Yakobho ˆaghaye Miisiri
46
Niho, Yakobho aghasëëma orughëndö ro ghuye Miisiri haghirohamu na abhaato bhaache ne ebheghiro bheeche bhyose. Hano ahikiri Bheeri‑Sheebha, akaruusi amaruusi kwo Ryobha re Isaka, ishe waache. 2 Hano obhotiko bhusöhiri, Eryobha rekamobherekera Yakobho mo‑marighi, “Yakobho, Yakobho!”Aghiitabha, “Hano neenyi.”
3 Eryobha rekamobhoorera rekabhugha, “Eni neeni Eryobha, Eryobha ri iso waacho. Otatiina ghuye Miisiri, gho kubha orabha iyo eni neghoghuköra ubhe eritöngö ikoro. 4 Eni neeghuye haghirohamu na niiye Miisiri, ndamara eni mwene neghoghugharoki Kanaani. Oraacha ghoku, Yusubhu niwe aghokohiinya amiisho ghaacho.”
5 Niho Yakobho aghatanura koru Bheeri‑Sheebha. Abhaana bhaache bhakamwimoki iwe na abhaana bhaabho abhasuuhu, haghirohamu na abhakari bhaabho, bhakabhatiiri mo‑chamontoka chino Bharaawo atomiini kubha bhamughëghërë‑mu. 6 Bhakiimoki chaatugho ne ebheghiro ebhende bhyose, bhino ꞉bhaare nabhyo Kanaani, bhaghasaamera Miisiri, 7 Yakobho na abhaana bhaache, na abhaachokoro bhaache bha ghikari na bha ghesubhe, no orwibhoro rooche roose.
Orwibhoro ro Yakobho
8 Amariina gha bhaana bha Yakobho bhano ibhwire na Reeya, bhano bhaghiire Miisiri nigho ghano. Rubheeni niwe omutange waache.
9 Abhaana bha Rubheeni nibho bhano, Hanooki, na Bhaaru, na Hesirooni na Karimi.
10 Abhaana bha Simiyooni nibho bhano, Yemuweeri, na Yamini, na Ohaati, na Yakiini, na Sohaari na Shawuri, omoona uno ibhwire no omukari o Bhakanaani.
11 Abhaana bha Raawi nibho bhano, Gherishooni, na Kohaati, na Meraari.
12 Abhaana bha Yuuta nibho bhano, Eri, na Onani, na Sheera, na Bhereesi, na Seera. Amare Eri na Onani ꞉mbakweriire mo‑se e Kanaani. Abhaana bha Bhereesi nibho bhano, Hesirooni na Haamuri.
13 Abhaana bha Isakaari nibho bhano, Toora, na Bhubha, na Yashubhu na Shimurooni.
14 Abhaana bha Sabhurooni nibho bhano, Sereti, na Erooni na Yareeri.
15 Bhano bhoose, nibho abhaana na abhaachokoro bha Yakobho bhano ꞉bhiibhwiru na Reeya, mo‑se e Bhataani‑Araamu, na Tiina omuukë waache woose nibhoriiru iyo. Ekirëngërë ke bhaana na abhaachokoro bhaache bhoose mbaare bharahikera miröngö etato na bhatato.
16 Amariina gha bhaana bha Yakobho bhano ibhwire na Siiribha omutamishi uno Rabhaani amoheere omuukë waache Reeya, nigho ghano.
Abhaana bha Ghaati nibho bhano, Sebhooni, na Haaghi, na Shuuni, na Esibhooni, na Eri, na Arooti na Areeri.
17 Abhaana bha Asheeri nibho bhano, Imuna, na Ishibha, na Ishibhi, na Bheeriya, na Seera omuukë waache. Na abhaana bha Bheeriya nibho bhano, Hebheeri na Marikiyeeri.
18 Bhano bhoose, nibho abhaana na abhaachokoro bha Yakobho bhano ꞉bhiibhwiru na Siiribha, omutamishi uno Rabhaani amoheere omuukë waache Reeya. Ekirëngërë ke bhaana na abhaachokoro bhaache bhoose mbaare bharahikera ikomi na bhasaasabhe.
