Ruutu ˆakarwachu kubhöna omosubhe
3
Orosiko rumu, Nawomi akabhoorera omukamoona waache akabhugha, “Moona waane nengabheere bhoheene neghutabharere omosubhe o ghoghotugha, kubha ubhönë amachömu. 2 Weeche Bhowaasi uno ore oraköra emeremo na abhaakë bhaache, m‑mohiiri wiito o haghuhe. Mbe, tëghëërëra, omughörööbha uno o reero naakubha arahoora ashayiri mo‑robhooka rooche. 3 Ibheere iye nooyi wishaabhe wiihake amaghuta gha keneeso no obheeke bhoheene. Oramara oghi ahaghiro hano akohoorera, amare wichonge atamanya kubha hayo onyi. Otighe singa amare kuraaghëra na kunyo. 4 Wiiki umënyë hayi akomisi, aramara komisi oghi kiihoro obhushure mo‑maghoro ghaache wiraari hayo.a Arabhooka naghokobhoorera kino oghuköra.”5 Niho Ruutu aghagharokeri, “Neghuköra ghoose kinya ombooriire.” 6 Ibheere Ruutu aghaye mo‑robhooka ruyo, aghaköra kinya nyinabhiyaara amobhooriire.
7 Mbe, Bhowaasi hano amariri kunyo na kuraaghëra aghachömëru. Ibheere aghaye haghuhe ne erituumu re shayiri akamisi hayo. Hano Ruutu arooche ˆakamisi, aghaye kiihoro akabhushura angibho mo‑maghoro ghaache akiiraari woose hayo. 8 Obhotiko bho ghate Bhowaasi aghiitaki, aghiishoorori, akabhöna omukari amisiri haghuhe na amaghoro ghaache.
9 Ibheere Bhowaasi akabhoori, “Aa! Kana n‑niwe uno?”
Ruutu akamugharokeri akabhugha, “Neeni Ruutu, omubhaghati waacho. Neghusabha ontughe,b gho kubha iye m‑mohiiri waane onyi uno okwëndëru ghontugha.”
10 Bhowaasi akamugharokeri akabhugha, “Omuukë waane Omutëmi Waryobha aghwitabheri, gho kubha gho ghoose ghano oghuköra nokwërëki asooko inkoro kwo bhaato bhiito ghokera ghano uköriri hayo ekimbërë. Tobhatabhiire abhabhureni abhahabhe hamu abhaame bhaghokwire. 11 Ibheere muuke waane otatiina, neghoghukörëra ghyokyose kino orasabha, gho kubha omooto woose o mo‑moghya uno neeche kebhuno onyi na asughara anchömu. 12 M‑mahëënë kubha nekwëndëru ghoghotugha, amare naanyi‑ho uno akwëndëru ghoghotugha, uno anyi haghuhe ghokoonyu ghonkera eni. 13 Ibheere iye nwikare hano obhotiko bhuno, na hano bhooghuke ntokorighi aribha aghwishereri ghoghotugha hamu tiyaanyi. Aribha ariishereri ghoghotugha m‑bhoheene. Wiiki araanga eni kwo riina re Mutëmi Waryobha neghoghotugha. Noomisi hano mbagha bhoki.”
14 Mbe, Ruutu akamisi hayo haghuhe na amaghoro ghaache mbagha atabhoori. Akabhooka hakeere kubha abhaato bhatamorighi, gho kubha Bhowaasi tëëndiri abhaato bhamënyë kubha Ruutu naare ahaghiro hayo ha kohoorera. 15 Ibheere Bhowaasi akamobhoorera akabhugha, “Nware angibho yaacho haase hano.” Ruutu aghaköra kinya Bhowaasi amobhooriire. Bhowaasi akamotoorera ashayiri kinya riitëbhë rimu no obhusaagho, akamwitweki. Ibheere Ruutu aghagharuka o‑nyinabhiyaara.
16 Hano Ruutu ahikiri aka, nyinabhiyaara akamobhoori akabhugha, “Nibhu ghabheere iyo moona waane?”
Ruutu akamobhoorera ghoose ghano Bhowaasi amuköriire. 17 Wiiki akëëngëra kobhugha, “Nambooriire netagharuka aka o‑mabhiyaara neenyi mabhökö bhoowa. Ibheere aghantahëra eriitëbhë rimu no obhusaagho re shayiri.”
18 Niho Nawomi woose aghagharokeri akabhugha, “Ibheere horeera moona waane, mbagha orighi kino ghekuucha korwera. Bhowaasi taghwikara na amangʼana ghano mbagha reero aghahikeerani ghoose.”