Yusubhu ˆakiibhoora ambërë e bhaömööbhö
45
Hayo Yusubhu aghakeyu kwihööchërëra ambërë e bhatamishi bhaache, aghakuura kwo riiraka akabhugha, “Mohoroke anche!” Gho ghayo, aghasaagha omwene na bhaömööbhö, hano aghiire kwibhoora ghokoobho. 2 Yusubhu akarera kwo riiraka ikoro, reghaghëri Abhamiisiri bhakamooghu. Amangʼana ghayo ghakamënyu na abhaato bhoose bha mo‑nyumba e Bharaawo.3 Yusubhu akabhabhoorera bhaömööbhö akabhugha, “Eni neeni Yusubhu, kana taata muhöru akeere?” Bhaömööbhö bhataatoriri ghugharokeri, gho kubha ꞉mbaghööturu na ahaho.
4 Niho Yusubhu akabhabhoorera wiiki akabhugha, “Monyishukerere haghuhe!” Hano bhiishukiri, akabhabhoorera akabhugha, “Eni neeni Yusubhu omonyi waanyu, uno momoghoriri akahiru Miisiri. 5 Amare ibheere, motiitumata gho kobhugha ango ngwake mongoriri! Inyu motiitumata, gho kubha Eryobha eryene niryo riighëriri mongori, nebhakangate hano, kubha niiche netoori obhuhöru bho bhaato.
6 “Ibheere uno n‑omooka o kabhere o gheecha mo‑se, na ngekeere emeeka eghende etaano ghino abhaato bhataaghotora korema koru ghughësa. 7 Eryobha eryene niryo rinkangatiri ino, kubha nebhatindekere ebhiinyakurë mo‑se ino, na kobhatoori mo‑nyaako e gheecha. 8 Mbe, taanyi inyu ꞉mundëëtiri ino, amare n‑Eryobha. Ndinköriri kubha kinya ishe Bharaawo, omontomonkoro o bhaato bha mo‑nyumba yaache, no omukangati o se yoose e Miisiri.
9 “Mbe, mukörë bhwango! Mughëndë gho taata na momobhoorere, ‘Yusubhu omobhureni waacho nabhughiri, Eryobha ndimariri ghontoora nibhe omukangati o se yoose e Miisiri. Otakeechera kuucha ghokoone. 10 Iye nookubha haghuhe na neeni, nokumanya mo‑se e Ghosheeni, iye haghirohamu na abhaana bhaacho, na abhaachokoro bhaacho, ne ebheghiro bheecho bhyose na chaatugho cheecho choose. 11 Hano mookubha Ghosheeni neghoghotugha iye, na abhaato bhaacho, na chaatugho na nekobhatoori motaacha ghoku na aghëëcha, gho kubha ngekeere emeeka etaano eghende ghe gheecha.’”
12 Yusubhu akabhabhoorera wiiki akabhugha, “Inyu bheene mwirochiire kwo miisho ghaanyu, koru omwito Bhenchamiini woose, narooche kwo miisho ghaache kubha n‑eni mwene uno neghosiikëra na niinyu. 13 Mughëndë momobhoorere taata eni neenyi no obhotoro, neenyi no omweya mokoro mo‑se yoose e Miisiri, na mobhughe ghoose ghano morooche. Moramara momurëëtë taata bhwango!”
14 Niho Yusubhu akamutahata omonyi waache Bhenchamiini mwighöti, bhombe bhabhere bhaghasëëma korera ino bhatahatiine. 15 Akamara, Yusubhu aghasëëma kobhatahata bhaömööbhö abhande bhoose ino ararera. ꞉Bhaachekumara ghayo, niho bhaömööbhö bhaghasëëma ghosiikëra nawe.
Bharaawo ˆakamuraghani Yakobho kuucha Miisiri
16 Hano amangʼana ghahikiri mo‑nyumba e bhutëmi bho Bharaawo, kubha bhaömööbhö Yusubhu mbiichiri, Bharaawo na abhakangati bhaache bhoose bhaghachömëru chwee.
17 Niho, omutëmi Bharaawo akamobhoorera Yusubhu akabhugha, “Obhabhoorere bhaömöönyu, ‘Mughëghi chaatikere cheenyu emerigho ghe bhiinyakurë, mugharuke mo‑se e Kanaani. 18 Mughëndë momurëëtë iso waanyu, haghirohamu na bhaömöönyu bhoose. Nekobhaha ahaghiro hachömu chwee mo‑se e Miisiri, na moghuchömëru chwee gho ghiri e bhonoru bho riiröbhë rino.’”
19 Bharaawo akamobhoorera Yusubhu wiiki akabhugha, “Nokwëndëru kobhabhoorera kubha, ‘Mwimoki chamontoka che korutu na chabharaasi koru Miisiri chebhaghëghë abhakari bhaanyu, na abhaana bhaanyu, na motasinya komwimoki iso waanyu na komurëëta. 20 Motatereera ighoro e bheghiro bheenyu, gho kubha amachömu ghoose gha Miisiri ngaakubha ghaghaanyu.’”
21 Mbe, abhaana bha Yakobho bhaghaköra kinya bhabhooriiru. Yusubhu akabhaha chamontoka che korutu kinya bhuure omutëmi are araghëriiri, akabhaha ne ebhiinyakurë bhe kurë mo‑nchëra. 22 Omooto woose akahaabhu amaghööti amahë. Amare Bhenchamiini iwe, akahaabhu ebheteneka bhe chambiiri amaghana atatoa na changibho amanga ataano che ghokerani. 23 Wiiki akamohirera ishe chaatuho gho ghiri e rughëndö rooche. Akamohirera ishe chaatuho che chaatikere ikomi chino chighëghiri ebheghiro bhichömu bhe Miisiri. Wiiki akamohirera chaatikere chankari ikomi chino chighëghiri angano ne emighaate ne ebhiinyakurë ebhende bhemotoori mo‑rughëndö.
24 Niho, Yusubhu akaraghana na bhaömööbhö bhayo, hano bhaare bharatanura, akabhashaangʼi akabhugha, “Motarööna mo‑nchëra!” 25 Mbe, bhaömööbhö bhayo, bhaghatanura koru Miisiri, bhaghagharuka mo‑se yaabho e Kanaani, o‑Yakobho ishe waabho.
26 Hano bhahikiri, bhakamobhoorera ishe waabho bhakabhugha, “Yusubhu akeere muhöru! Iwe niwe omukangati o mo‑se yoose e Miisiri!” Ishe waabho akahagha, taatoriri ghwishereri amangʼana ghaabho. 27 Amare hano bhamobhooriire amangʼana ghoose gha Yusubhu, na hano arooche chamontoka chino atomiiru na Yusubhu che komughëghëra na komohira Miisiri, korwera hayo akörö yaache eghasambaaruka na ghuchömëru chwee. 28 Niho akabhugha, “Neghishereri ibheere kubha omoona waane Yusubhu akeere muhöru. Neeghuye nerighani nawe nekeere ghoku.”