Ruutu
Aka e Erimereeki eghaye Mowaabhu
1
Kare haare hano abhakangati bha riihë ꞉bhaare bharakangata Isiraeri, hakarwera aghëëcha ihaari chwee mo‑se iyo yoose. Ibheere omooto umu koru mo‑moghya o Bheserehemu mo‑mukööwa o Yuteya, haghirohamu na mukaache na abhaana bhaabho bhabhere bha ghesubhe bhaaghaye kumanya mo‑se e Mowaabhu kinya abhaghëni. 2 Omooto uyo naare arabherekeru Erimereekia na mukaache naare arabherekeru Nawomi.b Abhaana bhaabho mbaare bharabherekeru Maroonic na Kiriyoni.d Omooto uyo na abhaato bhaache bhoose mbaare bha mo‑rwibhoro ro Ebhuraati koru mo‑moghya o Bheserehemu mo‑mukööwa o Yuteya. Abhaato bhayo bhakahika mo‑se e Mowaabhu bhakamanya iyo.3 Hano bhaare iyo, Erimereeki mosubhe o Nawomi aghaku, Nawomi aghasaagha mosino na abhaana bhaache bhabhere. 4 Abhabhureni bhayo bhaghakwira abhaghiikoro koru mo‑se iyo e Mowaabhu. Amariina gha bhakari bhayo, umu naare arabherekeru Ruutu no owonde Oribha. Ibheere ghiiche koheta kinya emeeka ikomi hangʼu, 5 abhabhureni bhayo bhabhere Marooni na Kiriyoni bhoose chaasiko cheekabhare. Ibheere Nawomi aghasaagha ataanyi na mosubhe koru omoona.
Nawomi na Ruutu bhaaghaye Bheserehemu
6 Chaasiko chiiche koheta, Nawomi akooghu amangʼana kubha Omutëmi Waryobha nabhitabhiiri abhaato bhaache gho kobhaha ebhiinyakurë. Ibheere akabhooka ghugharuka bhowaabho iwe na abhakamoona bhaache. 7 Mbe, akaru hayo are asamiire, aghaghöötana na abhakamoona bhaache, bhaghatacha anchëra ghuye mo‑mukööwa o Yuteya.
8 Ibheere hano bhaare mo‑nchëra Nawomi akabhabhoorera abhakamoona bhaache bhabhere akabhugha, “Omooto woose nagharuke awaabho. Wiiki nekobhasabhera kwo Omutëmi Waryobha abhe muhëënë ghokoonyu kinya inyu mubheere bhahëënë ghokoone na kwo bhaato bhaane bhano bhakuure. 9 Omutëmi Waryobha abhasakeri mooto woose abhönë omosubhe ne eriimanya ichömu mo‑ka yaache.” Akamara Nawomi akabharagha gho kobhatahata.
Nabho abhakamoona bhayo bhaghasëëma korera gho ghotiiri amaraka 10 bhakamobhoorera, “Aa tiyaanyi! Ntooghuye haghirohamu na niiye mo‑bhaato bhaacho.”
11 Ibheere Nawomi akabhasasaama arabhugha, “Mugharuke bhaana bhaane. Kana neke moghuntambanera? Kana moghwituuri kubha nekubhöna abhaana bhano bhaghotora kobhakwira wiiki? 12 Mugharuke mo‑chaaka cheenyu, gho kubha eni nimariri ghokunguha nteeghotora ghokwiru wiiki. Koru nengabhugha kubha neenyi na amiitëngʼërö gha kubhöna omosubhe obhotiko bhuno neramara niibhore abhaana bha ghesubhe, 13 ibheere mongatoriri ghwiköngʼëërëri mbagha bhabhe abhantomonkoro bhaache bhabhakwire? Wiiki mongatoriri ghwiköngʼëërëri motakwiru na abhasubhe abhande? Taanyi hangʼu bhaana bhaane! Eni nebhwine obhororo ghokera inyu, gho kubha Omutëmi Waryobha namariri ghontigha.”
14 Bhaache kooghu amangʼana ghayo bhaghatiiri amaraka bhaghasëëma korera wiiki. Ibheere Oribha akamutahata nyinabhiyaara akamuragha, amare Ruutu akaanga aghaghöötana nawe.
15 Ibheere Nawomi akamobhoorera Ruutu akabhugha, “Mööhi mughëndi waacho nagharokiri awaabho na kwo musambu waache. Mbe, kana iye woose nugharuke omutambane mughëndi waacho.”
16 Ruutu ache kooghu ghayo akamugharokeri, “Otighe ghunsasaama ango neghotighe iye, wiiki otandeki ghoghutambana. Hohoose hano iye oraghe eni woose niho nguye, hayo oriikara eni woose niho ngwikara. Abhaato bhaacho mbaakubha abhaato bhaane ne Eryobha reecho ndeekubha Eryobha reene. 17 Hano okuucha ghokwera niho eni woose neghokwera, niho hayo wiiki nekuucha koryeku. Egheghiro ghyokyose kerantaani na niiye Omutëmi Waryobha andöönë, naanyinga oroko orwene.”
18 Hano Nawomi arooche kubha Ruutu akahënërëra bhahinane nawe, aghatigha komusasaama kubha agharuke awaabho. 19 Niho bhombe bhabhere bhaghaghööta orughëndö ghuye mo‑moghya o Bheserehemu. Hano bhahikiri abhaato bhoose bhakabharoghoora, abhakari bhaakabha bharabhoorani, “Kana! Uno n‑Nawomi?”
20 Niho Nawomi akabhagharokeri akabhugha, “Eni motamberekera Nawomi wiiki, momberekere Maara,e gho kubha Eryobha re Bhotoro Bhoose ndiköriri eriimanya reene ribhe iroro chwee. 21 Eriibhagha neeruure hano neere ne ebhighiro bhyaru chwee, amare ibheere Omutëmi Waryobha ˆaghangaroki hano, neenyi mabhökö bhoowa. Ngwake mokomberekera Nawomi naho Omutëmi Waryobha o Bhotoro Bhoose nandööniri na kunyaaki chwee?” 22 Hangʼu nibhu Nawomi no omukamoona waache o Mowaabhu bharuure mo‑se e Mowaabhu ghugharuka mo‑moghya o Bheserehemu. Eriibhagha riyo mbaare ˆbhaghasëëma ghughësa omunöghö o shayiri.f