Amangʼana ghano abhatomu mbakwëndëru kuhaabhu
9
Ibheere,
eni nteenyi huuru?
Eni taanyi omotomu?
Eni ntemorooche Omutëmi wiito Yesu?
Wiiki emeremo ghino eni ꞉niiköriri taanyi nighyo ghebhaköriri inyu momokumi Omutëmi?
2 Koru aribha abhaato abhande bhakorighi kubha eni taanyi omotomu neenyi,
amare eni ghokoonyu n‑omotomu,
gho kubha obhokumi bhoonyu mo‑Kirisito n‑ekingʼöchö kino ghekwërëki kubha eni netomuru no Omutëmi.
3 Abhaato bhano bhakonyanga eni kubha,
nteenyi omotomu,
ˆnekabhabhoorera kubha,
4 itu totaakurëngʼaanera kuhaabhu ebhiinyakurë ne ebhinywebhu gho ghiri e meremo ghiito ghe bhotomu?
5 Ibheere,
mokwihëëbha kubha itu totaanyi no obhohuuru bho ghuye no omukari omokumi,
mo‑rughëndö ro kuraghani angʼana ighoro e Kirisito,
kinya bhuno abhatomu abhande ꞉bhaaköriri,
na abhahiiri bha Mutëmi Yesu,
na koru Keebha?a
6 Hamu n‑eni na Bharinaabha abheene,
bhano tokwëndëru ghuköra emeremo kubha tubhönë ebheghiro gho ghiri e eriimanya riito?
7 N‑omoshirikare ke uno aghuye mwihë gho kwirehera omwene?
N‑omoremi ke uno akwemi emisabhiibhu mo‑moghondo waache,
uno ataakurë amakorobhese ghaache?
Wiiki n‑omoriishi ke uno ataakunyo amabhëërë gha chaatugho cheeche?
8 Amangʼana ghayo neghosiikëra,
taanyi amiihëëbhö gha bhaato,
koru emeghiro ghe Musa wiiki ngeghosiikëra hangʼu.
9 Mo‑meghiro ghe Musa yandëkuru kubha,
“Eriibhagha angʼömbë ekubha erahoora angano,
otayibhöha omonu.”
b Ibheere,
niko kobhugha kubha mo‑mangʼana ghayo,
Eryobha ndekwihëëbha ighoro e changʼömbë?
10 Hamu ndeere rerabhugha gho ghiri yiito?
Nibhu keenyi!
Amandëkö ghayo ngaandëkuru gho ghiri yiito,
gho kubha uno akorema na uno aghughësa,
bhoose mbakwëndëru ghwitëngʼëra kubha mbakubhöna ahööhi.
11 Itu ntobharaghaniiri angʼana ighoro e Kirisito,
kinya omooto uno akwemi chaatëtërë.
Ibheere,
n‑ngʼana inkoro ghokoonyu ghotuha ebhiinyakurë ne ebhinywebhu,
kubha tubhönë obhwëra,
kinya omughësi ahaabhöna?
12 Aribha abhande mbakurëngʼaanera kuhaabhu ebheghiro kinya bhiyo koru ghokoonyu,
ibheere itu,
totaakurëngʼaanera kuhaabhu ebheghiro bhiyo ghokera ibho?
Amare itu tötëëndiri ghano turëngʼaaniire kuhaabhu na niinyu,
amare ntoghumeriiri mo‑ghoose,
kubha totaacha kobhahööchërëra abhaato ghokumi Angʼana Anchömu ighoro e Kirisito.
13 Kana,
moteeche kubha bhano bhaghuköra emeremo Mwisëngërö re Ryobha,
mbakubhöna ekiinyakurë keebho koru Mwisëngërö riyo,
na kubha bhano bhakoruusi amaruusi ahaghiro ha koruuseri amaruusi,
mbahaabhöna ahööhi e maruusi ghayo?
14 Wiiki Omutëmi Yesu ꞉naahatëkiri hangʼu hangʼu,
kubha,
bhano bhakuraghani Angʼana Anchömu,
bhabhe bharabhöna amënda ghaabho kurëngʼaana ne emeremo ghiyo.
