Yakobho ˆakabhiitabheri abhaana bha Yusubhu
48
Hano ghayo ghahetiri, Yusubhu akabhooreru kubha, “Iso m‑bhabharu.” Niho, akiimoki abhaana bhaache bhabhere, Manase na Ebhurayimu, aghaye haghirohamu nabho.2 Hano bhahikiri, Yakobho akabhooreru kubha, “Yusubhu omoona waacho niichiri ghokorighi,” Yakobho aghiiköngʼi, akabhooka aghiikara a‑bhorere.
3 Yakobho akamobhoorera Yusubhu akabhugha, “Eryobha re Bhotoro Bhoose ꞉ndendweriire hano neere Ruusu, mo‑se e Kanaani, rekanyitabheri. 4 Rekamboorera rekabhugha, ‘Mööhi, neghoghuköra ubhe no orwibhoro na nekorwengera mbagha rubhe amatöngö makoro. Orwibhoro roocho, ndoghughabha ase ino emiishe ghyose!’
5 “Ibheere abhaana bhaacho bhano bhabhere bhibhoriiru Miisiri nkeere kuucha, mbakubharu kubha m‑bhabhaane. Ebhurayimu na Manase, mbaakubha bhabhaane kinya Rubheeni na Simiyooni. 6 Amare abhande bhano okwibhora kwo riibhagha erende, bhayo mbakubharu kubha m‑bhabhaacho. Mbe, mbaghughabha ase, ino Ebhurayimu na Manase bhaghughabha.
7 “Hano niichiri koru Bhataani‑Araamu, neghaghöötu na changori, gho kubha nyako waanyu Raheeri ꞉naakweriire mo‑nchëra, mo‑se e Kanaani. Kwo riibhagha riyo, ntoore haghuhe na Ebhuraati. Niho, nekamoryeka rubhareka ro nchëra e ghuye Ebhuraati.” Reero nokobherekeru Bheserehemu.
8 Hano Yakobho abharooche abhaana bha Yusubhu, akabhoori, “Bhano m‑bhawe?”
9 Yusubhu akamugharokeri ishe akabhugha, “Taata, bhano n‑abhaana bhaane, bhano Eryobha reheere hano Miisiri.”
Yakobhoa akabhugha, “Bhasuke hano, nekwënda kobhiitabheri.”
10 Amiisho gha Yakobho ghataare ghararighi bhoheene gho ghiri e bhugharuka. Mbe, Yusubhu aghasuka abhaana bhaache ghwi ishe, akamara Yakobho akabhaghööta gho kobhatahata.
11 Yakobho akamobhoorera Yusubhu akabhugha, “Omoona waane, ntimënyiri aribha neghokorighi obhosho bhoocho wiiki, amare ibheere Eryobha ndimariri kuuha omweya na rekanyëërëki na abhaana bhaacho.”
12 Akamara, Yusubhu akabharuusi abhaana bhaache koru mo‑maghoro gha Yakobho ishekoro waabho, akiihiinya mbagha haase gho sooko. 13 Yusubhu akabhiimoki wiiki abhaana bhaache bhayo bhabhere, akamotoora Ebhurayimu mo‑kubhökö kooche gho kwiro, na mo‑kubhökö gho kumosi kwo Yakobho. Na Manase akamotoora mo‑kubhökö gho kumosi, na mo‑kubhökö gho kwiro kwo Yakobho. Akabhasuka ghwi ishekoro. 14 Amare Yakobho akaheteerani amabhökö ghaache. Okubhökö gho kwiro, aghaghotoora mo‑mutu o Ebhurayimu, na niwe are omonyi. No okubhökö gho kumosi, aghaghotoora mo‑mutu o Manase, na niwe are o mumbërë gho kwibhoru.
15 Niho akamwitabheri Yusubhu, arabhugha,
“Eryobha rino bhataata bhaane Abhurahamu na Isaka ꞉bhaare bhararesooka,
Eryobha rino reere omochongi o bhuhöru bhoone mbagha reero,
16 Marayika uno antooriri kwo mabhe ghoose,
abhiitabheri abhabhureni bhano.
Na bharoku kwo riina reene na kwo mariina gha bhataata bhaane, Abhurahamu na Isaka.
Eryobha rebhakörë bhaghashe bhabhe bhaaru mo‑se.”
17 Yusubhu hano arooche ishe aratoora okubhökö kooche gho kwiro mo‑mutu o Ebhurayimu, tachömiiru. Aghasaki ghokoruusi okubhökö ghwi ishe mo‑mutu o Ebhurayimu, kubha aghotoore kwo Manase. 18 Akamobhoorera ishe akabhugha, “Taata, otaköra hangʼu, uno hano niwe omoona waane o mumbërë. Mbe, neghoghusasaama, otoore okubhökö koocho gho kwiro mo‑mutu waache.”
19 Amare ishe akaanga, akabhugha, “Nyeeche, omoona waane, abhaana bha Manase nabho, mbaakubha eritöngö ikoro, iwe woose naakubha mokoro. Amare omonyi waache naakubha omokoro komokera. No orwibhoro rooche, iro ndookubha amatöngö maaru.” 20 Orosiko ruyo, Yakobho akabhiitabheri arabhugha,
“Abhaato bha Isiraeri mbaakubha bhariitabheri abhaato kwo mariina ghaanyu,
bharabhugha, ‘Eryobha rebhakörë kinya Ebhurayimu na Manase, gho kobhiitabhereri orubhango.’”
Hangʼu nibhu Yakobho amukangatiri Ebhurayimu ambërë e Manase.
21 Akamara, Yakobho akamobhoorera Yusubhu akabhugha, “Oo omoona waane, mööhi, ibheere ˆneghatingʼi ghoku. Amare, Eryobha ndeekubha haghirohamu na niinyu, na ndekobhagharoki wiiki mo‑se e bhiiso. 22 Ibheere eni, ˆneghakuhööhi ahööhi ghokera bhaömöönyu. ˆNeghakuhööhi ase ino neruusiri Abhaamoori kwo mohyo na kwo bhuta bhoone.”b