11
Mbe,
moonyeghe eni,
kinya bhuno eni nemweghiri Kirisito.
Amëërëkërëri ighoro e ghusabha
2 Nekobhaghongi gho kubha mohiitiri mo‑mangʼana ghoose,
na ghughööta ameeghi ghano ꞉neebhaheere.
3 Amare ibheere nekwënda mumënyë kubha omutua o mosubhe wowoose uno akumiri,
n‑Kirisito,
no omutu o mukari,
n‑omosubhe waache,
no omutu o Kirisito n‑Eryobha.
4 Gho ghayo,
omosubhe wowoose omokumi uno aghokundekeri omutu eriibhagha aghusabha,
hamu eriibhagha akoruusi obhurööti,
uyo nakomosooki Kirisito,
uno anyi omutu waache.
5 Omukari omokumi uno ataaghokundekeri omutu waache eriibhagha aghusabha,
hamu eriibhagha akoruusi obhurööti,
uyo nakomosooki omosubhe waache,
uno anyi omutu waache.
Neekubha hangʼu,
gho kubha naakubha kinya omukari uno angʼööbhiri omokwereeri.b
6 Aribha omukari ataaghokundekeri omutu waache,
ngʼoni angʼööbhë chanchweri cheeche!
Amare gho kubha n‑chaasoni kwo mukari kungʼööbha chanchweri,
gho ghayo,
ngʼoni akundekeri omutu waache.
7 Teekubha omosubhe akundekeri omutu waache,
gho kubha iwe n‑eghetuubhaani ke Ryobha,
wiiki nakwërëki obhokumi obhokoro bho Ryobha.
Amare omukari nakwërëki obhokumi obhokoro bho mosubhe waache.
8 Neghosiikëra hangʼu gho kubha,
Eryobha retamutëëmiri omosubhe koru kwo mukari,
amare ꞉ndeemutëëmiri omukari koru kwo mosubhe.
9 Wiiki Eryobha retamutëëmiri omosubhe gho ghiri e mukari,
amare ꞉ndeemutëëmiri omukari gho ghiri e mosubhe.
10 Gho ghayo,
nekwëndëru omukari akundekeri omutu waache,
kinya ekyërëkërëri kubha naanyi haase e bhukangati bho mosubhe waache,
gho ghiri e marayika.c
11 Amare gho ghughöötana no Omutëmi,
omukari naghwitëngʼëra omosubhe,
omosubhe woose naghwitëngʼëra omukari.
12 Neghosiikëra hangʼu gho kubha,
kinya bhuno omukari atëëmuru koru kwo mosubhe,
hangʼu hangʼu omosubhe nakwibhoru no omukari.
Amare ebheghiro bhyose mbehaaru kwo Waryobha.
13 Ibheere mwishererani inyu bheene,
nekwëndëru omukari asabhe Eryobha ino atakundekiiri omutu waache?
14 Kinya amangʼana ghaanyi nekwërëki kubha,
n‑chaasoni kwo mosubhe kubha na chanchweri indë!
15 Amare kwo mukari kubha na chanchweri indë ngokomuköra asooku,
d gho kubha nahaabhuru chanchweri indë kubha chibhe kinya angibho e ghokundekeri omutu waache.
16 Amare aribha omooto akwënda ghoshangʼaana ighoro e mangʼana ghayo,
na amënyë kubha itu totaanyi na asughara ayende ghokera iyo,
koru mo‑makanisa gha Ryobha teenyi‑ho asughara ayende.
Abhakorinto bhataakurë ekiinyakurë ke Mutëmi bhuno ekwëndëru
17 Ighoro e ghano nekwënda kobharaghereri ibheere,
nteekobhaghongi,
gho kubha hano mookubha mwikomiine haghirohamu motaaghuköra ghano ghaanyi no obhwëra,
amare moghuköra ghano ghataanyi no obhwëra.
18 Nyoghwire kubha,
hano moghwikomana kinya eriikanisa,
motaanyi no obhoghwani ghate yaanyu.
Na neeni neghokumi hasuuhu kubha,
hangʼu keenyi.
19 Koheteerana ghate yaanyu ngokwëndëru kubhe‑ho,
kubha bhano bhaanyi abhahëënë ghate yaanyu bhamënyu.
20 Ibheere,
hano moghwikomana haghirohamu motaakurë ekiinyakurë ke Mutëmi kebhuno ekwëndëru,
21 gho kubha,
omooto woose naakurë ekiinyakurë keeche motaaghughanyana.
Gho ghayo,
abhamu ghate yaanyu mbaghusaagha na anchëra,
na abhande mbarëëwuru.
22 Ibheere,
motaanyi na chaaka chino moghotora kuraaghëra na kunyo?
Ngwake moghutaraaha eriikanisa re Ryobha na kobhasooki bhano bhataanyi ne egheghiro?
Nebhabhoorere ke?
Nebhaghongi?
Tiyaanyi!
Nteekobhaghongi gho ghiri e mangʼana ghayo.
Kurë ekiinyakurë ke Mutëmi bhuno ekwëndëru
23 Ameeghi ghano nesongʼaaniri koru kwo Mutëmi Yesu,
nigho ꞉neebhaheere inyu kubha,
obhotiko bhuure Yesu igharoriinu,
akiimoki omughaate,
24 aghiitabheri Eryobha,
akawosuura,
akabhaha abhatomu bhaache arabhugha,
“Uno niwe omobhere waane,
uno okoruusibhu gho ghiri yaanyu.
Mubhe moraköra hangʼu,
gho kohiita eni!”
25 Hangʼu hangʼu,
hano bhamariri kurë,
akiimoki eghisënchö ke divaayi,
akabhugha,
“Adivaayi ino enyi mo‑ghisënchö kino,
n‑amasaahë ghaane gha Eriiraghano Eriihë,
moyinyo.
Mubhe moraköra hangʼu eriibhagha ryose,
gho kohiita eni!”
26 Gho ghayo,
hano mookurë omughaate uyo na ghokenywera eghisënchö kiyo,
mookubha moraraghani ghoku kwo Mutëmi mbagha hano akuucha.
27 Omooto wowoose uno akurë omughaate uyo hamu ghokenywera eghisënchö kiyo bhuno etaakwëndëru,
naakubha aköriri amasari,
gho kubha nataraahiri omobhere na amasaahë gha Mutëmi.
28 Gho ghayo,
omooto woose isunche omwene,
niho ari omughaate na ghokenywera eghisënchö.
29 Neghosiikëra hangʼu,
gho kubha omooto uno akurë omughaate na konywera eghisënchö ino ataanyi no obhumu no omobhere o Mutëmi,
uyo naakubha iteniire ekiina omwene.
30 Gho ghiri iyo nikyo ghate yaanyu mbaanyi‑ho abhabhabharu bhaaru,
koru abhande mbakuure.
31 Aribha tongiisunchiri itu abheene,
Eryobha retangatoteniire ekiina.
32 Amare ibheere,
hano tokuröönu no Omutëmi,
hayo naakubha aratweghi,
kubha Eryobha retaacha ghototenera ekiina kinya bhuno rekobhatenera ekiina abhaato bhano bhataryeche.
33 Gho ghayo,
abhahiiri bhaane,
hano moghwikomana kurë ekiinyakurë ke Mutëmi,
mughanyane singa.
34 Aribha omooto anyi na anchëra,
araaghërë awaache,
kubha ghwikomana koonyu ghotabhaköra moteneru ekiina.
Amangʼana aghande ghano ghasaaghiri,
neraacha neghoghatoora bhoheene.