Yusubhu ˆaghakaachura amaröötö gha Bharaawo
41
Hano ghehetiri emeeka ebhere meghima, Bharaawo woose akarööta eriröötö. Mo‑riröötö riyo, akarighi imeeriire rubhareka ro rooche ro Naayiri. 2 Mo‑rooche ruyo, akarighi changʼömbë inoru mohungate imangi chwee chekarwera‑mu, cheekabha cherariishi obhunyaaki. 3 Chekamara chekarwera‑mu changʼömbë echende mohungate, induuku. Chekiimeerera rubhareka ro rooche, na rubhareka ro changʼömbë chiire chaanoru. 4 Niho changʼömbë mohungate chanduuku, cheekare chiire mohungate chaanoru. Hayo hayo, Bharaawo aghiitaki koru mo‑chandöörö.5 Akamara akamisi wiiki, akarööta eriröötö re kabhere. Akarighi ebhisaawa mohungate bhekoro na bhichömu, bheghasebhokera mo‑rikubhate rimu. 6 Akamara akarighi wiiki ebhisaawa ebhende bhikërëghësö mohungate, bhino bhyomiru no omukama muhaari o roghoro bherasebhoka. 7 Ebhisaawa bhiyo ebhikërëghësö mohungate, hayo hayo bhekamera ebhisaawa bhiire ebhekoro bhiichwire chaaheke. Niho Bharaawo aghiitaki wiiki koru mo‑chandöörö, akamënya kubha n‑eriröötö hangʼu reere.
8 Atabhoori yaache, Bharaawo akabha na ahaho chwee, niho akabhabherekera abhaghabho abhahika bha Miisiri, haghirohamu na abhaato bha mangʼiini bhoose. Hano bhahikiri, akabhabhoorera amaröötö ghayo, amare taanyi‑ho koru umu uno atoriri komukaachurera egheteemoro ke maröötö ghayo.
9 Niho omonyiishi omokoro o Bharaawo, akamobhoorera akabhugha, “Oo omutëmi wiito, reero ˆnekahiita amabhe ghaane! 10 ˆNekahiita eriibhagha riire otukarariire, itu abhatamishi bhaacho, eni na wuure are omokoro o ghukara emighaate, oghatubhöha mwighërëcha kwo mokoro o bhachongi.
11 “Kwo bhotiko bhumu itu bhombe nturöötiri amaröötö, omooto woose iröötö reeche ihaghare. 12 Mbe, mwighërëcha muyo toore, naare‑mu omobhureni umu o Kebhuraaniya, naare omutamishi o mokoro o bhachongi. Hano tomobhooriire amaröötö ghiito, iwe aghatora ghotukaachurera, kurëngʼaana na kinya turöötiri. 13 Kinya akachwire, nibhu ghabheere. Eni, neghagharokibhu mo‑meremo gheene. Amare wuure are arakara emighaate, iwe aghasungu a‑mote.”
Yusubhu ˆakarëëtu o‑Bharaawo
14 Mbe, Bharaawo aghatomani Yusubhu arëëtu. Niho bhakamohoroki bhwango koru mwighërëcha. Hano amariri kungʼööbha na ghokerani amaghööti, akarëëtu ambërë e Bharaawo.
15 Hano Bharaawo amorooche Yusubhu, akamobhoorera akabhugha, “Eni niröötiri amaröötö, amare taanyi‑ho omooto uno atoriri ghunkaachurera. Nimariri kooghu amangʼana ghaacho, kubha abhaato bharakobhoorera amaröötö ghaabho, iye noghotora kobhakaachurera.”
16 Yusubhu akamugharokeri Bharaawo akabhugha, “Eni nteenyi no obhotoro bhuyo, amare Eryobha ndeghokuha amagharokeri ghano ghaghokurëngʼaanera.”
17 Akamara Bharaawo akamobhoorera Yusubhu akabhugha, “Mo‑riröötö reene, neere niimeeriire rubhareka ro rooche ro Naayiri. 18 Nekarighi changʼömbë inoru mohungate imangi, cherarwera mo‑rooche, cheekabha cherariishi obhunyaaki. 19 Niho wiiki, chekarööbhëru ne echende mohungate induuku chansineenu, na chetobhiire chwee. Ntiimara ndighi changʼömbë induuku chenga chiyo mo‑se yoose e Miisiri.
