Yusubhu ˆakabhasaki wiiki bhaömööbhö
44
Akamara, Yusubhu akahatëka omwimeerereri o nyumba yaache akabhugha, “Wichori changano mo‑maghönëra gha bhaato bhano, kurëngʼaana na kinya bhaghotora ghughëgha. Wiiki otoore chambiiri che mooto woose, mo‑monu o riighönëra reeche. 2 Mo‑riighönëra re mosuuhu waabho, otoore chambiiri cheeche, ne eghisënchö keene kiire ghiköruru kwo bhikörë bhe chambiiri.” Omwimeerereri uyo, aghaye aghaköra kinya abhooriiru.3 Hano bhookiire, bhaömööbhö Yusubhu bhaghisherereru kubha bhagharuke na chaatikere cheebho. 4 Hano bhaare mo‑rughëndö eriibhagha isuuhu hangʼu koru mo‑moghya uyo, Yusubhu akamobhoorera omwimeerereri wuure akabhugha, “Köra bhwango! Obhatambane abhaato bhaare. Hano okobhabhöna, obhabhoorere, ‘Omokoro wiito nabhaköriire bhoheene! Ngwake ˆmokamukörëra amabhe? 5 Inyu! Eghisënchö keeche kino mwichiri mokiibha, nikyo ahanywera na ghukörëra obhughabho! Momutasiiri chwee gho komukörëra hangʼu.’ ”
6 Hayo omwimeerereri uyo akabhatambana, hano abhabhwine, aghasëëma kobhabhoorera kwo mangʼana ghaare ghaare. 7 Nabho bhakamugharokeri bhakabhugha, “Oo omutëmi wiito! Ngwake okobhugha amangʼana ghanga ghayo? Itu abhatamishi bhaacho totaaghotora ghuköra angʼana enga iyo, koru hasuuhu! 8 Mbe, nokohiita chambiiri chiire tobhwine chibhöhuru mo‑menu ghe maghönëra ghiito? Hano toruure mo‑se e Kanaani, ntoghugharokiiri. Ngwake twibhe chambiiri, hamu asahaabhu, mo‑nyumba e mutëmi wiito? 9 Eghisënchö kiyo, aribha orakibhöna kwo mooto wowoose ghate yiito, hayo hayo omwite! Na niitu, ntookubha abhasësë bhaacho.”
10 Niho omwimeerereri uyo akabhagharokeri akabhugha, “Mbe, ibhe kinya mobhughiri. Ibheere wowoose neramubhöna anyi ne eghisënchö kiyo, uyo niwe akubha omusësë waane. Amare inyu abhande bhoose, motaakubha ne eriisari ryoryose.”
11 Niho, bhoose bhaghaköra bhwango ghwiki amaghönëra ghaabho, na ghoghasaasura. 12 Omutamishi uyo aghasëëma ghutabhara mo‑maghönëra ghoose, korwera kwo mutange waabho, mbagha wuure omonyi. Hano ahikiri mwighönëra re Bhenchamiini, niho eghisënchö kiire ꞉kibhönëkiire. 13 Gho ghayo, bhaghatandura amaghööti ghaabho. Mooto woose, aghatiiri eriighönëra reeche mo‑tikere yaache, bhaghagharuka mo‑moghya.
Yuuta ˆakamwibhatereri Bhenchamiini
14 Hano Yusubhu are akeere aka, Yuuta na bhaömööbhö bhaghagharuka mo‑ka yaache. Hano bhamobhwine, bhakamoghwera mo‑maghoro. 15 Amare, Yusubhu akabhabhoorera akabhugha, “Neke kino muköriri? Moteeche kubha neenyi no obhotoro bho ghuköra obhuraghori?”
16 Yuuta akamugharokeri akabhugha, “Oo omutëmi wiito! Teenyi‑ho angʼana ino tookobhugha ambërë yaacho. Kana Eryobha ndyërëkiri amasari ghiito haheero! Mbe! Itu na uno bhabhwine eghisënchö keecho, bhoose ntookubha abhasësë bhaacho.”
17 Nawe akabhagharokeri akabhugha, “Tiyaanyi! Ntekobhaköra inyu mubhe abhasësë bhaane. Amare uno bhamobhwine ne eghisënchö keene, iwe niwe akubha omusësë waane! Inyu abhande bhoose, mugharuke ghwi iso waanyu kwo murëmbë.”
18 Niho Yuuta akamwishukerera Yusubhu, akamobhoorera akabhugha, “Omutëmi waane! Neghoghusasaama chwee, uhe omweya, nekobhoorere amangʼana masuuhu. Otarighi kobhe, gho kubha iye n‑kinya Bharaawo omwene.
19 “Oo omutëmi! ꞉Notobhooriri kubha, ‘Moonyi ni iso, hamu ömöönyu owonde?’ 20 Toghakobhoorera tokabhugha, ‘Taata akeere muhöru, iwe nakunguhiri chwee, na ntoonyi no omonyi wiito uno ibhwiru na taata eriibhagha re bhugharuka bhooche. Omonyi wiito uyo, naare no omokoro waache uno ꞉bhiibhwiru anda imu. Amare, omokoro waache uyo, ꞉nakuure. Omonyi waache omwene, niwe asaaghiri, na niwe taata asiighiri chwee.’
21 “Kwo riibhagha riire, ꞉notobhooriire kubha toghi tomurëëtë ghokoocho, kubha otore komorighi. 22 Niho toghakobhoorera, taaghotora komotigha ishe, gho kubha araköra hangʼu ishe naaghoku! 23 Amare oghatobhoorera ˆokabhugha, ‘Moraanga kuucha haghirohamu no omonyi waanyu, motarighibhu wiiki ambërë yaane!’
24 “Hano tugharokiri gho taata wiito, omutamishi waacho, tokamobhoorera ghoose ghano ꞉otobhooriire. 25 Akamara taata aghatobhoorera, ‘Mugharuke wiiki mughëndë ghotondi!’ 26 Niho tokamugharokeri tokabhugha, ‘Tiyaanyi! Totaaghuye iyo, nanyinga toghi no omonyi wiito. Aribha totaaghuye nawe, omukangati uyo taakwënda torighibhu wiiki ambërë yaache.’
27 “Omutamishi waacho, taata wiito, aghatobhoorera, ‘Mweche kubha omukari waane Raheeri, nanyibhooriire abhaana bhabhere hangʼu. 28 Mo‑bhabhere bhayo, umu taanyi‑ho, hande abhe ꞉niituru na atyenyi ihaari. Korwera eriibhagha riyo, nkeere komorighi. 29 Wiiki mokwënda momwimoki uno owonde koru ghokoone. Aribha arabhöna amabhe mo‑rughëndö, mokoonyita kwo bhororo, mumënyë nekunguhiri chwee.’
30 “Gho ghayo, omutëmi wiito, nteeghotora ghugharuka gho taata wiito, ntamughöötë omobhureni uno, gho kubha obhuhöru bho taata wiito, mboghwitëngʼëra omobhureni uno. 31 Aribha taata wiito atamorooche anyi haghirohamu na niitu hayo hayo naaghoku. Na ntookubha tomwitiri taata wiito kwo bhororo. 32 Ghokera ghayo eni mwene nitooriri obhwimeereri bho mobhureni uno gho taata wiito. Nekabhugha, ‘Neraanga komugharoki omobhureni uno, nibhe na amasörö ambërë yaacho chaasiko choose!’