Ruutu
Obhukangati
Eghitabhu kino ꞉nkihaabhuru eriina re mukari uno are arabherekeru Ruutu, naare omooto o Mowaabhu. Abhamowaabhu mbaare bhatiine na Abhiisiraeri. Nekorighibhu kubha, kwo riibhagha riyo mbaare no obhoghwani bhumangi mo‑chaase chiyo ibhere. Eghitabhu kino nkeenyi na amangʼana ghano ꞉ghaköruru korwera eriibhagha rino abhakangati bha riihë ꞉bhaare bharakangata Abhiisiraeri (mo‑meeka ghe 1,375–1,050 eriibhagha Yesu are akeere kwibhoru). Kwo riibhagha riyo ase e Abhiisiraeri neere ekeere ghusëëma ghukangatu na abhatëmi. Abhakangati mbaare abhaato bhano ꞉bhaare bhaahwiru no Omutëmi Waryobha, ghukangata Abhiisiraeri kurööna eriihë. Wiiki mbaare bharatena ebhiina bhyaru kwo Bhiisiraeri (mööhi Eghitabhu ke Bhakangati 2:10‑19).
Ameeghi amakoro ghano tokwegha mo‑ghitabhu kino n‑kubha, orubhango ro Ryobha n‑kwo abhaato bha chaase choose. Omutëmi Waryobha akamwitabheri Ruutu na komuköra kubha omwibhori o mumbërë mo‑rwibhoro ro mutëmi. Mo‑rwibhoro ruyo nimu arweriire omutëmi Tawuti, akamara Yesu Kirisito woose akarwera‑mu. Mo‑ghitabhu kino, obhuhörëëru na asooko e Ruutu, mo‑rwibhoro ro mosubhe waache mbumanyëkiine. Wiiki no obhuchömu bho ghareeya e Mutëmi Waryobha, kobhatugha abhaato bhaache kwo riibhagha re nyaako, akabha arabhaha changuru bhano ꞉bhaare bharanyaakibhu.