1 Abhakorinto 10

Atöngërö ighoro e ghusëngëra chasanaamu

Abhahiiri bhaane, nekwënda mohiite kubha, eriibhagha bhasookoro bhiito bharuure Miisiri, bhoose mbaare bharakangatu ne erishaaro, wiiki bhoose ꞉mbaahetiri ghateghate e nyancha. 2 Hano bhakangaturu ne erishaaro na koheta ghateghate e nyancha, bhoose bhaakabha bhabhatiisuru kubha abhaanabheegha bha . 3 Bhoose bhaakarë ekiinyakurë kino ꞉keeruure Mwishaaro. 4 Wiiki bhoose mbanywire amanche ghano Eryobha rebhaheere gho nchëra e keroghooro, koru mwitare. Eriitare riyo n‑ are. Iwe naare araghënda haghirohamu nabho. 5 Amare abhaaru ghate ghaabho, bhaghaköra ghano ghataakoretegheri Eryobha, gho ghayo, bhaghasireekereru, amahundughu ghaabho ghaghasancha mwibhara.

6 Mbe, amangʼana ghayo ghoose n‑ebhetuubhaani ghokwito, kubha totabha toriighomba amabhe, kinya bhuno ibho ꞉bhaare bhariighomba amabhe. 7 Motabha morasëngëra chasanaamu, kinya bhuno abhande ghate yaabho ꞉bhaare bharaköra. Amandëkö Amatööbhiyu ngaandëkiri ighoro yaabho kubha, “Abhaato bhaghiikara kuraaghëra na kunyo, hano bhamariri bhakiimeerera kobhina.” 8 Wiiki totaköra obhutaari, kinya bhuno abhande ghate yaabho ꞉bhaaköriri, mbagha bhaghasireekerera kwo rosiko rumu abhaato ebheku miröngö ebhere na bhitato (23,000). 9 Wiiki totabha toramusaki Omutëmi, kinya bhuno abhande ghate yaabho ꞉bhaaköriri, bhakaromu na chanchöka, bhaaghaku. 10 Wiiki motiingʼunyerangʼunyera kinya bhuno abhande ghate yaabho ꞉bhaaköriri, bhaghiitu na marayika omosireekereri.

11 Mbe, amangʼana ghayo ꞉ghaabhabhwine ibho, ngaandëkuru kubha ghabhe eghetuubhaani ghe ghotushaangʼi itu bhano tumanyiri mo‑chaasiko chino che ntenero. 12 Gho ghayo, uno akwirighi kubha niimeeriire bhoheene mo‑bhokumi, ichonge, ataacha ghugho. 13 Amasaki ghano ꞉ghaabhabhwine inyu, n‑kinya ghano abhaato abhande bhakubhöna chaasiko choose. Eryobha n‑ihëënë, iryo retaakobhatigha musakibhu ghokera changuru cheenyu. Eriibhagha inyu moghusakibhu, Eryobha ndekobhaha changuru che ghoghumereri na anchëra e kohorokera muyo kwo murëmbë.

Ekiinyakurë ke Mutëmi na ghe kuhëërana chasanaamu

14 Gho ghayo, abhasiighani bhaane, mwikabhaahe motasëngëra chasanaamu! 15 Neghosiikëra na niinyu bhano moonyi no obhongo, moghoochochani inyu bheene ghano neghosiikëra. 16 Ibheere, eriibhagha re kiinyakurë ke Mutëmi, hano tokonywera eghisënchö gho ghiri e koriitabheri Eryobha, totahaabha torasanga haghirohamu mo‑masaahë gha Kirisito? Wiiki, eriibhagha toghosuura omughaate na kurë, totahaabha torasanga haghirohamu omobhere o Kirisito? 17 Omughaate uyo toghusanga itu bhoose n‑umu. Gho ghayo, itu bhoose n‑omobhere umu, nangabha toonyi bhaaru.

