Anyumba e Bhootibha ˆeghiitabheru
39
Hano abhasorocha bhaare bhahikiri Miisiri, bhakamoghori Yusubhu o‑Bhootibha. Bhootibha uyo, naare omukangati omokoro o bhaashirikare bha mutëmi Bharaawo o Miisiri.2 Omutëmi Waryobha naare haghirohamu na Yusubhu, aghachaama chwee, akabha ariikara mo‑nyumba e Momiisiri, omutëmi waache. 3 Bhootibha akarighi kinya Omutëmi Waryobha anyi haghirohamu na Yusubhu, na niwe amoheere obhotoro bho ghyokyose kino are araköra. 4 Mbe, omutëmi waache aghachömëru na Yusubhu chwee, akamuköra abhe niwe omwimeereri o nyumba yaache, ne ebheghiro bheeche bhyose.
5 Korwera orosiko ruyo hano Bhootibha amotooriri Yusubhu abhe omwimeereri o nyumba yaache ne ebheghiro bheeche bhyose, Omutëmi Waryobha akayitabheri anyumba e Momiisiri uyo gho ghiri e Yusubhu. Orubhango ro Omutëmi Waryobha, rookabha ighoro egheghiro ghyokyose kino are nakyo aka na mo‑meghondo. 6 Niho Bhootibha aghatigha ghuköra omoremo wowoose, akamuha Yusubhu obhukangati ighoro e bheghiro bheeche bhyose, koruusi ebhiinyakurë bheeche bhino ariire omwene.
Yusubhu no omukari o Bhootibha
Mbe, Yusubhu naare omobhureni muhëntani no o ghotegheri chwee.
7 Ibheere rekaheta eriibhagha nyarebhe, omukari o Bhootibha akamwighomba Yusubhu, akamobhoorera akabhugha, “Nuuche, omisi na neeni.”
8 Amare Yusubhu akaanga, akamobhoorera omukari uyo akabhugha, “Tëghëërëra! Omutëmi waane naaheere obhukangati ighoro e bheghiro bhyose bhe nyumba ino, iwe takeere kunyaaka ne egheghiro ghyokyose wiiki. 9 Hano mo‑ka ino taanyi‑ho omokoro wowoose uno aghonkera eni. Iwe nanyishereriiri ghuköra ghyokyose mo‑nyumba ino, nanyinga iye gho kubha m‑mukari waache onyi. Nibhu ngotora ghuköra amangʼana amabhe kinya ghayo, neritaaseri Eryobha?”
10 Omukari uyo akëëndërëra komotebhitebhi Yusubhu orosiko kwo orosiko ango ishereri komisi nawe. Amare, Yusubhu akabha araanga komisi nawe.
11 Orosiko rumu, Yusubhu ꞉naasöhiri mo‑nyumba e Bhootibha, kubha akörë emeremo gheeche kinya are anariri. Eriibhagha riyo, abhahöki abhande bhataare‑mu mo‑nyumba iyo. 12 Niho omukari uyo o Bhootibha akamughööta angibho yaache, akamobhoorera, “Nuuche, omisi na neeni!” Amare, Yusubhu hayo hayo akamutabhaabhuka mo‑mabhökö ghaache, akangʼösëra anche. Omukari wuure aghasaagha na angibho yaache mo‑mabhökö.
13 Hano arooche kubha Yusubhu ˆakamotighera angibho yaache mo‑mabhökö na kungʼösëra anche, 14 akabherekera abhatamishi abhande bhaache, akabhabhoorera akabhugha, “Morighi omutamishi o Kebhuraaniya uno turëtiiru hano, aghatosooki! ꞉niichiri ghokoone arakiibhi ghontimba gho changuru, amare neghakuura kwo riiraka ikoro! 15 Hano oghwire ˆneghakuura, akahurumuka aghaye anche, nantighiire angibho yaache.”
16 Niho omukari uyo aghatindeka angibho iyo, mbagha hano omutëmi waache agharokiri aka. 17 Hano ahikiri, aghasëëma komobhoorera eghesogho kiyo, “Omutamishi o Kebhuraaniya uno oturëtiire, ꞉niichiri ghunkörëra amangʼana gha chaasoni! 18 Amare hano nekuuriri, hayo hayo akahurumuka aghaye anche, aghantighera angibho yaache!”
19 Hano Bhootibha oghwire amangʼana ghayo gha mukaache, kubha hangʼu nibhu omutamishi waache amuköriire, Bhootibha aghakarara chwee. 20 Niho akamwimoki Yusubhu, akamotoora mwighërëcha rino abhabhöhu abhande bha mutëmi ꞉bhaare.
Yusubhu mwighërëcha
21 Amare Omutëmi Waryobha naare haghirohamu na Yusubhu, akamorigheri changori gho komuköra asiighu no omokoro o riighërëcha riyo.
22 Gho ghayo, omokoro o riighërëcha akamotoora Yusubhu abhe omwimeereri o bhabhöhu bhoose. Ebheghiro bhyose bhino ꞉bhiiköruru muyo, mbeere bheraköru kwo bhukangati bho Yusubhu. 23 Omokoro o riighërëcha riyo hano are amoheere Yusubhu obhwimeerereri bhuyo, tenderiire no omoremo uyo o obhwimeerereri, gho kubha Omutëmi Waryobha naare haghirohamu na Yusubhu gho kohikeerani ghyokyose kino are araköra.