Koryeku kwo Yakobho
50
Niho Yusubhu akiirëkëra mwihundughu ri ishe, akamorerera na komutahata. 2 Akamara, Yusubhu akabhabhoorera abhaghabho bhaache kubha, bhawuhake omote omobhere wi ishe otabhusha. Bhoose bhaghaköra kinya abhughiri, 3 bhakahaka erihundughu omote, gho chaasiko miröngö ene, gho kubha nicho cheere chërëëndëru. Abhamiisiri bhakamwihiinyërëra Yakobho gho chaasiko miröngö mohungate.4 Hano chaasiko che komorerera chesiriri, Yusubhu akabhabhoorera abhaato bha bhukangati bho Bharaawo akabhugha, “Aribha niishereriiru ambërë yaanyu, ˆnekabhasasaama mosiikërë na Bharaawo ighoro yaane. Momobhoorere taata nandiishiri ariingʼa akabhugha, 5 ‘Eni haghuhe neenyi ghoku. Nokwëndëru ondyeke mo‑mbeehera yaane, ino nitukiire mo‑se e Kanaani.’ Mbe, neghoghusabha onyisherereri neghi nemoryeke taata, ndamara neghugharuka.”
6 Bharaawo aghagharokeri akabhugha, “Nooghi omoryeke iso, kinya are akoriishiri ariingʼa.”
7 Niho, Yusubhu aghaye koryeka ishe. Aghaye haghirohamu na abhatamishi bhaaru bha Bharaawo. Abhatamishi bhayo n‑abhagharuka bha mo‑ka yaache na bha se yoose e Miisiri. 8 Yusubhu akiimoki abhaato bha mo‑ka yaache, na bhaömööbhö, haghirohamu na abhaato bha mo‑ka yi ishe. Abhaana na chaatugho, nibhyo bhisaaghiri Ghosheeni. 9 Hano aghiire, ꞉naahiniine ne erikinda ikoro chwee re bhaato, abhatiiri bha chabharaasi, na chamontoka chino che korutu na chabharaasi.
10 Hano bhahikiri Atati mo‑robhooka ro kohoorera ebhiinyakurë, amwambuko e rooche ro Yorotaani, bhoose bhaakabha bharamorerera Yakobho kwo bhororo chwee. Hayo Yusubhu woose akihiinyërëra ishe gho chaasiko mohungate. 11 Abhakanaani bhano ꞉bhaare bhamanyiri hayo, hano bharooche okwihiinyërëra kuure koore koraköru mo‑robhooka ro kohoorera ro Atati bhakabhugha, “Okwihiinyërëra kwo Bhamiisiri kuno n‑ghokoro chwee!” Niho ahaghiro hayo bhakaharoka Abheeri‑Miisiri,a hano haanyi amwambuko e Yorotaani.
12 Gho ghayo, abhaana bha Yakobho bhakamukörëra ishe waabho kinya are abharagheriiri. 13 Bhakahira erihundughu reeche mo‑se e Kanaani, bhaaghaye koreryeka mo‑koobho ino ere mo‑moghondo o Makibheera, haghuhe na Maamure. Omoghondo uyo, Abhurahamu ꞉naawoghoriri kwo Ebhurooni, Omohiti, kubha habhe ahaghiro ha koryeka abhaato bhaache.
14 Hano Yusubhu amariri koryeka ishe, aghagharuka Miisiri haghirohamu na bhaömööbhö, na abhaato abhande bhoose bhano bhamuhërëkëriire koryeka ishe.
Yusubhu ˆakabharigheri changori bhaömööbhö
15 Hano bhaömööbhö Yusubhu bharooche kubha ishe waabho ˆaghaku, bhaghaghambana kubha, “Nibhu ekubha, hamwabhe Yusubhu naakubha atukarariire, na kwënda korehani asiire kwo mabhe ghano tomuköriire?”
16 Niho bhakamotomera Yusubhu amangʼana, bhakabhugha, “Hano iso are akeere ghoku, ꞉naaraghëriiri kubha, 17 ‘Momobhoorere Yusubhu kubha, neghoghusabha obhaabhërë bhaömöönyu kwo mabhe na amasari ghoose ghano bhaghuköriire.’ Ibheere ntoghusabha otwabhërë abhatamishi bha Ryobha ri iso.” Hano amangʼana ghayo ghamohikiire Yusubhu, akarera.
18 Bhakamara bhaömööbhö bhakamutambana, bhakamoghwera mo‑maghoro, bhakabhugha, “Mööhi, itu n‑abhatamishi bhaacho toonyi!”
19 Yusubhu akabhagharokeri akabhugha, “Tiyaanyi bhamura, motantiina. Eni nteenyi Eryobha re kobhatenera ekiina. 20 Nangabha inyu mwendiri ghunkörëra amabhe, amare Eryobha ndeere rërëënda ghaköru amachömu, gho kubha ndiköriri hangʼu, ghotoori abhaato bhaaru kinya mokorighi reero. 21 Mbe, motatiina! Eni neekubha nerabhaha ebhiinyakurë haghirohamu na abhaana bhaanyu.” Niho, aghasiikëra nabho kwo bhuchömu akabhaghambisani, bhaghasiighasiigha.
Oroko ro Yusubhu
22 Niho, Yusubhu akëëndërëra ghwikara na bhaömööbhö, na abhahiiri bhi ishe mo‑se e Miisiri. Iwe aghiikara emeeka eriighana rimu ni ikomi. 23 Yusubhu ꞉niitabhiiru gho korighi abhaana bha Ebhurayimu koru no orwibhoro rooche ro ghatato. Wiiki, akarighi abhaana bha moochokoro waache Maakiri, omoona o Manase.
24 Niho wiiki Yusubhu akabhabhoorera bhaömööbhö akabhugha, “Eni ibheere haghuhe neenyi ghoku. Amare, m‑mahëënë Eryobha ndekuucha kobhasakeri gho kobharuusi mo‑se ino, na kobhahira mo‑se ino rebharaheriiri Abhurahamu, na Isaka na Yakobho.” 25 Niho Yusubhu akabhariishi ariingʼa abhaana bha Isiraeri akabhugha, “Mahëënë Eryobha ndekobhatoori, na niinyu motasinya ghuye awiito na amaghuha ghaane.”
26 Mbe, Yusubhu aghaku anyi ne emeeka eriighana rimu ni ikomi. Ne erihundughu reeche, bhakarihaka omote, kubha retabhusha. Bhakaretoora mwisandëkö iyo Miisiri.