Yakobho ˆaghatoma abhaana bhaache Miisiri
42
Orosiko rumu Yakobho akooghu amangʼana kubha ebhiinyakurë mbekubhönëka mo‑se e Miisiri, akabhabhoorera abhaana bhaache akabhugha, “Ngwake mwikeere moramööhani okwene motaaghuköra ngʼana yoyoose? 2 Mutëghëërërë, nyoghwire kubha ebhiinyakurë mbekubhönëka mo‑se e Miisiri, mughëndë iyo mototonderi, totaacha ghoku na aghëëcha.”3 Niho, bhaömööbhö Yusubhu ikomi bhaaghaye ghotondi iyo Miisiri. 4 Amare Yakobho taamotomiri Bhenchamiini, omonyi o Yusubhu, haghirohamu na abhande, gho kubha ꞉naatiiniri amabhe ghatamubhöna. 5 Niho abhaana bhayo bha Isiraeri bhakahika Miisiri bhaanyi haghirohamu na abhatondi abhande, gho kubha ase yoose e Kanaani neere na aghëëcha ihaari.
Yusubhu ˆakabhasaki bhaömööbhö
6 Eriibhagha riyo Yusubhu naare omukangati uno abhatiire omutëmi o se e Miisiri. Niwe are kobhaghoreri abhaato bhoose ebhiinyakurë. Niho, bhaömööbhö bha ghesubhe bhakaacha ghokooche bhakiihiinya mbagha haase. 7 Hano Yusubhu abharooche bhaömööbhö akabhamënya, amare aghiiköri nköra tabheeche. Aghasiikëra nabho kwo mangʼana mahaari, akabhabhoori akabhugha, “Inyu hayi morweriire?”
Bhakamugharokeri bhakabhugha, “Nturweriire mo‑se e Kanaani, na ntwichiri ino ghotondi.”
8 Nangabha Yusubhu abhamënyiri bhaömööbhö, amare ibho bhataamumënyiri. 9 Aghaghahiita amaröötö ghaache ghano aröötiri kare ighoro yaabho, niho akamara akabhabhoorera akabhugha, “Inyu n‑abhaseghaayi moonyi! Mwichiri ghoseghaayi obhutöbhu bho se yiito.”
10 Ibho bhakamugharokeri bhakabhugha, “Taanyi hangʼu omutëmi wiito, itu n‑abhatamishi bhaacho, ntwichiri ghotondi. 11 Itu bhoose n‑abhaana bha mwibhori umu toonyi. Itu n‑abhaato abhahëënë, totaanyi bhaseghaayi.”
12 Amare Yusubhu akabhabhoorera akabhugha, “Taanyi hangʼu! Mwichiri hano ghotoseghaayi na korighi hayi ase yiito enyi intöbhu.”
13 Bhakamobhoorera bhakabhugha, “Itu abhatamishi bhaacho, ntoore ikomi na bhabhere, abhaana bha mooto umu, ntwibhoriiru mo‑se e Kanaani. Kwango wiito nasaaghiri na taata aka, no omwito owonde ꞉naamariri ghuye mo‑bhaaru.”
14 Amare Yusubhu akabhabhoorera akabhugha, “N‑kinya nimariri kobhabhoorera kubha, inyu n‑abhaseghaayi moonyi! 15 Hangʼu nibhu mokumënyu, ˆnekaraheri kwo riina re Bharaawo omutëmi o Miisiri kubha, motaakoru hano mbagha omonyi waanyu ichiri. 16 Momotome umu ghate yaanyu aghi amurëëtë omonyi waanyu, abhande bhoose bhasaaghe mwighërëcha hano. Hayo niho amangʼana ghaanyu ghakongoka bhoheene. Aribha taanyi hangʼu, kwo riina re Bharaawo inyu n‑abhaseghaayi moonyi!”
17 Niho, Yusubhu akabhatoora mwighërëcha gho chaasiko ishato. 18 Orosiko ro ghatato Yusubhu akabhabhoorera akabhugha, “Gho kubha eni nekoresooka Eryobha, mukörë hangʼu mubhönë obhuhöru. 19 Aribha m‑bha hëënë moonyi, ömöönyu umu asaaghe mwighërëcha, na niinyu abhande mohire ebhiinyakurë kwo bhahiiri bhaanyu bhano bhakunyaakibhu na aghëëcha. 20 Moramara momurëëtë omonyi waanyu hano, hayo niho nekumënya obhuhëënë bho mangʼana ghaanyu, na niinyu motaghwitu.” Mbe, bhaghiishereri ghuköra kinya abhabhooriire.
21 Niho, bhaghaghambana, “M‑mahëënë ꞉ntomutasiiri omonyi wiito Yusubhu. ꞉Ntorooche kinya itumatiri mo‑motema waache, na kinya are aratusasaama koru totoghwire. Kiyo nikyo ˆgheghaghëri anyaako ino yoose ˆeghatubhöna.”
