Bhaömööbhö Yusubhu ˆbhaghagharuka Miisiri
43
Aghëëcha ëkëëndërëra kubha ihaari mo‑bhaato bha mo‑se e Kanaani. 2 Ebhiinyakurë bhino bhaghoriri Miisiri bheghasira, niho ishe akabhabhoorera akabhugha, “Mugharuke wiiki Miisiri, mughëndë motoghorere ebhiinyakurë ebhende.”3 Amare, Yuuta akamugharokeri akabhugha, “Taata, ntoore tokobhooriire hayo ekimbërë kubha, omukangati wuure natushangʼiri gho ghotuhenerera, akabhugha, ‘Netaacha kobharighi wiiki mo‑miisho ghaane, aribha motiichiri no omonyi waanyu.’ 4 Nongabheere oriishereri Bhenchamiini aghi na niitu, hayo niho tongaghiire ghoghotonderi. 5 Amare, aribha otaghwishereri aghi na niitu, totaaghuye iyo, gho kubha omooto wuure natobhooriire kubha, ‘Netabharighi wiiki aribha motiichiri no omonyi waanyu.’”
6 Yakobhoa akabhoori akabhugha, “Ngwake munköriire kobhe gho komobhoorera omooto uyo kubha moonyi no omonyi waanyu owonde?”
7 Nabho bhakamugharokeri bhakabhugha, “Omooto wuure natoseghaayiri chwee, ighoro e mangʼana ghiito na gha bhahiiri bhiito akabhugha, ‘Iso waanyu akeere muhöru? Moonyi no ömöönyu owonde?’ Niho tokamugharokeri kurëngʼaana na kinya are aratobhoori. Kana nibhu tongatoriri kumënya aribha angabhughiri toghi no omonyi wiito?”
8 Yuuta akamobhoorera wiiki ishe akabhugha, “Nonyisherereri neghi nawe, tobhooke ibheere bheere tughëndë ghotondi, kubha itu na niiye na abhaana bhiito totaacha ghoku gho gheecha. 9 Eni mwene neekubha omwimeereri waache. Aribha neraanga komugharoki ambërë yaacho omorighi, nibhe na amasörö ambërë yaacho chaasiko choose! 10 Mahëënë aribha totangakechiire ghuye, hamwabhe ntongabheere tumariri ghuye iyo kabhere!”
11 Niho, ishe akabhabhoorera akabhugha, “Mbe! Aribha hangʼu keenyi, mukörë hangʼu, mwimoki motoore mo‑maghöchi ghaanyu omunöghö omuchömu o mo‑se yiito, momohirere omukangati uyo, ibhe n‑atuho yaache. Momohirere obhooke bhosuuhu, na amaghuta masuuhu gha mosisi, ne ebheneeso, na manemane, na kungu na roosi. 12 Mwimoki chambiiri amanga abhere, gho kubha mokwëndëru mugharoki chambiiri chiire chetooruru mo‑maghönëra ghaanyu. Hamwabhe ꞉mbeebhuru bhaghachetoora‑mu. 13 Momwimoki no ömöönyu, mobhooke ibheere bheere moghi mo‑mukangati uyo. 14 Eryobha re Bhotoro Bhoose rebhasakeri mo‑mooto uyo, abhatëghëërërë na kobhaghwera bheghongi, abhatighe mugharuke haghirohamu no ömöönyu no omonyi waanyu Bhenchamiini. Aribha n‑ghokweru na abhaana bhaane, tigha nekweru.”
Bhenchamiini ˆakahiru Miisiri
15 Mbe, abhaana bha Yakobho bhayo bhakiimoki chaatuho chiyo, haghirohamu na chambiiri amanga abhere ghokera e chimbërë, bhaghaköra bhwango bhaaghaye Miisiri haghirohamu na Bhenchamiini omonyi waabho. Hano bhahikiri iyo, bhakiyerekani kwo Yusubhu.
16 Hano Yusubhu amorooche Bhenchamiini anyi haghirohamu na bhaömööbhö, akamobhoorera omwimeereri o nyumba yaache akabhugha, “Obhahire abhaghëni bhano mo‑nyumba yaane, oghi obhaghööghërë, uhöki bhoheene, gho kubha abhaato bhano ntokuraaghëra nabho ebhiinyakurë bhe mwishe.”