20 “Niho changʼömbë chiyo, hayo hayo cheekare changʼömbë chiire chaanoru. 21 Amare nangabha ꞉checheriire, taanyi‑ho omooto uno angatoriri kumënya kubha ꞉nchecheriire, gho kubha cheghasaagha chetobhiire kinya cheere ekimbërë. Niho neghitaki koru mo‑chandöörö.
22 “Wiiki niiche komisi, nekarööta eriröötö erende, nekarighi ebhisaawa mohungate bhichömu bhiichwire chaaheke bhesebhokiire mo‑rikubhate rimu. 23 Nekamara nekarighi wiiki, bherarwera ebhisaawa ebhende ebhikërëghësö mohungate bhikëëruru, bhyomiru no omukama muhaari o roghoro. 24 Ebhisaawa bhiyo ebhikërëghësö mohungate, bhekamera ebhisaawa bhiire ebhichömu mohungate. Nebhabhooriire abhaghabho abhahika amaröötö ghano, amare taanyi‑ho koru umu uno atoriri ghunkaachurera.”
25 Niho Yusubhu akamobhoorera Bharaawo akabhugha, “Amaröötö ghaacho ghombe egheteemoro keeche n‑kimu. Eryobha ndekwërëkiri amangʼana ghano rekwënda ghuköra ghano matiko. 26 Changʼömbë mohungate chiire chaanoru n‑emeeka mohungate, ne ebhisaawa bhiire mohungate ebhimangi bhyose n‑emeeka ghiyo ghiyo mohungate. Amaröötö ghano, egheteemoro keeche n‑kimu. 27 Changʼömbë mohungate chanduuku chansineenu, haghirohamu ne ebhisaawa ebhikërëghësö mohungate bhino bhikëëruru bhyomiru no omukama muhaari o roghoro, n‑emeeka mohungate ghe gheecha.
28 “Kinya ꞉neekobhooriire oo Bharaawo, Eryobha ndekwërëkiri amangʼana ghano rekwënda ghuköra ghano matiko. 29 Ngekubha‑ho emeeka mohungate ghe mwighoto mo‑se yoose e Miisiri. 30 Niho gheramara ngekuucha emeeka eghende mohungate ghe gheecha. Kwo riibhagha riyo, omwighoto uno ore‑ho mbakoweebhu, na gheecha iyo nekunyaaki ase ino yoose. 31 Koru omwighoto wuure mbakoweebhu, gho kubha aghëëcha iyo ekuucha, neekubha ihaari chwee. 32 Mbe, eriröötö reecho rino, ndigharokiire kabhere gho ghetuubhaani kino ghetubhiine, gho kwërëki kubha Eryobha ndyendiri, naryo ndeghoghahikeerani amangʼana ghano, bhwango.
33 “Mbe, ibheere, oo Bharaawo! Nokwëndëru wahure omooto o bhongo no o mangʼiini. Omooto uyo, omuhë obhwimeereri bho ghukangata ase yoose e Miisiri. 34 Wiiki oo Bharaawo, obhaahure abhiimeereri abhande bha mo‑se ino, obhabhoorere kubha bhakome eribhaara rimu ghwi ishaano re munöghö woose o Miisiri kwo riibhagha ryose re meeka mohungate ghe mwighoto. 35 Obhatome abhiimeereri bhayo, bhakome ebhiinyakurë bhiyo kwo meeka mohungate ghino ghekuucha ghe munöghö mwaru. Kwo bhukangati bhoocho, bhakome ebhiinyakurë bhabhetindeke bhibhe amamba mo‑meghya ghyose. 36 Ebhiinyakurë bhiyo, mbeekubha amamba e se e Miisiri, kwo meeka mohungate ghe gheecha ino ekuucha etaacha ghosireekereri ase ino.”
Yusubhu ˆaghatooru abhe omwimeerereri
37 Amangʼana gha Yusubhu ghaghiishereru ambërë e Bharaawo na abhakangati bhoose bha mo‑bhutëmi bhooche. 38 Niho, Bharaawo akabhabhoori abhakangati bhayo akabhugha, “Ibheere ntoghotora kubhöna omooto owonde kinya Yusubhu, uno anyi na Akörö e Ryobha moose yaache?”
39 Niho Bharaawo akamobhoorera Yusubhu akabhugha, “Gho kubha Eryobha niryo reghukachoriire amaröötö ghano ghoose, mbe, taanyi‑ho omooto owonde o bhongo no o mangʼiini, kinya iye. 40 Iye nookubha omwimeereri o ka yaane na ase yaane, na abhaato bhaane mbaghukangatu kwo ngʼana yaacho. Neeni mwene chiri neekubha ighoro yaacho, gho kubha ˆnikariire eghetumbe ke bhutëmi.”