18 Mööhi eghetuubhaani ke Bhiisiraeri, ꞉mbaariire haghirohamu bhino bheruusiibhu amaruusi Mwisëngërö, bhaghaghöötana ne Eryobha gho nchëra e maruusi ghayo. 19 Ibheere, neke nekwënda ghosiikëra? Ebhiinyakurë bhino bheruusiibhu kuhëërana chasanaamu mbeenyi no obhwëra bhobhoose? Hamu asanaamu yoose n‑egheghiro? 20 Tiyaanyi! Nekwënda kobhugha kubha amaruusi ghano bhakoruusi abhaato bhano bhataryeche Eryobha, bhataakoruuseri Eryobha, amare mbakoruusi kwo misambu. Nteekwënda inyu mughöötane ghusëngëra emisambu. 21 Motaaghotora konywera eghisënchö ke Mutëmi na ke misambu. Motaaghotora kurë ekiinyakurë ke Mutëmi na ke misambu. 22 Ghasi, ntokwënda komunaaha Omutëmi? Mokwihëëbha kubha ntoonyi na changuru ghokera iwe?

Amaköri gha bhakumi ghareghongi Eryobha

23 Abhaato abhande ghate yaanyu mbakobhugha kubha, “Ntwishereriiru ghuköra ebheghiro bhyose bhino tookwënda.” Amare eni nebhugha kubha, taanyi bhyose bhino bheenyi no obhwëra ghokwito. Nangabha mokobhugha kubha, “Ntwishereriiru ghuköra ebheghiro bhyose bhino tookwënda.” Amare eni nekobhugha kubha, taanyi ebheghiro bhyose bhino bheghusakeri obhokumi bhwito bhuköngʼëri. 24 Omooto atatereera ghano ghakomusakeri iwe omwene hangʼu, amare atereere na ghano ghaghusakeri abhaghëndi bhaache.

25 Mori kira egheghiro kino gheghoghoru mo‑mitëëra motiikara kobhooribhoori, kubha motanyaaka mo‑metema gheenyu, 26 gho kubha Amandëkö Amatööbhiyu ngakobhugha kubha, “Ase haghirohamu ne ebheghiro bhyose bhino bheenyi‑mu m‑bhe Omutëmi.”

27 Aribha omooto uno ataanyi omokumi abhaghënëhiri kuraaghëra, na niinyu mwisheriiri ghuye, mori egheghiro ghyokyose kino abhasëëmiire ino motaakobhooribhoori, kubha motanyaaka mo‑metema gheenyu. 28 Amare aribha omooto arabhabhoorera kubha, “Ekiinyakurë kino nkeruusiibhu mo‑chasanaamu,” hayo motarë ekiinyakurë kiyo, gho ghiri e mooto uno abhabhooriire, wiiki gho ghiri e masëmö gha mo‑metema. 29 Hano neghosiikëra kubha, “Gho ghiri e masëmö gha mo‑metema,” nteeghosiikëra ighoro e metema ghiito, amare ighoro e motema o mooto uno abhabhooriire, gho kubha ngwake nighëri obhohuuru bhoone bhoteneru ekiina no omotema o mooto owonde? 30 Aribha eni neekurë ekiinyakurë kiyo gho koriitabheri Eryobha, ngwake neteneru ekiina gho ghiri e kiinyakurë kino neritabhiiri Eryobha?

31 Mbe, ibheere, ghyokyose kino moghuköra, ibhe n‑kurë, hamu kunyo, hande koru ghuköra egheghiro ghyokyose, mukörë gho ghiri e koreghongi Eryobha. 32 Motanaaha omooto wowoose, bhabhe Abhayahuuti, hande abhaato bha matöngö, hamu eriikanisa re Ryobha. 33 Mubhe kinya bhuno eni neenyi. Neghwiköngʼi ghuchömëri abhaato bhoose kwo mangʼana ghoose ghano neghuköra. Taanyi kubha neghuköra hangʼu, kubha nibhönë obhwëra eni mwene, amare neghuköra hangʼu kubha abhaato bhaaru bhabhönë obhwëra gho kubhöna obhotoori.