17 Omutamishi uyo, akabhahira abhaghëni bhayo mo‑nyumba e Yusubhu, aghaye aghaköra kinya are abhooriiru. 18 Hano bharooche kubha ˆbhakahiru mo‑nyumba e Yusubhu, bhaghatiina chwee. Bhaghasëëma kobhoorani, “Bhamura, hamwabhe nturëëturu ino gho ghiri e chambiiri chino tugharokiiru mo‑maghönëra ghiito, gho ghiri abhönë eghitaamereri na ghotuhöka chaatikere chiito na ghotuköra abhasësë bhaache.”
19 Niho bhakamwishukerera omwimeereri o nyumba e Yusubhu, bhaghasiikëra nawe mo‑kehita ghe ghusöha mo‑ka e Yusubhu. 20 Bhakamobhoorera bhakabhugha, “Oo omutëmi wiito, ntoghoghusasaama chwee, otuhë omweya, tokobhoorere amangʼana masuuhu. Ntwichiri hano ekimbërë ghotondi okwene. 21 Tokamara toghatanura ghuye aka. Hano toohikiri ahaghiro ha komisi abhaghëni, toghasaasura amaghönëra ghiito, tokahagha kubhöna chambiiri cheenyi mo‑maghönëra ghiito koru chetatururu. Ibheere chambiiri chiyo ntwichiri nacho. 22 Toteeche niwe achetooriri chambiiri chiyo mo‑maghönëra ghiito. Amare ntwichiri na chambiiri echende che ghotonderi.”
23 Omutamishi wuure akabhabhoorera akabhugha, “Motatiina, gho kubha Eryobha reenyu, Eryobha ri iso, niryo retooriri chambiiri chiyo mo‑maghönëra ghaanyu. Eni nihaabhuru chambiiri cheenyu.” Niho akamurëëta Simiyooni ghokoobho.
24 Omutamishi wuure akabhaghënëhi gho kobhaha amanche, bhaghishaabha amaghoro, na ghochiha obhunyaaki chaatikere cheebho. 25 Ibho bhakabhanura chaatuho che komuha Yusubhu araacha kuucha omwishe, gho kubha ꞉mbooghwire kubha mbakuraaghëra haghirohamu nawe hayo.
26 Hano Yusubhu agharokiri aka, bhakamuha chaatuho chino ꞉bhaare nacho, bhakiihiinya mbagha haase. 27 Yusubhu akabhakëëri, akamara akabhabhoori akabhugha, “Iso waanyu, omugharuka wuure momboriire amangʼana ghaache, nakuraara? Akeere muhöru?”
28 Nabho bhakamugharokeri bhakabhugha, “Omutamishi waacho, taata wiito, m‑muhöru.” Bhakiihiinya wiiki gho sooko.
29 Hano Yusubhu aghaghëghiri amiisho, akamorighi omonyi waache Bhenchamiini, omoona o nyina, akabhabhoori akabhugha, “Uno niwe omonyi waanyu, uno momboriire amangʼana ghaache? Eryobha rekuhë aghareeya moona waane.” 30 Hayo hayo, Yusubhu akamorigheri amiigha omonyi waache chwee, na changishori chekabherebhenga mo‑miisho ghaache, akaru hayo bhwango, aghasöha mo‑kenyumba keeche, aghasëëma korera.
31 Hano amariri korera, akaheti amanche mo‑bhosho bhooche, akaru mo‑kenyumba ino iköngʼëriiri, akabhugha, “Murëëtë ebhiinyakurë.”
32 Yusubhu akarëëtëru ebhiinyakurë, akabhanureru omwene, na bhaömööbhö bhoose bhakabhanureru haghare, hangʼu hangʼu koru na Abhamiisiri bhano ꞉bhaare haghirohamu nawe. ꞉Niiköruru hangʼu gho kubha m‑moghiro kwo Bhamiisiri kuraaghëra haghirohamu na Abheebhuraaniya. 33 Bhaömööbhö Yusubhu bhayo, bhaghiikara ambërë yaache gho ghooserana, korwera omutange mbagha kwango. Bhaakabha bhiikeere bharamööhani gho koroghoora! 34 Ekiinyakurë nkeere keraghëghu koru mo‑meecha e Yusubhu na kobhahirera, amare Bhenchamiini ꞉natooriiru mara ghataano ghokera bhaare abhande. Niho bhaakanyo na ghosiighasiigha haghirohamu nawe.