Ebhiinyakurë bhino bheruusiibhu mo‑chasanaamu
8
Ibheere ˆneghasiikëra ighoro e mangʼana gha bhiinyakurë bhino bheruusiibhu mo‑chasanaamu.
a Ntweche kubha,
“Itu bhoose ntoonyi no obhumënyi.”
Amare obhumënyi mbohaabhaköra abhaato bhiihache.
Amare obhosiighi nibho bhokobhaköngʼi abhaato mo‑bhokumi.
2 Aribha omooto akwirighi kubha neeche angʼana nyarebhe,
uyo teeche ghyokyose kinya bhuno akwëndëru kumënya.
3 Amare omooto uno aresiighiri Eryobha,
uyo niwe akumënyu ne Eryobha eryene.
4 Ibheere ighoro e kurë ebhiinyakurë bhino bheruusiibhu amaruusi mo‑chasanaamu,
ntweche kubha chasanaamu chino cheghusëngëru,
taanyi egheghiro mo‑se muno.
Wiiki ntweche kubha ndeenyi‑ho Eryobha rimu hangʼu.
5 M‑mahëënë kubha abhaato abhande mbaghwituuri kubha,
ngeenyi‑ho emisambu Mwishaaro na koru mo‑se.
Mahëënë,
mbeenyi‑ho ebheghiro bhyaru bhino abhaato bhakobherekera kubha emisambu hamu abhakangati.
6 Amare ghokwito,
ndeenyi‑ho Eryobha rimu hangʼu,
niryo Taata,
niryo ꞉riitëëmiri ebheghiro bhyose,
itu ntokumanya gho ghiri yaache.
Wiiki naanyi‑ho Omutëmi umu hangʼu,
niwe Yesu Kirisito,
ne ebheghiro bhyose ꞉mbiitëëmuru gho kohetera ghokooche,
wiiki itu ntoonyi abhahöru kurëngʼaana nawe.
7 Amare taanyi abhaato bhoose bhano bhaanyi no obhumënyi bhuyo,
gho kubha mbaanyi‑ho abhande bhano ꞉bhaare na chaasughara che ghusëngëra chasanaamu.
Koru ibheere,
eriibhagha bhaakurë ebhiinyakurë bhino bhiihëriinu mo‑chasanaamu,
ebhiinyakurë bhiyo mbekobhaköra bhahiite chasanaamu.
Hayo mbakwirighi mo‑metema gheebho kubha mbaghuköra amasari,
gho kubha bhataamara bhaköngʼëri mo‑bhokumi.
8 Ibheere,
ekiinyakurë ghetaaghototoora kubha haghuhe ne Eryobha,
gho kubha toratigha kurë,
totaaghosuuheru ne egheghiro,
wiiki ntongarë,
totaakwëngëra egheghiro.
9 Amare mwichonge bhoheene,
obhohuuru bhoonyu bhotaacha ghughëri bhano bhataamara bhaköngʼëri mo‑bhokumi,
bhasöhë mo‑masari.
10 Neghosiikëra ghayo,
gho kubha omooto uno ataamara aköngʼëri mo‑bhokumi,
aribha arakorighi iye uno weeche kubha chasanaamu chetaanyi no obhuhöru,
nookurë ebhiinyakurë mo‑risëngërö re ghusëngëra chasanaamu,
kana,
taakwihëëbha mo‑metema waache kubha,
woose nakurëngʼaanera kurë ebhiinyakurë bhino bheruusiibhu mo‑chasanaamu?
11 Gho nchëra iyo,
omokumi mughëndi waacho uno ataamara aköngʼëri mo‑bhokumi,
uno Kirisito akweriire,
nakobhora gho ghiri e bhumënyi bhoocho.
12 Mbe,
aribha morabhataaseri abhakumi abhaghëndi bhano bhataamara bhaköngʼëri mo‑bhokumi,
bhakörë amasari,
na kunyahaara emetema gheebho,
hayo mookubha momutasiiri Kirisito omwene.
13 Gho ghayo,
aribha ekiinyakurë kino neekurë,
ngeghughëri omokumi omughëndi waane akörë amasari,
nteekurë koru hasuuhu ekiinyakurë kenga kiyo,
kubha netaacha ghuköra omokumi omughëndi waane akörë amasari.