Yusubhu ˆaghakaachura amaröötö gha bhabhöhu
40
Hano amangʼana ghayo ghasiriri, abhatamishi bhabhere abhakoro bha mutëmi o Miisiri, bhakamunaaha omutëmi. Abhatamishi bhayo mbaare omokoro o ghukara emighaate no owonde omonyiishi omokoro. 2 Omutëmi o Miisiri akabhakararëra chwee abhatamishi bhayo, 3 akabhatoora mwighërëcha re omokoro o bhachongi, muure Yusubhu ꞉abhöhiiru. 4 Omokoro o bhachongi akamwahura Yusubhu abhe omutamishi o kobhahökëri. Ibho bhaghiikara chaasiko nyarebhe mwighërëcha.5 Mbe, orosiko rumu obhotiko bhakeere bhaanyi mwighërëcha, omonyiishi na uno are arakara emighaate, bhakarööta eriröötö bhombe, na kira eriröötö ndeere ne egheteemoro keeche kihaghare.
6 Atabhoori yaache, Yusubhu aghaye kobharighi, akabhöna bhiitumatiri. 7 Niho Yusubhu akabhabhoori abhatamishi bha mutëmi o Miisiri, bhano bhaare nawe mo‑kibhöhö mo‑nyumba e mutëmi waache, akabhugha, “Neke kana reero ebhesho bheenyu mbiitumatiri?”
8 Ibho bhakamugharokeri bhakabhugha, “Itu bhombe nturöötiri amaröötö, amare taanyi‑ho o ghotukaachurera.”
Yusubhu akabhabhoorera akabhugha, “Eni ntighöötë obhotoro bho kobhakaachurera amaröötö ghaanyu, amare neghotora kobhakaachurera kwo bhotoro bhuno nekuhaabhu ne Eryobha. Mbe, momboorere amaröötö ghaanyu.”
9 Ibheere omonyiishi omokoro akamobhoorera Yusubhu eriröötö reeche akabhugha, “Mo‑riröötö reene, nerooche omusabhiibhu ambërë yaane, 10 noore ne ebhihaghe bhitato. Eriibhagha isuuhu hangʼu bheghasëëma ghosebhoka, bhekabhari ne ebhibhari bheeche bhekaruusi chasabhiibhu chinöghiri. 11 Mo‑kubhökö koone neere ne eghisënchö ke Bharaawo, neghachemitera‑mu chasabhiibhu chiyo, nekamara nekamuha.”
12 Yusubhu akamobhoorera omonyiishi wuure akabhugha, “Egheteemoro ke riröötö reecho n‑kino, ebhihaghe bhitato bhiyo n‑chaasiko ishato. 13 Hano chekoheta chaasiko ishato, Bharaawo naghokoruusi mo‑kibhöhö keecho na ghoghugharoki mo‑bhukangati bho moremo waacho. Nookubha oramuha Bharaawo eghisënchö mo‑mabhökö ghaache, kinya ore omonyiishi waache hayo ekeenyuma. 14 Amare hano amangʼana ghaaghuye bhoheene, neghoghusabha ohiite na neeni gho ghunkörëra amachömu, osiikërë amangʼana machömu kwo mutëmi kubha na neeni netore koru mwighërëcha muno. 15 Neghoghusabha hangʼu gho kubha, ꞉neruusiibhu mo‑se e Bheebhuraaniya gho changuru, na hano neenyi ntiköriri ngʼana yoyoose ino eghëriri netooru mwighërëcha.”
16 Mbe, omokoro o ghukara emighaate ghe mutëmi, hano oghwire egheteemoro kiire n‑kimangi, akamobhoorera Yusubhu akabhugha, “Eni woose niröötiri eriröötö kubha, mo‑mutu waane neere nitwekiri chahongo ishato che mighaate. 17 Orohongo rwi ighoro, ndoore ne ebhiinyakurë bhe manga haghare haghare bhe Bharaawo, amare ebhinyönyi bheekabha bherare ebhiinyakurë bhiyo neere nitwekiri.”
18 Yusubhu akamobhoorera akabhugha, “Egheteemoro ke riröötö reecho nikyo kino, chahongo ishato n‑chaasiko ishato. 19 Hano chekoheta chaasiko ishato, omutëmi o Miisiri naghokohoroki mwighërëcha, naghokonunga omutu waacho, naghoghosunga a‑mote, ne ebhinyönyi mbekurë omobhere waacho.”
20 Orosiko ro ghatato, ndoore orosiko ro nyangi e kwibhoru kwo Bharaawo. Niho akabhakörëra abhatamishi bhaache bhoose obhughëni. Akabharuusi mwighërëcha uno are omokoro o ghukara emighaate no omonyiishi omokoro, akabhatoora ambërë e bhakangati bhaache. 21 Gho ghayo, akamugharoki omonyiishi omokoro mo‑mweya waache, kubha abhe aramuha omutëmi o Miisiri eghisënchö gho kubhökö kooche. 22 Amare akamosunga mo‑mote uno are omokoro o ghukara emighaate, kinya Yusubhu are abhakachoriire amaröötö ghaabho hayo ekeenyuma.
23 Haghirohamu na ghayo, omonyiishi omokoro wuure o mutëmi akamwebhu Yusubhu, tamohiitiri wiiki.