19 Amariina gha bhaana bha Yakobho bhano ibhwire na Raheeri mukaache nigho ghano, Yusubhu na Bhenchamiini. 20 Abhaana bha Yusubhu bhano ibhwire mo‑se e Miisiri nibho bhano, Manase na Ebhurayimu. Abhabhureni bhayo, ꞉mbibhwiru na Asenaati, omuukë o Bhotibheera, Omuchaama o mo‑moghya o Oni.
21 Abhaana bha Bhenchamiini nibho bhano, Bheera, na Bhekeeri, na Ashibheeri, na Gheera, na Namaani, na Ehi, na Rooshi, na Mubhimu, na Hubhimu na Ariti.
22 Bhano bhoose, nibho abhaana na abhaachokoro bhano Yakobho ibhwire kwo Raheeri, ekirëngërë keebho nkeere ikomi na bhane.
23 Amariina gha bhaana bha Yakobho bhano ibhwire na Bhiiriha nigho ghano.
Omoona o Taani naare Hushiimu.
24 Abhaana bha Nabhutaari nibho bhano, Yaseeri, na Ghuuni, na Yeseeri na Shiremu.
25 Bhano bhoose nibho abhaana bha Yakobho bhano ibhwire na Bhiiriha, omutamishi uno Rabhaani amoheere omuukë waache Raheeri, ekirëngërë keebho mbaare mohungate.
26 Orwibhoro roose runo Yakobho asaamiri naro ghuye mo‑se e Miisiri, ghotigha abhakari bhaabho mbaare abhaato miröngö esaasabhe na bhasaasabhe. 27 Iyo Miisiri, Yusubhu naare ibhwire abhabhureni bhabhere. Mbe, Yakobho na abhaato bhaache bhano bhasöhiri Miisiri, oreengera no orwibhoro ro Yusubhu, ꞉mbaahikiire abhaato miröngö mohungate.
Yakobho ˆakahika Miisiri
28 Hano bhatingʼiri, Yakobho akamotoma Yuuta kwo Yusubhu, aghi ghosiikëra nawe kubha amwërëki anchëra e ghuye Ghosheeni. Hano Yakobho na abhahiiri bhaache bhahikiri Ghosheeni, 29 Yusubhu aghasëëmi amöntöka yaache ino ekorutu na chabharaasi, aghaye iyo Ghosheeni, kubha aghi bharighani ni ishe. Hano ahikiri na akamorighi ishe, akamutahata. Akamara eriibhagha irë ino aramutahata ishe na korera.
30 Niho, Yakobho akamobhoorera Yusubhu akabhugha, “Koru neraku ibheere m‑bhoheene, gho kubha nimariri ghokorighi obhosho bhoocho kubha muhöru okeere.”
31 Niho, Yusubhu akabhabhoorera bhaömööbhö, haghirohamu na abhande bhoose bha mo‑nyumba yi ishe akabhugha, “ˆNeeghaye komobhoorera Bharaawo kubha ˆmokamara koru mo‑se e Kanaani, mwichiri ghokoone. 32 Nekomobhoorera kubha bhano n‑abhariishi bha chaatugho, na mbiichiri na chambërëtë, na changʼöndu, na changʼömbë ne ebheghiro bheebho bhyose.
33 “Hano Bharaawo akobhabherekera na kobhabhoori, ‘M‑moremo ke mohaaköra?’ 34 momugharokeri gho kobhugha, ‘Oo omutëmi wiito, itu n‑abhatamishi bhaacho, koru bhoona bhwito mbagha ibheere, emeremo ghiito n‑koriishi chaatugho kinya bhataata bhiito ꞉bhaare ghuköra.’ Niho akobhiisherereri mwikare hano Ghosheeni, gho kubha Abhamiisiri m‑moghiro ghwikarana no omoriishi wowoose o chaatugho.”