41 Mbe, Bharaawo akamobhoorera Yusubhu akabhugha, “Ibheere ˆneghaghuköra ubhe no obhukangati bho ghukangata ase yoose e Miisiri.” 42 Niho Bharaawo akaruusi abhëtë yaache e mohuuri mo‑kyara keeche, akamobheeki Yusubhu. Akamobheeki na amaghööti amachömu gha ghotegheri, haghirohamu no omunyaro o sahaabhu mwighöti. 43 Akamotiiri mo‑montoka yaache ayende ino ere erarutu na chabharaasi na komuköra omubhateri waache. Hano Yusubhu are araköra orughëndö na amöntöka iyo, abhachongi bhaache mbakangatiri ambërë yaache ino bharaköra eriireghe bharabhugha, “Mohiinye ebheru! Musënërë Yusubhu anchëra ahete!” Hangʼu nibhu Bharaawo amotooriri Yusubhu abhe omukangati o se yoose e Miisiri.
44 Bharaawo akëëngëra komobhoorera Yusubhu arabhugha, “Eni neeni Bharaawo, ˆnekabhugha, mo‑se yoose e Miisiri, atabhönëka mooto uno aghuköra egheghiro ghyokyose, aribha otamwishereriiri iye!” 45 Bharaawo akamuha Yusubhu eriina re Kemiisiri, Sabhenaati‑Bhaneya. Akamokwiri Asenaati, omuukë o Bhotibheera. Bhotibheera uyo, naare Omuchaama o mo‑moghya o Oni. Mbe, Yusubhu aghataarëra ase yoose e Miisiri na kumënyu.
46 Hano Yusubhu asëëmiri komuhökëri Bharaawo omutëmi o Miisiri, naare ne emeeka miröngö etato. Niho, akaru mo‑nyumba e Bharaawo, akabha omukangati o se yoose e Miisiri. 47 Mo‑meeka mohungate ghe mwighoto, emeghondo ghe Miisiri ghekabhyara chwee! 48 Yusubhu aghakoma ebhiinyakurë mo‑meghya ghyose kwo meeka mohungate ghe mwighoto na ghotindëka amamba mo‑meghya ghiyo. Aghatoora amamba e bhiinyakurë mo‑meghya ghyose koru mo‑meghondo ghino gheenyi haghuhe ne emeghya ghiyo. 49 Yusubhu aghatindeka ebhiinyakurë bhyaru, mbeere ke mwishekeenya o mo‑nyancha, ebhiinyakurë mbeere bhyaru chwee, koru bhetaare no omubharo.
50 Mo‑meeka ghino aghëëcha ere ekeere ghusëëma, Yusubhu naare amariri kwibhora abhaana bhabhere kwo mukari waache Asenaati, omuukë o Bhotibheera, Omuchaama o mo‑moghya o Oni. 51 Yusubhu akamoroka omutange waache Manase,a akabhugha, “Eryobha ndimariri ghunköra nyeebhu anyaako yaane yoose, na bhaomwito bhano bhaanyi gho taata waane.” 52 Omoona waache o kabhere, akamoroka Ebhurayimu,b akabhugha, “Eryobha ndimariri kuuha orwibhoro mo‑se e nyaako yaane.”
53 Niho emeeka mohungate ghe mwighoto mo‑se e Miisiri gheghasira. 54 Gheghasëëma emeeka eghende mohungate ghe gheecha, kinya Yusubhu are abhughiri hayo ekeenyuma. Neere‑ho aghëëcha mo‑chaase echende choose, ghotigha ase e Miisiri iyo neere ne ebhiinyakurë. 55 Hano abhiikari bha Miisiri bharooche aghëëcha ekahaara, bhakangʼösëra o‑Bharaawo abhahë ebhiinyakurë. Niho Bharaawo akabhabhoorera Abhamiisiri bhoose akabhugha, “Moghi o‑Yusubhu, ryoryose rino arabhabhoorera, mukörë.”
56 Mbe, aghëëcha eghasancha mo‑chaase choose. Gho ghayo, Yusubhu aghiishereri kubha ebhitara bhyose bhitachoru. Niho akabha arabhaghoreri Abhamiisiri ebhiinyakurë. 57 Abhaato koru chambaara choose che chaase, bhaakabha bharaacha Miisiri kwo Yusubhu kubha abhaghoreri ebhiinyakurë. Aghëëcha neere ihaari chwee mo‑chaase choose.