaato bhoose,
bhano bhaghotooribhu na bhano bhakobhora.
16 Kwo bhano bhaghotooribhu,
ekeneeso kiyo n‑ghichömu ngekurëëta obhuhöru.
Amare kwo bhano bhakobhora,
ekeneeso kiyo n‑kebhe,
ngekurëëta oroko.
Ibheere n‑niwe uno akurëngʼaanera ghuköra emeremo ghiyo?
17 Itu totaanyi kinya abhaato abhaaru bhano bhaghukörëra angʼana e Ryobha obhosorocha kubha bhabhönë obhwëra.
Amare kwo bhotoro bho Kirisito,
ntokuraghani angʼana e Ryobha mo‑bhughöröröku bhoose ambërë e Ryobha,
gho kubha niryo ꞉reetotomiri.