Ekihaano ghe koruusi obhurööti na ghe ghughamba ebhighambo ebhihë
14
Mwiköngʼi kubha no obhosiighi na mwighombe kubhöna ebhihaano bhe Körö Ahörëëru,
ahanene ekihaano ghe koruusi obhurööti.
2 Omooto uno aghosiikëra eghighambo ekihë,
taaghosiikëra na abhaato,
amare n‑Eryobha aghosiikëra naryo,
gho kubha ghano aghosiikëra taanyi‑ho uno aghoghamënya.
Iwe naakubha arasiikëra amangʼana gha kebhisere mo‑motema waache.a
3 Amare uno akoruusi obhurööti,
naghosiikëra na abhaato amangʼana gha kobhaköngʼëërëri mo‑bhokumi,
gho kobhatoora omukörö na gho kobhaghambisani.
4 Uno aghosiikëra eghighambo ekihë,
naghwiköngʼi omwene mo‑bhokumi,
amare uno akoruusi obhurööti nakobhaköngʼi abhakumi,
niryo eriikanisa.
5 Eni nekwënda inyu bhoose mubhe morasiikëra ebhighambo ebhihë,
amare ahanene nekwënda mubhe moraruusi obhurööti.
Neghosiikëra hangʼu,
gho kubha koruusi obhurööti nkoonyi no obhwëra chwee mo‑bhakumi,
ghokera ghughamba ebhighambo ebhihë,
aribha taanyi‑ho uno aghugharura ebhighambo bhiyo.
Mbe,
uno aghosiikëra ebhighambo ebhihë agharure kubha atoori abhakumi abhande bhaköngʼëri mo‑bhokumi.
6 Ibheere,
abhahiiri bhaane,
neraacha bhowaanyu na ghughamba ebhighambo ebhihë,
moghotora kubhöna obhwëra ke?
Motaakubhöna obhwëra bhobhoose.
Amare nerabhabhoorera ghano Eryobha rehunyuriire,
hamu nerabhaha obhumënyi,
neraruusi obhurööti hamu nereeghi,
hayo mokubhöna obhwëra.
7 Hangʼu keenyi koru kwo bheghiro bhino bhetaanyi no obhuhöru,
hano bheekubha bheraruusi eriiraka,
kinya bhuure ekerereesi,
hamu eritingo.
Aribha bheraruusi eriiraka rino retaanyi no obhwërëkërëri,
omooto nibhu aghotora kumënya omwembo uno oghutëmu?
8 Wiiki,
aribha antaara eraruusi eriiraka rino retaakumënyu mo‑bhaato,
n‑niwe aghotora ghwisëëmi mo‑riihë?
9 Hangʼu keenyi na ghokoonyu.
Aribha moghosiikëra amangʼana ghano ghataakumënyu,
n‑niwe uno aghotora kumënya kino mokobhugha?
Hayo,
ghano moghosiikëra ngaakubha gharaheta no obhukama.
10 Mo‑se mbeenyi‑ho ebhighambo bhe manga maaru,
amare ghetaanyi‑ho koru eghighambo kimu kino ghetaanyi ne egheteemoro keeche.
11 Ibheere,
erabha ntyeche eghighambo kino owonde aghosiikëra,
neekubha kinya omughëni mo‑mooto uyo,
woose naakubha kinya omughëni ghokoone.
12 Hangʼu keenyi na ghokoonyu.
Ibheere,
gho kubha mokwënda chwee kubha ne ebhihaano bhe Körö Ahörëëru,
mwiköngʼi chwee ghutabhara ebhihaano bhino bheghusakeri abhakumi bhaköngʼëri mo‑bhokumi.
13 Gho ghayo,
omooto uno aghosiikëra eghighambo ekihë,
asabhe Eryobha kubha remusakeri ghugharura kino aghosiikëra.
14 Neghosiikëra hangʼu,
gho kubha nerasabha gho ghighambo ekende,
akörö yaane niyo eghusabha,
amare obhongo bhoone bhotaakubhöna ghyokyose.
15 Ibheere nekwëndëru ghuköra ke?
Neghusabha mo‑körö gho ghighambo ekende,
wiiki neghusabha kwo bhongo,
nekwemba mo‑körö gho ghighambo ekende,
wiiki nekwemba kwo bhongo.
16 Orareghongi Eryobha mo‑körö okwene,
omooto omughëni uno ateeche kino okobhugha,
nibhu aghotora ghwitabheri gho kobhugha,
“Hawubhaabha?”
17 M‑mahëënë ghokoocho nokoriitabheri Eryobha bhoheene,
amare owonde ghwitabheri koocho ghotaakomusakeri ghuköngʼëri mo‑bhokumi.
18 Nekoriitabheri Eryobha gho kubha neghosiikëra kwo bhighambo ebhende ghokera inyu bhoose,
19 amare mo‑riikanisa nesiighiri chwee ghosiikëra kwo bhongo amangʼana ataano ghano ghakumënyu kubha nebheeghi abhande.
