Ruutu ˆaghatëmëërana na Bhowaasi
2
Ibheere Nawomi naare no omohiiri waache koru mo‑rwibhoro ro Erimereeki mosubhe waache, akobherekeru Bhowaasi. Mohiiri waache uyo naare mooto mokoro wiiki moniibhi are. 2 Orosiko rumu Ruutu o Mowaabhu akamobhoorera nyinabhiyaara akabhugha, “Ibheere nonyiisherereri neghi mo‑meghondo ghutööra bhino bhaakubha bhatighiri abhaghësi. Neghotora kubhöna omooto uno aghotora konyiisherereri nitöörë anyuma yaache.”aNyinabhiyaara akamugharokeri akabhugha, “M‑bhoheene moona waane nughëndë.”
3 Mbe, Ruutu aghaye mo‑moghondo umu ghutööra ebhisaawa. Hano ahikiri akabha arabharu anyuma abhaghësi, aratööra ebhibhaawa bhino ꞉bhaare bharatigha abhaghësi bhayo. Niho aghatookera anyi mo‑moghondo o Bhowaasi uno are o mo‑rwibhoro rwi she bhiyaara Erimereeki.
4 Eriibhagha riiche koheta Bhowaasi akaacha ararwera Bheserehemu akabhakëëri abhaghësi bhayo akabhugha, “Omutëmi Waryobha abhe haghirohamu na niinyu.”
Nabho bhakamugharokeri, “Omutëmi Waryobha aghwitabheri.”
5 Ibheere Bhowaasi akamobhoori uno are imeereriire abhaghësi bhayo akabhugha, “Kana omuukë uno waawe?”
6 Omwimeereri uyo akamugharokeri akabhugha, “Omuukë uno, wuure o Mowaabhu uno ichiri na Nawomi koru mo‑se e Mowaabhu. 7 Niichiri aghansabha nemwisherereri abharu anyuma abhaghësi, abhe aratööra ebhisaawa bhino bhaakubha bhatighiri mo‑matuumu. Koru hangʼu naköriri omoremo uno korwera atabhoori n‑ibheere ˆaghaye koweera mo‑kebhuru.”
8 Niho Bhowaasi akamobhoorera Ruutu akabhugha, “Tëghëërëra muuke waane, otabha oraye ghutööra ebhisaawa mo‑meghondo eghende, oyi oratööra mo‑moghondo uno oweene. Wiiki ughöötane na abhasubhaati bhaane. 9 Umööhi hano bhaakubha bharaghe ghughësa, ubhe orahinana nabho. Nebhashaangʼiri abhabhureni bhano bhaanyi hano bhataakunyaaki. Wiiki orooghu anyööta oghi onyo amanche mo‑chanyongo chino bhatahiire‑mu abhabhureni bhayo.”
10 Ruutu ache kooghu amangʼana ghayo, akabhuna ebheru akiihiinya mbagha haase gho sooko ambërë e Bhowaasi akamobhoorera, “Nibhu ˆngaköra ˆokanyisherereri. Wiiki ˆokandigheri changori na kubha eni m‑mughëni neenyi?”
11 Nawe Bhowaasi akamugharokeri akabhugha, “Nyoghwire ghoose ghano omuköriire nyako bhiyaara korwera hano mosubhe waacho akweriire. Nyeeche kinya otighiri abhiibhori bhaacho, oghatigha ase yaacho na kinya wichiri kumanya mo‑bhaato bhano otabheeche. 12 Omutëmi Waryobha aghwitabheri gho ghoose ghano uköriri. Omutëmi, Eryobha re Isiraeri rino ungʼosiire mo‑mabhabha ghaache gho ghoghochonga, rekuhë atuho ino irëngʼaaniire.”b
13 Ruutu aghagharokeri akabhugha, “Oo omutëmi iye nunköriire amachömu maaru chwee. Nangabha nteenyi ghate e bhatamishi bhaacho, nontooriri omukörö, wiiki nosiikiire na neeni kwo bhuchömu.”
14 Ibheere eriibhagha re ndaaghëra Bhowaasi akamughënëhi Ruutu akabhugha, “Ishuka hano, uche ori omughaate, wiiki ubhe oraköri mo‑divaayi yiito.” Mbe, Ruutu aghiikara haghirohamu na abhaghësi bhayo, Bhowaasi akamuha chaahëkë chino chikarangiri akarë aghiighota ne echende aghasaaghi.
15 Hano bhamariri andaghera, Ruutu akiimeerera akëëndërëra ghutööra omunöghö o shayiri, Bhowaasi akabhabhoorera abhaköri bhaache bha meremo akabhugha, “Momotighe akome koru mo‑matuumu motamurëki. 16 Wiiki hano mookubha moraghësa momorutere ebhisaawa koru mo‑chaasa chino mookubha mubhöhiri momotighere atöörë motamurëki.”
17 Ibheere Ruutu akëëndërëra ghutööra ebhisaawa mbagha omughörööbha, hano ahooriri ashayiri iyo aghiichori eriitëbhë rimu no obhusaagho.
Ruutu ˆaghagharuka o‑Nawomi
18 Hano amariri aghitweka ashayiri iyo aghaye o‑nyinabhiyaara komwërëki kino atööriri. Wiiki akamuha ebhiinyakurë bhino araghiire aghiighota bheghasaagha.
19 Ibheere nyinabhiyaara akamobhoori, “Bhino bhyose hayi obhitöriire reero? Kana mo‑moghondo waawe ore? Ngʼoni uno aghotooriri.”
Mbe, Ruutu akamugharokeri nyinabhiyaara akabhugha, “Neere neraköra emeremo mo‑moghondo o mooto umu akobherekeru Bhowaasi.”
20 Nyinabhiyaara ache kooghu ghayo, akamobhoorera omukamoona waache akabhugha, “Omutëmi Waryobha amwitabheri Bhowaasi. Eryobha ndehahikeerani aghareeya yaache kwo bhaato bhano bhaanyi bhahöru na kwo bhaato bhano bhakuure.” Wiiki akëëngëra kobhugha, “Omooto uyo m‑mohiiri wiito o haghuhe woose n‑umu mo‑bhano bhakwëndëru ghototugha.”c
21 Niho Ruutu o Mowaabhu akamobhoorera, “Wiiki nweche, nambooriire nighöötane na abhahöki bhaache bha meremo mbagha hano bhakumarera erighësa reeche ryose.”
22 Mbe, Nawomi akamobhoorera omukamoona waache akabhugha, “Moona waane, neekubha bhoheene ghuköra emeremo haghirohamu na abhasubhaati bhaache. Oraghe ghuköra emeremo mo‑meghondo ghe bhaato abhande mbaghotora ghokunyaaki.”
23 Gho ghayo, Ruutu aghaghöötana nabho ghuköra omoremo, mbagha hano omoremo o ghotu ashayiri na angano osiriri. Kwo riibhagha riyo ryose Ruutu naare ariikara na nyinabhiyaara.