15 Amare eni ntiimara nsabha koru kimu mo‑bhino nirëngʼaaniire kuhaabhu.
Wiiki ntyandëkiri hangʼu,
kubha nihaabhu bhiyo ibheere.
Ghokoone ngʼoni ghoku ghokera komuköra omooto anduusi okwihacha koone gho kuraghani Angʼana Anchömu kuno neghuköra ntaakorehu.
16 Eni nteekurëngʼaanera kwihacha gho ghiri e kuraghani Angʼana Anchömu,
gho kubha emeremo ghiyo nighyo niragheriiru ghuköra.
Wiiki horeera nekorighi eni aribha neraanga kuraghani Angʼana iyo Anchömu.
17 Aribha nengabheere neraköra emeremo ghino kwo miigha ghaane eni omwene,
nengiitëngʼiire kubhöna atuho.
Amare taanyi hangʼu ghokoone,
gho kubha Eryobha ndeheere emeremo ghino kwo mënda ghaache,
kubha neghikörë.
18 Ibheere atuho yaane n‑ghento ke?
Atuho yaane n‑kuraghani Angʼana Anchömu taanyi korehu,
taanyi ghusabha ghano nirëngʼaaniire kuhaabhu gho ghiri e kuraghani angʼana iyo.
Amangʼana ghano abhatomu bhakwëndëru ghuköra
19 Eni nteenyi omusësë o mooto wowoose,
huuru neenyi.
Amare ꞉niitooriri kubha omusësë o bhaato bhoose,
kubha nebhatoori abhaato bhaaru bhamokumi Kirisito.
20 Kwo Bhayahuuti,
neere kinya Omuyahuuti,
kubha nebhatoori bhamokumi Kirisito.
Eni omwene nteenyi haase e meghiro ghe Musa,
amare ꞉niitooriri haase e meghiro ghiyo,
kwo bhano bhaghutambana emeghiro ghiyo,
kubha nebhatoori bhamokumi Kirisito.
21 Kwo bhano bhataanyi ne emeghiro ghe Musa,
neere kinya omooto uno taanyi ne emeghiro ghiyo,
kubha nebhatoori bhamokumi Kirisito.
Iyo taanyi kubha nteenyi ne emeghiro ambërë e Ryobha,
amare neenyi naghyo gho kubha neghukangatu ne emeghiro ghe Kirisito.
22 Kwo bhano bhataamara bhaköngʼëri mo‑bhokumi,
neere kinya uno ataamara aköngʼëri mo‑bhokumi kubha nebhatoori bhamokumi Kirisito.
꞉Niiköriri ghoose kwo bhaato bhoose,
kubha gho nchëra yoyoose yiire,
nebhatoori nangabha abhamu ghate yaabho.
23 Neghuköra ghayo ghoose gho ghiri e Ngʼana Anchömu kubha nisange na abhande mo‑rubhango rooche.
24 Moteeche kubha abhaato bhano bhaghosirisinchana koyaara,
bhoose mbakoyaara,
amare uno akubhöna atuho n‑umu hangʼu?
Ibheere mwiköngʼi koyaara,
kubha mubhönë atuho.
25 Bhano bhaghokindana mo‑riibhina,
mbahihööchërëra mo‑maaru gho ghiri e ghokindana.
Mbaghuköra hangʼu kubha bhasongʼaane atuho ino eghusarëka.
Amare itu ntoghuköra hangʼu,
kubha tubhönë atuho ino etaaghusarëka.
26 Gho ghiri iyo eni nteekoyaara kinya omooto uno akoyaara ataanyi ne kebhune,
wiiki nteekurööna kinya omooto uno akurëkëra ebhekundi bhoowa.
27 Amare nekowunyaaki na kowunari omobhere waane ghoghumereri,
kubha ndamara kobharaghaneri abhaato Angʼana Anchömu,
eni omwene netaacha kwangu ambërë e Ryobha.