Obhosiighi
13
Koru nengasiikiire gho ghighambo ke bhaato hamu ke bhamarayika,
amare aribha nteenyi no obhosiighi,
nengabheere kinya amareghe gha riitëbhë rino retaanyi ne egheghiro,
hamu kinya amareghe gha membe ino eghutëmu bhoowa.
2 Koru wiiki nengabheere neraruusi obhurööti na kumënya ebhebhisere bhyose na kubha no obhumënyi bhoose,
koru nengabheere no obhokumi bho ghotora ghusaami ebheghoro,
amare aribha ntighöötë obhosiighi,
eni nteenyi egheghiro.
3 Wiiki neraruusi obhwame bhoone bhoose na kobhaha abhahabhe,
na koru neraruusi omobhere waane kubha weekibhu mo‑mororo,
a amare aribha ntighöötë obhosiighi,
nteekubhöna egheghiro ghyokyose.
4 Obhosiighi mbokomuköra omooto abhe no obhoghumereri,
na abhe omuhöriicho,
na atabha ne eriihari,
na atabha no obhwihachi,
wiiki atabha no omutu muköngʼu.
5 Obhosiighi mbokomuköra omooto abhe arabhasooka abhande,
na atabha ariihëëbhëra amangʼana ghaache agheene,
hamu ghukarara bhwango,
hamu ghotoora amangʼana amabhe ghano omooto aghuköriire mo‑motema waacho.
6 Obhosiighi mbokomuköra omooto arëghë amabhe,
amare naghuchömëru no obhuhëënë.
7 Obhosiighi mbokomuköra abhe moghumereri mo‑ghoose,
abhe no obhokumi eriibhagha ryose,
abhe na amiitëngʼërö eriibhagha ryose,
wiiki abhe araghumereri mo‑ghoose.
8 Obhosiighi bhotaghöötë antenero naabha!
Amare obhurööti,
na ghughamba ebhighambo ebhihë,
na kubha no obhumënyi,
ebhihaano bhiyo bhyose mbeenyi na antenero.
9 Neghosiikëra hangʼu gho kubha ntweche amangʼana marëngʼaaneru hangʼu,
wiiki ntokoruusi obhurööti kwo mangʼana masuuhu hangʼu.
10 Amare hano rekuucha eriibhagha re mangʼana ghano ghahikeriine,
ghano ghakeere kohikeerana ngaghosira.
11 Eriibhagha neere omoona,
neere nerasiikëra gha keena,
na kwihëëbha gha keena,
na ghwituuri gha keena.
Amare ibheere,
gha keena neghatighiri,
gho kubha nimariri kubha montomonkoro.
12 Kinya bhuno tookorighi ibheere,
ntokorighi ebheghiro kinya bhekundekiiru ne eghetu,
amare toramara ntokobherighi bhyose haheero.
Ibheere nyeeche hasuuhu hangʼu,
amare nekumara nimënyë ghoose bhoheene,
kinya bhuno Eryobha reenyeche eni.
13 Mbe,
ibheere,
ebheghiro bhino bhitato bhetaaghosira,
obhokumi,
na amiitëngʼërö no obhosiighi.
Na mo‑bhino,
egheghiro eghekoro ghokera bhyose n‑obhosiighi.