Yakobho ˆakabhiitabheri abhabhureni bhaache
49
Niho, Yakobho akabhabherekera abhaana bhaache, akabhugha, “Inyu bhoose mwikomane, nebhabhoorere ghano ghakobhabhöna mo‑chaasiko chino chekuucha.2 Mwikomane muntëghëërërë, inyu abhaana bha Yakobho,
muntëghëërërë eni Isiraeri, iso waanyu.
3 Rubheeni, iye niiye omutange waane,
changuru cheene ne riikorobhese reene e rimbërë mo‑bhobhureni bhoone.
Iye nobhakeriri bhaömöönyu bhoose kwo bhokoro na changuru.
4 Iye n‑omosireekereri, n‑kinya amanche ghano ghahataara koru mo‑rooche.
Amare tookubha no obhokoro wiiki,
gho kubha nuköriri kobhe ghotiira mo‑bhorere bhoone, eni iso
na komisi no omukari waane.a
5 Simiyooni na Raawi atëëmö yaabho n‑imu,
ebhiröönërö bheebho m‑bhihaari kwo riihë.
6 Amare eni nteekubha haghirohamu nabho gho korwacha koobho,
koru mo‑bhiina bheebho nteekubha nerasöha‑mu,
gho kubha kwo bhukarari bhoobho,
꞉mbasirekeriiri abhaato,
na kwo bhotiriighanu bhoobho,
꞉mbaanungiri amatimba gha changʼömbë.
7 Obhukarari bhoobho bhwihiimu, gho kubha m‑bhuhaari chwee,
no obhukarari bhoobho bhotaanyi na changori.
Nekobhasanchi mo‑se e Yakobho
na kobhasanchi mo‑Bhiisiraeri.
8 Iye Yuuta! Bhaömöönyu mbaghoghongi,
okubhökö koocho ngookubha ighoro e bhabhisa bhaacho.
Bhaömöönyu mbaghokobhunera ebheru.
9 Moona waane, iye Yuuta n‑kinya omoona o ka
uno amariri kurë atyenyi na ghutanura.
N‑kinya aka ino eghochobha na kwiraari haase,
kinya aka ankari, n‑niwe aghotora ghusaki koyebhooki?
10 Ahimbo e bhutëmi teekoru o‑Yuuta,
na ahimbo e bhukangati neghusaagha mo‑ritöngö reeche,
mbagha eriibhagha akuucha omukangati,
uno chaase choose chekomosooka.
11 Nakubhöha atikere yaache mo‑musabhiibhu,
no omoona o tikere yaache,
na komubhöha mo‑rusa runo rusöngiri bhoheene ro musabhiibhu.
Nakohura changibho cheeche kwo divaayi,
na amaghööti ghaache mo‑divaayi ambararatu.
12 Amiisho ghaache ngaakubha mabhararatu gho ghiri e divaayi.
Na miino ghaache ngaakubha meero gho ghiri e mabhëërë.b
13 Sabhurooni nakumanya rubhareka ro nyancha,
ahaghiro hayo, haakubha ahaghiro ha kwimeererera chameeri,
no orobhebhe rooche ndookubha rwatiine na ase e Sitooni.
14 Isakaari n‑kinya atikere e changuru,
ino ekwiraari ghate e merigho gheeche.
15 Nakorighi kubha, ahaghiro ha koweerera n‑hachömu,
na kubha n‑ase e ghotegheri,
akahiinya eriibhegha reeche ghughëgha omorigho,
naakubha omusësë o ghuköra emeremo ghe changuru.
16 Taani naakubha omoteni o bhiina bhe bhaato bhaache,
kinya umu o matöngö gha Isiraeri.
17 Taani uyo naakubha kinya anchöka e bhosongo ino enyi rubhareka ro nchëra,
ino ekoroma ebhetingiro bhe chabharaasi,
koru uno akubha atiiriri mo‑bharaasi agho ghigharamiri.
18 Oo Omutëmi Waryobha, neghughanya obhotoori bhoocho.
19 Ghaati nakuröönu ne erikinda re bhiiti,
amare iwe naakobharu anyuma, na kobharööna na kobhahicha.
20 Ase e Asheeri neekubha eraruusi omunöghö mwaru na muchömu chwee.
Iwe naakubha araruusi ebhiinyakurë bhichömu bhino bhekwëndëru mo‑mutëmi.
21 Nabhutaari n‑kinya ambarahe ino enyi mo‑kibhara,
ino ekwibhora abhaana abhachömu.
22 Yusubhu n‑omote o musabhiibhu uno okwibhora,
Omusabhiibhu uno onyi rubhareka ro kerika.
Chaasa cheeche chirandiri mwibhendo.
23 Abharëkëri bha mebhya mbakomurööna.
Mbakomurasa emebhya na komunyaaki chwee.
24 Amare obhuta bhooche mbookubha bhuköngʼu,
na amabhökö ghaache ngakwengeru changuru,
kwo obhotoro bho Ryobha re Yakobho,
kwo riina re mukangati, Eriitare re Isiraeri.
25 Eryobha ri iso ndeghoghotoori,
gho kubha n‑Eryobha re Bhotoro Bhoose ndeghoghwitabheri,
ubhönë orubhango ro mbura koru Mwishaaro,
orubhango ro manche ghano ghaanyi haase,
orubhango ro rwibhoro ro bhaato na chaatugho.
26 Orubhango rwi iso rubhe rokoro ghokera ebheghoro bhe chaasiko choose.
Rokere orubhango ro bheghoro bhe miishe ghyose.
Orubhango ruyo ndookubha ighoro e mutu o Yusubhu,
ighoro e nyancha e mutu waache,
iwe uno anyi omukangati ghate e bhaömööbhö.
27 Bhenchamiini n‑kinya asuuche ihaari,
moomake nahaari bhino abhyemiri,
no omughörööbha nakuhööhi bhino are aghöötiri.”
28 Ghano nigho amatöngö ikomi na abhere gha Isiraeri. Ghayo nigho Yakobho abhabhooriire hano are arabhiitabheri, namoheere omooto woose orubhango runo romurëngʼaaniire.
Oroko ro Yakobho
29 Niho Yakobho akabharaghereri abhaana bhaache gho kobhugha, “Abhaana bhaane, haghuhe neenyi ghoku, na ghughöötana na abhaato bhaane. Mondyeke haghirohamu na bhataata mo‑koobho ino enyi mo‑moghondo o Ebhurooni, Omohiti, 30 mo‑moghondo o Makibheera, haghuhe na Maamure mo‑se e Kanaani. Akööbhö ino Abhurahamu aghoriri koru kwo Ebhurooni kubha abhe araryeka‑mu abhaato bhaache. 31 Mo‑koobho muyo nimu ꞉bharyekiri Abhurahamu no omukari waache Saara, ꞉mbaryekiri Isaka no omukari waache Rebheka, na muyo nimu ꞉nemoryekiri Reeya. 32 Omoghondo na koobho iyo enyi‑mu, ꞉mbeeghoruru koru kwo Bhahiti.”
33 Hano Yakobho amariri kobharaghereri abhaana bhaache, aghagharoki amaghoro ghaache a‑bhorere, aghaku aghaghöötana na abhaato bhaache.