Koryoka gho Kirisito
15
Ibheere,
abhahiiri bhaane,
nekobhahiiti Angʼana Anchömu ino ꞉niiraghiini ghokoonyu,
na niinyu mokayesongʼaana.
Iyo niyo ekobhaköra mwimeerere muköngʼiiri.
2 Aribha moraghööta amangʼana ghano ꞉niiraghiini ghokoonyu,
hayo mokubhöna obhotoori.
Amare aribha motaaghoghaghööta,
obhokumi bhoonyu mbookubha bhotaanyi no obhwëra.
3 Nebheeghiri ameeghi gha bhwëra ghano eni omwene neghasongʼaaniri,
kubha Kirisito ꞉naakuure gho ghiri e masari ghiito,
kinya bhuno yandëkuru mo‑Mandëkö Amatööbhiyu.a
4 Wiiki kubha akaryeku,
na akaryoka orosiko ro ghatato,
kinya bhuno yandëkuru mo‑Mandëkö Amatööbhiyu.b
5 Akiyëërëkani gho Keebha,
c na kwo bhatomu bhaache ikomi na bhabhere.
6 Akamara akiyëërëkani kwo bhakumi bhano ꞉bhaare haghirohamu,
mbaare bharakera amaghana ataano.
Abhaaru ghate yaabho koru ibheere m‑bhahöru bhakeere,
amare abhaaru mbamariri ghoku.
7 Akamara akiyëërëkani kwo Yakobho,
na kwo bhatomu bhoose.
8 Hano amariri kwiyërëkani kwo bhaato bhoose,
akiyëërëkani na ghokoone wiiki,
eni uno neenyi kinya omoona uno ibhwiru atahikiri.
9 Eni m‑mosuuhu ghokera abhatomu bhoose,
nteekurëngʼaanera koru kobherekeru omotomu,
gho kubha ꞉neebhanyaakiri abhakumi bha Ryobha.
10 Amare aghareeya e Ryobha niyo inköriri eni kubha omotomu.
Na aghareeya yaache ghokoone teere bhoowa,
gho kubha kohetera aghareeya iyo niköriri emeremo ghokera abhatomu bhoose.
Ntiköriri ghayo gho changuru cheene omwene,
amare na aghareeya e Ryobha niyo iköriri emeremo haghirohamu na neeni.
11 Mbe,
nibhe eni,
hamu bhabhe abhatomu abhande,
ntokuraghani angʼana yiire yiire,
wiiki niyo moghokumi.
Koryoka kwo bhaku
12 Ibheere,
aribha ekuraghanibhu kubha Kirisito naryokiri koru mo‑bhaku,
ibheere ngwake abhande ghate yaanyu bhakobhugha kubha abhaku bhataakoryoka?
13 Mbe,
aribha mahëënë abhaku bhataakoryoka,
Kirisito woose taryokiri.
14 Wiiki aribha Kirisito taryokiri,
kuraghani kwito ngookubha kwo bhoowa,
koru obhokumi bhoonyu mbookubha bho bhoowa.
15 Ghokera ghayo,
itu ntokorighibhu kubha abhiibhateri bha bhuröngö ighoro e Ryobha,
gho kubha ꞉ntoobhughiri kubha Eryobha ꞉ndeemoryokiri Kirisito koru mo‑bhaku.
Amare aribha abhaku bhataakoryokibhu,
mbe,
Eryobha retamoryokiri.
16 Neghosiikëra hangʼu,
gho kubha erabha abhaku bhataakoryokibhu,
Kirisito woose taryokiri.
17 Na aribha Kirisito taryokiri,
obhokumi bhoonyu mbookubha bhotaanyi no obhwëra,
wiiki mookubha mokeere ghotooribhu koru mo‑masari ghaanyu.
18 Ghokera ghayo,
bhoose bhano bhakuure bharamokumi Kirisito,
mbarumeeriri.
19 Erabha amiitëngʼërö ghiito gho Kirisito n‑kwo riimanya rino eryene,
hayo niho tookubha abhaato bha korigheru changori ghokera abhaato bhoose.
20 Amare ibheere,
obhuhëënë n‑kubha Kirisito naryokiri koru mo‑bhaku,
na niwe o mumbërë koryoka kwo bhano bhakuure.
21 Kinya bhuno oroko rurëëturu no omooto umu mo‑se,
hangʼu hangʼu na koryokibhu kwo bhaku nkurëëturu no omooto umu.
22 Kinya bhuno abhaato bhoose bhaaghoku gho ghiri e ghughöötana koobho na Ataamu,
hangʼu hangʼu abhaato bhoose mbakoryokibhu gho ghiri e ghughöötana koobho na Kirisito.
