Yakobho ˆakamwitabheri Bharaawo
47
Niho Yusubhu aghaye komobhoorera Bharaawo kubha, “Taata na abhahiiri bhaane, mbiichiri koru mo‑se e Kanaani haghirohamu na changʼömbë, na changʼöndu, na chambori ne ebheghiro bheebho bhyose, ibheere n‑Ghosheeni bhaanyi.” 2 Eriibhagha riyo Yusubhu ꞉niimokiri bhaömööbhö bhataano, akabhahira o‑Bharaawo bhaghi kumënyana.3 Bharaawo akabhabhoori bhaömööbhö bhayo akabhugha, “M‑moremo ke mohaaköra?”
Nabho bhakamugharokeri bhakabhugha, “Omutëmi wiito, itu n‑abhatamishi bhaacho toonyi! Emeremo ghiito n‑koriishi chaatugho, kinya bhataata ꞉bhaare ghuköra.” 4 Wiiki bhakamobhoorera Bharaawo bhakabhugha, “Ntwichiri ghwikara hano kwo riibhagha, gho kubha aghëëcha n‑ihaari chwee mo‑se e Kanaani, na bhetaanyi‑ho koru ebhiinyakurë bhe chaatugho chiito. Mbe, omutëmi wiito, abhatamishi bhaacho ntoghoghusasaama, otwisherereri twikara Ghosheeni.”
5 Niho Bharaawo akamobhoorera Yusubhu akabhugha, “Iso na bhaömöönyu mbiichiri ino Miisiri ghokoocho. 6 Ase yoose e Miisiri mo‑mabhökö ghaacho enyi, obhahë iso na abhahiiri bhaacho ahaghiro ahachömu ghokera hoose ha mo‑se ino. Obhatighe bhiikare Ghosheeni. Wiiki aribha weeche abhaato abhasubhesubhe ghate yaabho, obhaahure bhabhe abhiimeerereri bha chaatugho cheene.”
7 Akamara Yusubhu akamohira ishe aghi komukëëri Bharaawo. Hano ahikiri, Yakobho akamwitabheri Bharaawo.
8 Bharaawo akamobhoori akabhugha, “Noonyi ne emeeka hangʼana hayi?”
9 Yakobho akamugharokeri akabhugha, “Neenyi ne emeeka eriighana rimu na miröngö etato. Wiiki ngibheere ghe ghusaamasaama, emeeka ghiyo mesuuhu na ghe nyaako, koru ghetaakohikera emeeka ghe bhataata.” 10 Niho Yakobho akamwitabheri Bharaawo, akamara akaru ambërë yaache, aghaye.
11 Niho, Yusubhu akabhaha ishe na bhaömööbhö ahaghiro ahachömu chwee ha Rameseesi mo‑se e Miisiri, habhe niho ahaghiro haabho, kinya Bharaawo abhooriire Yusubhu. 12 Yusubhu akamuha ishe ebhiinyakurë, haghirohamu na bhaömööbhö, na abhaato bhoose bha mo‑ka yi ishe, gho kurëngʼaana no obhwaru bho bhaana bhaabho.
Yusubhu ˆaghatoori abhaato mo‑ghëëcha
13 Kwo riibhagha riyo ebhiinyakurë ꞉mbeebhoriri mo‑se yoose e Miisiri, aghëëcha ëkëëndërëra kunyaaki abhaato bha Miisiri na bha Kanaani chwee. 14 Yusubhu aghakoma chambiiri choose che bhaato bha Miisiri na Kanaani chino bhaghoriri ebhiinyakurë, na ghochirëëta mo‑nyumba e Bharaawo.
15 Hano chambiiri che bhaato bha Miisiri na Kanaani chesiriri, Abhamiisiri bhoose bhakamutambana Yusubhu na komobhoorera bharabhugha, “Chambiiri chiito ˆcheghasira. Gho ghayo, nootuhe ebhiinyakurë! Ngwake toku ambërë e miisho ghaacho?”
16 Hayo akabhabhoorera akabhugha, “Aribha chambiiri cheenyu ˆcheghasira, mundëëtërë chaatugho cheenyu, kubha nebhahë ebhiinyakurë.” 17 Niho, bhakamurëëtëra Yusubhu chaatugho cheebho, ncheere chabharaasi, na changʼömbë, na changʼöndu, na chambërëtë na chaatikere. Kwo mooka uyo, Yusubhu akabha arabhaha ebhiinyakurë gho ghokerani na chaatugho cheebho.