Riyo niryo ichömu bhobhe ghokera ghosiikëra amangʼana ebheku ikomi (10,000) mo‑ghighambo ekende.
20 Abhahiiri bhaane,
motiihëëbha kinya abhaana,
amare mubhe moriihëëbha kinya abhantomonkoro.
Amare ighoro e mabhe,
mubhe kinya ebhengʼwerere.
21 Mo‑Mandëkö Amatööbhiyu yandëkuru kubha,
“Omutëmi Waryobha nabhughiri kubha,
‘Neghosiikëra na abhaato bhano
kohetera abhaghëni bha kurë,
bhano bhaghosiikëra ebhighambo ebhihë,
koru hangʼu bhataaghuntëghëërëra.’ ”b
22 Ghughamba ebhighambo ebhihë n‑ekingʼöchö ghe changuru che Ryobha ighoro e bhaato bhano bhataaghokumi,
taanyi ekingʼöchö ighoro e bhakumi.
Amare obhurööti mbokoruusibhu gho ghiri e bhakumi,
taanyi gho ghiri e bhaato bhano bhataaghokumi.
23 Ibheere,
erabha abhakumi bhiikomiine ghusabha,
na bhoose bhasëëmë ghosiikëra ebhighambo ebhihë,
niho bhasöhë abhaato bhano bhataanyi ne ekihaano ghe kumënya eghighambo ekihë,
koru bhano bhataaghokumi,
bhataakobhugha m‑bhachuuru moonyi?
24 Amare bhoose bhararuusi obhurööti,
aramara asöhë omooto uno ataanyi ne ekihaano ghe kumënya ebhighambo ebhihë,
hamu uno ataaghokumi,
ghano akooghu koru kwo bhoose ngaghughëri amënyë obhobhe bhooche.
Wiiki ghano akooghu ngakomotenera ekiina.
25 Ghano ghabhisuru mo‑motema waache,
ngaakubha haheero,
niho akohighama na kohiinya obhosho bhooche mbagha haase korisëngëra Eryobha,
arabhugha kubha,
“Mahëënë Eryobha ndeenyi ghate yaanyu!”
Amëërëkërëri gha ghusabha Eryobha
26 Ibheere abhahiiri bhaane,
tobhughe bhu?
Hano mookubha mwikomiine ghusabha,
umu nakwemba omwembo,
no owonde nakweghi,
no owonde naghosiikëra ghano Eryobha remohunyuriire,
no owonde naghosiikëra eghighambo ekihë,
no owonde naghugharura eghighambo.
Amangʼana ghayo ghoose ghaköru gho ghuköngʼi abhakumi.
27 Aribha bhaanyi‑ho bhano bhaghosiikëra ebhighambo ebhihë,
bhasiikërë bhabhere hamu bhatato hangʼu,
bhatakera bhayo,
bhasiikërë ke umu umu,
wiiki abhe‑ho omooto uno aghugharura ghano bhaghosiikëra.
28 Aribha ataanyi‑ho omooto uno aghugharura ebhighambo bhiyo,
bhano bhaghosiikëra ebhighambo ebhihë bhakire kiri mo‑riikanisa,
na bhasiikërë ne Eryobha mo‑chaakörö cheebho.
29 Ighoro e bhano bhakoruusi obhurööti,
bhasiikërë bhabhere hamu bhatato,
na abhande bhaghisunche amangʼana ghaabho.
30 Amare aribha owonde mo‑bhano bhaghutëghëërëra ahunyuriiru angʼana koru kwo Waryobha,
uno are ashamiri ghosiikëra akire.
31 Gho nchëra iyo,
omooto woose nakubhöna omweya o ghosiikëra,
kubha abhaato bhoose bhatore kwegha na ghotooru omukörö.
32 Ekihaano ghe koruusi obhurööti,
ngeghukangatu na uno ahaabhuru ekihaano kiyo.
33 Neekubha hangʼu,
kinya enyi mo‑makanisa ghoose gha bhaato bha Ryobha,
gho kubha Eryobha riito retaanyi re nyööri,
amare n‑de murëmbë.
34 Hano mookubha mwikomiine,
abhakari bhabhe bhakiriri,
gho kubha bhataaghwisherereru ghosiikëra.
Bhabhe abhasooku kinya bhuno emeghiro ghe Musa ghekobhugha.
35 Aribha bhakwënda kumënya angʼana nyarebhe,
bhabhe bharabhabhoori abhasubhe bhaabho mo‑chaaka cheebho,
gho kubha n‑chaasoni omukari ghosiikëra mo‑riikanisa.
36 Kana,
angʼana e Ryobha n‑ghokoonyu ꞉isëëmiire?
Hamu ꞉niichiri ghokoonyu inyu bheene?
37 Aribha omooto akwirighi kubha naanyi ne ekihaano ghe koruusi obhurööti,
hamu kubha naanyi ne ekihaano ekende ghe Körö Ahörëëru,
amënyë kubha,
ghano ˆnekabhaandëkëra,
n‑amaraghereri koru kwo Mutëmi.
38 Amare omooto uno ataaghotereera ghayo,
woose taaghotereeru.c