23 Amare omooto woose nakoryokibhu kwo riibhagha reeche,
Kirisito niwe o mumbërë koryoka,
na bharamara mbakoryokibhu abhaato bhaache,
eriibhagha rino akuucha.
24 Hayo niho antenero e bhyose ekohikeerana.
Eriibhagha riyo Kirisito naghosireekereri abhakangati bhoose,
na bhano bhaanyi no obhotoro na bha changuru bhoose,
aramara nakomuha Waryobha Taata obhutëmi.
25 Neghosiikëra hangʼu,
gho kubha Kirisito nekwëndëru akangate mbagha abhakinde abhabhisa bhaache bhoose na kobhatoora haase e bhukangati bhooche.d
26 Omobhisa uno akorumusera ghosireekereru n‑oroko.
27 Amandëkö Amatööbhiyu ngakobhugha kubha,
“Eryobha ndetooriri ebheghiro bhyose haase e bhukangati bhooche.”
e Amangʼana ghayo,
“ebheghiro bhyose,”
taanyi kubha Eryobha ryose ndetooruru haase e bhukangati bhuyo.
Tiyaanyi,
gho kubha iryo niryo retooriri ebheghiro bhiyo haase e bhukangati bho Kirisito.
28 Mbe,
eriibhagha ebheghiro bhyose bheekubha bhetooruru haase e bhukangati bho Moona waache,
niho woose Omoona aghwitoora haase e bhukangati bho Ryobha,
rino retooriri ebheghiro bhyose haase e bhukangati bho Moona waache,
kubha Eryobha ribhe omukangati o bhyose.
29 Ibheere,
abhaato bhano bhakubhatiisu gho ghiri e bhaato bhano bhakuure mbaghwitëngʼëra kubhöna ke?
Aribha abhaku bhataakoryokibhu naabha,
ngwake abhaato bhakubhatiisu gho ghiri yaabho?
30 Na niitu ngwake toghwitoora mo‑bhobhe chaasiko choose?
31 Abhahiiri bhaane,
chaasiko choose eni neenyi mo‑bhobhe bho roko.
Na rino n‑de hëënë,
kinya bhuno nekwihacha gho ghiri yaanyu gho kubha mughöötiine na Kirisito Yesu Omutëmi wiito.
32 Aribha eriitëngʼërö reene ndengabheere re se ino hangʼu,
kurööna koone na abhabhisa bhaane bhano bhanga kinya chatyenyi chahaari mo‑moghya o Ebheeso nkongansakiiri ke?
Aribha abhaku bhataakoryokibhu,
mbe,
“Tubhe toraraaghëra na kunyo,
gho kubha tabhoori ntooghoku.”f
33 Motangʼiinu na abhaato bhano bhakobhugha hangʼu,
gho kubha,
“Abhasaani abhabhe,
mbaghusari atëëmö inchömu e mooto.”
34 Musëëmë kuhökëri obhongo bhoonyu wiiki kinya bhuno mokwëndëru,
na ghotigha ghuköra amasari,
gho kubha abhamu ghate yaanyu bhataryeche Eryobha.
Neghosiikëra ghayo,
kubha nebhasooki.
Kinya bhuno omobhere okubha orosiko ro koryoka
35 Omooto naghotora kobhoori kubha,
“Abhaku nibhu bhakoryokibhu?
Na mbaakubha no omobhere o ngabhu?”
36 Ghayo n‑amabhoori gha bhuraghaanu!
Gho ghetuubhaani,
oreemi ambusuro,
teeghotora kumëra aribha etakuure.
37 Chambusuro chino mokwemi,
ibhe angano hamu chambusuro echende,
hano chekumëra nchekuucha no omobhere muhaghare.
38 Eryobha ndehaayiha ambusuro eghisösö kinya bhuno rekwënda,
amanga ghoose gha chambusuro ndeghochiha eghisösö keeche.
39 Hangʼu hangʼu,
ebhetyenyi bhyose mbeenyi ne emebhere,
amare emebhere ghiyo ghetatuubhiine.
Emebhere ghe bhaato n‑ghimu,
na ghe chatyenyi m‑mihaghare,
na ghe bhinyönyi m‑mihaghare,
na ghe chaasu ghyose m‑mihaghare.
40 Wiiki ngeenyi‑ho emebhere ghe Mwishaaro ne emebhere ghe mo‑se.
Obhuchömu bho mebhere ghe Mwishaaro n‑obhonde,
no obhuchömu bho mebhere ghe mo‑se n‑obhonde.