18 Omooka uno uröbhiire, bhakaacha wiiki na komobhoorera, “Omutëmi, obhuhëënë n‑kubha, chambiiri chiito choose nchesiriri, na chaatugho chiito ˆcheghasira n‑checheecho. Ibheere ghetaanyi‑ho gheghiro kino ghisaaghiri kino toghokuha, nanyinga kino ghisaaghiri n‑emebhere ne emeghondo ghiito. 19 Ngwake toku ambërë yaacho, ntoghotigha emeghondo ghiito? Notoghore itu haghirohamu ne emeghondo ghiito kubha tubhönë ambusuro. Itu ntookubha abhasësë bha Bharaawo ne emeghondo ghiito aghëghë. Otuhë itu ambusuro totaacha ghoku na anchëra, emeghondo ghiito ghetaacha ghusaagha ghetaanyi ne egheghiro.”
20 Niho Yusubhu akamoghorera Bharaawo ase yoose e Miisiri. Kira Omomiisiri ꞉naaghoriri omoghondo waache gho kubha aghëëcha neere ihaari. Ase yoose ekabha e Bharaawo. 21 Yusubhu akabhaköra abhaato bhoose kubha abhasësë, korwera orubhaara rumu ro Miisiri, ghutabhura chambaara choose che se iyo.
22 Yusubhu taaghoriri ase ino ere e bhachaama, gho kubha ibho mbaare bharabhöna ahööhi yaabho koru kwo Bharaawo. Ibho mbaare ne ebhiinyakurë bhe ghwisha. Kiyo nikyo ꞉ghiighëriri ibho bhatayeghori ase yaabho.
23 Yusubhu akabhabhoorera abhaato akabhugha, “Gho kubha reero nebhaghoriri inyu haghirohamu ne emeghondo gheenyu kubha obhwame bho Bharaawo, muhaabhu chambusuro mughëndë kwemi mo‑meghondo ghiyo. 24 Amare, moraacha ghughësa, momuhë Bharaawo imu ghwi ishaano. Ne eribhaara re kane rino reghusaagha ndeekubha chambusuro ne ebhiinyakurë bheenyu, na bhe bhahiiri bhaanyu na abhaana bhaanyu.”
25 Bhakamobhoorera bhakabhugha, “Oo omutëmi wiito, ˆoghatotoori obhuhöru bhwito, notwërëkiri aghareeya yaacho, korwera ibheere ntookubha abhasësë bha Bharaawo.”
26 Hangʼu nibhu Yusubhu atooriri omoghiro mo‑se e Miisiri, kubha Omomiisiri wowoose nakwëndëru imoki imu ghwi ishaano e munöghö waache amuhë Bharaawo. Omoghiro uyo noghuköra emeremo mbagha reero. Ase e bhachaama ayeene niyo etaare e Bharaawo.
Yakobho ˆaghaköra eriiraghano na Yusubhu
27 Abhiisiraeri ꞉mbiikeere Ghosheeni, mo‑se e Miisiri. Hano bhaare iyo, bhakabhöna ebheghiro bhyaru, na bhakiibhora bhakaaruha chwee. 28 Yakobho aghiikara mo‑se e Miisiri emeeka ikomi na mohungate. Emeeka gheeche ghyose ghe bhuhöru bhooche, ngeere eriighana rimu na miröngö ene na mohungate.
29 Hano eriibhagha re ghoku kwo Yakobho retingʼiri, akabherekera omoona waache Yusubhu, akamobhoorera akabhugha, “Aribha hëënë nonsiighiri, neghoghusasaama otoore okubhökö koocho haase e ritango reene, na undahereri kubha tokondyeka mo‑se e Miisiri. Neghoghusabha chwee! Unkörërë angʼana ino kwo bhuchömu na kwo bhuhëënë! 30 Hano neeghoku, na ghughöötana haghirohamu na bhasookoro bhaane, onyiimoki koru Miisiri, oghi ondyeke hano bharyekuru.”
Yusubhu akabhugha, “Neghuköra kinya obhughiri.”
31 Yakobho akamobhoorera akabhugha, “Undahereri!” Niho Yusubhu akamurahereri. Akamara Yakobho akahiinya omutu, aghasighamera omosighamero o mo‑bhorere bhooche aghasëngëra Eryobha.