22 Rubheeni akabhabhoorera akabhugha, “Eni ntebhabhooriire kubha motamunyahaara omobhureni uno? Amare inyu motantëghëëriire! Ibheere nikyo tokunyaakibhu ighoro e masaahë ghaache.”
23 Abhakoro bhayo bha Yusubhu, bhataamënyiri kubha nakooghu ghoose ghayo ꞉bhaare ghosiikëra, gho kubha Yusubhu naare arasiikëra nabho gho kohetera omugharori o ghighambo kiyo.
24 Yusubhu aghaye rubhareka aghasëëma korera. Hano amariri korera, aghagharuka haare wiiki ghosiikëra nabho. Akabhabhoorera abhatamishi bhaache bhamughöötë Simiyooni, na komubhöha na chambengo ambërë yaabho.
Bhaömööbhö Yusubhu ˆbhaghagharuka Kanaani
25 Niho, Yusubhu akahatëka abhatamishi bhaache ghwichori amaghönëra ghaabho ebhiinyakurë, na mooto woose bhamugharokeri chambiiri cheeche mo‑riighönëra reeche. Wiiki akahatëka kubha bhabhatoorere ebhiinyakurë bhe kurë mo‑nchëra. Abhatamishi bhaache bhaghaköra ghoose ghayo. 26 Bhaömööbhö Yusubhu, bhaghaghëghi chaatikere emerigho ghe bhiinyakurë bheebho bhiyo, bhaghatanura ghuye aka.
27 Hano bhaare mo‑nchëra, bhakahika ahaghiro ha komisi, umu ghate yaabho aghasaasura eriighönëra reeche kubha ayihe atikere yaache ebhiinyakurë. Akahagha kubhöna chambiiri cheeche chetooruru mo‑monu o riighönëra reeche. 28 Akabhabhoorera bhaömööbhö akabhugha, “Chambiiri cheene, mbanchingarokiiri! Mööhi ghachino hano, nechebhwine mwighönëra reene.”
Hano bhooghwire ghayo, bhaaghaku omukörö. Omooto woose aghiishoororeri omughëndi waache na kumööhani ino bharasingisa na kwibhoori bharabhugha, “Neke kino Eryobha retuköriire?”
29 Hano bhahikiri mo‑se e Kanaani, o‑Yakobho ishe waabho, bhakamobhoorera ghoose ghano ghabhabhwine. 30 Bhakabhugha, “Omukangati o se yiire naare arasiikëra na niitu kwo bhuhaari chwee, na kwihëëbha kubha itu m‑bhaseghaayi bha se yaabho toonyi. 31 Amare itu tokamobhoorera tokabhugha, ‘Itu n‑abhaato abhahëënë toonyi na totiichiri ghoseghaayi. 32 Ntwibhwiru abhaana ikomi na bhabhere gho taata wiito, umu ghate yiito naghiire mo‑bhaaru, na kwango wiito naanyi haghirohamu na taata iyo Kanaani.’
33 “Niho omukangati o se iyo aghatobhoorera akabhugha, ‘Hangʼu nibhu nekumënya aribha mahëënë inyu n‑abhaato abhahëënë moonyi, montighere hano ömöönyu umu, na niinyu abhande mohire ebhiinyakurë aka kwo bhahiiri bhaanyu bhano bhakunyaakibhu na aghëëcha. 34 Hano moghugharuka, momurëëtani omonyi waanyu ghokoone, hayo niho nekumënya kubha inyu taanyi abhaseghaayi, n‑abhaato abhahëënë moonyi. Niho nekomotighooroka ömöönyu, na niinyu mokuhaabhu omweya o ghuköra obhosorocha mo‑se ino.’”
35 Hano bhaare bharahoma ebhiinyakurë koru mo‑maghönëra ghaabho, bhakahagha korighi omooto woose nagharokiiru chambiiri cheeche mo‑kibheeti, chetooruru mwighönëra reeche. Hano abhaana bhayo, haghirohamu ni ishe bharooche ghayo, bhoose bhaghatiina. 36 Yakobho akabhabhoorera akabhugha, “Monyimokiiri abhaana bhaane! Yusubhu taanyi hano, Simiyooni taanyi‑ho, na mokwënda komwimoki Bhenchamiini woose. Amangʼana ghayo ghoose neeni ghakubhöna!”
37 Rubheeni akamobhoorera ishe akabhugha, “Noghotora kobhiita abhaana bhaane bhoose bhabhere, aribha neraanga komugharoki Bhenchamiini ghokoocho. ˆNeghakurahereri kubha nekomochonga mbagha nemugharoki.”
38 Niho ishe akabhagharokeri akabhugha, “Omoona waane taaghuye na niinyu, ömööbhö namariri ghoku, niwe omwene asaaghiri. Eni nimariri ghokunguha. Aribha omoona waane arabhöna amabhe mo‑rughëndö runo mokuucha ghuköra, mokoonyita kwo bhororo.”