41 Mboonyi‑ho obhuchömu bho ryobha,
no obhonde bho mwëri,
no obhonde bho chanchöta.
Na kira anchöta neenyi no obhuchömu bhooche.
42 Hangʼu nibhu ekubha,
eriibhagha rino abhaku bhakoryoka.
Kinya bhuure ambusuro,
omobhere nohaaryeku mwiröbhë onyi na atëëmö e ghusarëka,
amare nohaaryokibhu onyi na atëëmö ino etaaghusarëka.
43 Hano omobhere okoryeku,
nohaataraahu,
amare hano okoryokibhu nookubha na atëëmö e bhokumi obhokoro.
Hano okoryeku,
nohaabha otaanyi ni inguru,
amare hano okoryokibhu nookubha na changuru.
44 Uno okoryeku,
n‑omobhere uno toonyi nawe,
amare uno okoryokibhu,
n‑omobhere omuhë o Mwishaaro.
Noonyi‑ho omobhere uno toonyi nawe,
wiiki noonyi‑ho omobhere omuhë o Mwishaaro.
45 Mo‑Mandëkö Amatööbhiyu yandëkuru kubha,
“Omooto o mumbërë,
Ataamu,
natëëmuru akabha omooto omuhöru,”
g amare Ataamu o ntenero,
n‑Kirisito,
niwe Akörö ino ekobhaha abhaato obhuhöru.
46 Amare omobhere uno oghushama n‑uno toonyi nawe,
oramara nokuucha omobhere omuhë o Mwishaaro.
47 Omooto o mumbërë,
Ataamu,
naare o mo‑se,
natëëmuru koru mwiröbhë.
Omooto o kabhere,
n‑Kirisito,
uno aruure Mwishaaro.
48 Gho ghayo,
abhaato bhoose bha mo‑se mbaanyi o riiröbhë kinya omobhere o Ataamu.
Na abhaato bhoose bha Mwishaaro mbaanyi no omobhere o Mwishaaro kinya omobhere o Kirisito.
49 Kinya bhuno totuubhiine na Ataamu,
uno atëëmuru koru mwiröbhë,
hangʼu hangʼu ntoghotuubhaana na Kirisito,
uno aruure Mwishaaro.
50 Abhahiiri bhaane,
kino nekwënda kobhugha n‑kubha,
emebhere ghiito ghe chaanyama na amasaahë ghetaaghotora ghusöha mo‑bhutëmi bho Ryobha,
wiiki emebhere ghino gheghusarëka ghetaaghotora kubha no obhuhöru bho miishe ghyose.
51 Mutëghëërërë,
ˆnekabhabhoorera ekebhisere kubha,
itu totaaghoku bhoose,
amare bhoose ntoghwigharura.
52 Riyo ndekorwera kwo riibhagha ighuhe,
kinya omooto ahaatëmitëmi amiisho,
eriibhagha rino antaara e ntenero eghughamba.
Eriibhagha riyo abhaku mbakoryokibhu na mbaakubha ne emebhere ghino ghetaaghusarëka wiiki,
na niitu bhano tokeere toonyi abhahöru,
ntoghugharoru.
53 Neekubha hangʼu,
gho kubha omobhere uno oghusarëka nokwëndëru wiigharure ubhe omobhere uno otaaghusarëka,
omobhere uno oghoku wiigharure kubha omobhere uno otaaghoku.
54 Mbe,
omobhere uno oghusarëka na ghoku,
hano oghugharoru kubha omobhere uno otaaghusarëka na ghoku,
hayo niho ekubha ehikeriine angʼana ino yandëkuru mo‑Mandëkö Amatööbhiyu kubha,
“Eryobha ndekindiri oroko,
ndokinduru inkongʼorimu.”h
55 “Oroko,
obhokindi bhoocho hayi bhoonyi?
Hayi cheenyi changuru cheecho che kurëëta obhororo?”i
56 Changuru che oroko nchekorwera mo‑masari ghano toghuköra,
na changuru che masari nchekorwera mo‑meghiro.
57 Amare ntoriitabheri Eryobha,
rino reghotuha ghokinda gho nchëra e Mutëmi wiito Yesu Kirisito.
58 Mbe,
abhahiiri bhaane abhasiighani,
muköngʼëri mo‑bhokumi bhuyo,
motaku omukörö.
Mwëndërërë ghuköra emeremo ghe Mutëmi gho ghwiköngʼi chaasiko choose,
gho kubha mweche kubha emeremo ghino moghuköra gho ghiri e Mutëmi,
ghetaanyi ghe bhoowa.