Ebhihaano bhe Körö Ahörëëru
12
Ibheere abhahiiri bhaane,
ˆneghasiikëra ighoro e bhihaano bhino bheekoru mo‑Körö Ahörëëru,
gho kubha nekwënda mobhimënyë bhoheene.
2 Mweche kubha eriibhagha moore mokeere korimënya Eryobha,
mongʼiinuru na moghakangatu ghusëngëra chasanaamu chino chetaare cheratora ghosiikëra!
3 Mbe,
ˆnekabhabhoorera kubha omooto wowoose uno aghukangatu na Akörö e Ryobha taaghotora kobhugha kubha,
“Yesu ihiimu.”
Wiiki taaghotora kobhugha kubha,
“Yesu n‑Omutëmi,”
aribha atakangaturu na Akörö Ahörëëru.
4 Mbeenyi‑ho ebhihaano bhe manga maaru,
amare Akörö ino ekuhööhi ebhihaano bhiyo,
n‑imu.
5 Wiiki itu bhoose ntokomuhökëri Omutëmi kwo manga haghare haghare,
amare Omutëmi n‑umu.
6 Wiiki ntoghuköra emeremo ghe manga maaru,
amare Eryobha rino reghototoori itu ghuköra emeremo ghyose,
n‑dimu.
7 Mbe,
omooto woose nahahaabhu obhohunyurëru bho Körö kwo bhwëra bho bhaato bhoose.
8 Akörö nekomuha omooto umu angʼana e mangʼiini,
no owonde nekomuha angʼana e bhumënyi.
Akörö iyo iyo nekoruusi ebhihaano kinya ekwënda.
9 Akörö iyo iyo nekomuha owonde ekihaano ghe kubha no obhokumi,
no owonde ekihaano ghe kuhöri,
10 no owonde ekihaano ghe ghuköra ebheroghooro,
no owonde ekihaano ghe koruusi obhurööti.
Akörö iyo iyo nekomuha owonde ekihaano ghe kumënya amangʼana ghano gharuure mo‑körö ambe hamu mo‑Körö Ahörëëru,
owonde ekihaano ghe ghosiikëra eghighambo ekihë,
owonde ekihaano ghe ghugharura ebhighambo bhiyo.
11 Akörö iyo iyo imu neghuköra emeremo ghiyo ghyose.
Iyo nekomuha omooto woose ekihaano keeche,
kinya bhuno esiighiri ayeene.
Omobhere umu, ebhyemo bhyaru
12 Mbe,
omobhere o mooto noonyi ne ebhyemo bhyaru,
amare ebhyemo bhyose bhiyo,
n‑omobhere umu.
Hangʼu keenyi kwo mobhere o Kirisito,
niryo eriikanisa.
13 Neghosiikëra hangʼu,
gho kubha itu bhoose,
tubhe Abhayahuuti hamu abhaato bha matöngö aghande,
tubhe abhasësë hamu abhaato huuru,
ntubhatiisuru gho Körö imu na kuhaabhu Akörö iyo,
kubha tubhe omobhere umu.
14 Mbe,
omobhere toonyi ne ekyemo kimu hangʼu,
amare noonyi ne ebhyemo bhyaru.
15 Aribha oghoghoro kongabhughiri kubha,
“Eni nteenyi okubhökö,
gho ghayo,
eni nteenyi eribhaara re mobhere,”
ibheere gho kobhugha hangʼu,
m‑mahëënë oghoghoro ghotaakubha ekyemo ke mobhere?
16 Oghotu koose nkongabhughiri kubha,
“Eni taanyi eriiso,
mbe,
eni teenyi eribhaara re mobhere,”
ibheere gho kobhugha hangʼu,
m‑mahëënë oghotu ghotaakubha ekyemo ke mobhere?
17 Aribha omobhere woose nongabheere eriisho,
omooto nangatoriri kooghu?
Hamu omobhere woose nongabheere oghotu,
omooto nangatoriri ghochoona?
18 Amare ibheere,
Eryobha ndebhetooriri ebhyemo bhyose mo‑mobhere kinya bhuno resiighiri eryene.
19 Omobhere tongabheere omobhere,
aribha ongabheere ne ekyemo kimu hangʼu.
20 Ebhyemo m‑bhyaru,
amare omobhere n‑umu.
21 Eriiso retaaghotora kobhoorera okubhökö kubha,
“Iye nteeghokwënda.”
Koru omutu toghotora kobhoorera amaghoro kubha,
“Inyu ntëëköbhëënda.”
22 Ghokera ghayo,
ebhyemo bhe mobhere bhino bhekorighibhu kubha,
m‑bhe hangʼu hangʼu,
nibhyo bhekwëndëru chwee.
23 Wiiki ebhyemo bhino tookorighi kubha,
bhetaakubha ghosooku,
nibhyo bheghosooku chwee.
Ebhyemo bhe mobhere wiito bhino bhekorighibhu kubha,
m‑bhe chaasoni,
nibhyo tokobhetugha bhoheene,
24 eriibhagha ebhyemo bhino bhetaanyi bhe chaasoni,
bhetaakwëndëru ghoghongibhu kinya ebhende.
Eryobha eryene ndewuköriri bhoheene omobhere.
Ebhyemo bhino bhetaaghosooku bhobhe,
ndebhiköriri bhesooku chwee,
25 kubha omobhere otataana,
amare ebhyemo bhyose bhetoorani bhoheene.
26 Aribha ekyemo kimu ke mobhere kinyahaarekiri,
ebhyemo bhyose mbehanyahaareka haghirohamu nakyo.
Wiiki ekyemo kimu keraghongibhu,
bhyose mbaghuchömëru haghirohamu nakyo.
27 Mbe,
inyu bhoose n‑omobhere o Kirisito moonyi,
no omooto woose ghate yaanyu n‑ekyemo ke mobhere uyo.
28 Eryobha ndetooriri abhaato mo‑riikanisa,
a bhambërë abhatomu,
na bha kabhere na abharööti,
na bha ghatato n‑abheeghi.
Wiiki ndetooriri bhano bhaghuköra ebheroghooro,
na bhano bhaanyi ne ekihaano ghe kuhöri abhabhabharu,
na ghe kobhatoori abhande,
na ghe ghukangata,
na ghe ghughamba ebhighambo ebhihë.
29 Ibheere,
abhaato bhoose n‑abhatomu?
Abhaato bhoose n‑abharööti?
Abhaato bhoose n‑abheeghi?
Abhaato bhoose mbaghuköra ebheroghooro?
30 Wiiki,
abhaato bhoose mbaanyi ne ekihaano ghe kuhöri abhabhabharu?
Abhaato bhoose mbaghosiikëra ebhighambo ebhihë?
Abhaato bhoose mbaanyi ne ekihaano ghe ghugharura ebhighambo bhiyo?
31 Mbe,
mwiköngʼi kubhöna ebhihaano bhekoro.
Amare ibheere nekwënda nëbhëërëki anchëra anchömu koheta choose.