Yuuta na Tamaari
38
Kwo riibhagha riyo, Yuuta aghataana na bhaömööbhö, aghaye ghwikara haghirohamu no omooto umu eriina reeche Hiira o mo‑moghya o Aturaami.2 Hano are iyo, Yuuta akarighi omuukë o Shuwa o se e Bhakanaani, akamokwira na komisi nawe. 3 Omuukë uyo akabhöna anda, akamwibhorera omoona o ghesubhe, Yuuta akamoroka Eri. 4 Akabhöna anda ayende wiiki, akamwibhora omoona owonde o ghesubhe, akamoroka Onani. 5 Niho wiiki akiibhora omoona owonde o ghesubhe, akamoroka Sheera. Sheera uyo, hano ibhwiru, Yuuta na abhaato bhaache mbaare bhamanyiri mo‑moghya o Kesiibhu.
6 Eriibhagha riiche koheta, Yuuta akamokwiri Eri omukari, eriina re mukari uyo naare arabherekeru Tamaari. 7 Amare Eri, omutange o Yuuta naare na asughara imbe ambërë e Mutëmi Waryobha, gho ghayo, Omutëmi akamwita.
8 Mbe, Yuuta akamobhoorera Onani, “Omughabhe muka ömöönyu, gho kubha nibhu ekwëndëru ukörë, obhooki aka e möönyu.”
9 Amare Onani naare eche kubha, orwibhoro ruyo rotaakubha rorooche. Gho ghayo, hano are aramisi no omukari uyo, eriibhagha are arëënda ghwita akabha ariitera haase, kubha atamwibhorera ömööbhö omoona. 10 Ghayo Onani are araköra ghakamukarari Omutëmi Waryobha, niho akamwita woose.
11 Niho Yuuta akamobhoorera omukamoona waache Tamaari akabhugha, “Mbe, ibheere nugharuke oghi wiikare awaanyu, na usaaghe mosino, mbagha eriibhagha rehike rino omoona waane Sheera akubha akoriri.” Yuuta ꞉naaköriri hangʼu, gho kubha ꞉niituuriri hamwabhe Sheera woose, nangatoriri ghoku, kinya bhaömööbhö bhakuure. Niho, Tamaari aghagharuka awaabho ghwi ishe.
12 Hano chaasiko chaaru chehetiri, omukari o Yuuta, omuukë o Shuwa, aghaku. Hano Yuuta amariri chaasiko che kwihiinyërëra, aghaye Tiimuna haghirohamu na musaani waache Hiira omooto o Aturaami, kwo bhaato bhano ꞉bhaare bharanunga amachööki gha changʼöndu cheeche.
13 Hano Tamaari abhooriiru kubha ishebhiyaara mo‑nchëra anyi araghe Tiimuna, konunga amachööki gha changʼöndu cheeche, 14 akaruusi amaghööti ghaache gha bhosino, akiibhishi asheera, akabhisa obhosho kubha bhataamumënya. Aghiikara mo‑kehita ghe ghusöhëra Enayimu, mo‑nchëra ino eghuye Tiimuna. ꞉Naaköriri hangʼu gho kubha ꞉naarooche kubha Sheera namariri ghokora, amare tamughabiri abhe mukaache.
15 Mbe, hano Yuuta abhwine Tamaari ikundekiiri asheera mo‑bhosho, akiihëëbha kubha no omukari omusöngörëëri. 16 Ino ateeche kubha n‑omukamoona waache, akamwishukerera, akamobhoorera akabhugha, “Neghusabha nemisi na niiye.”
Tamaari akamobhoori akabhugha, “Neke okuuha oramisi na neeni?”
17 Yuuta akamugharokeri akabhugha, “Neghokuha ekemweti kimu koru mo‑rikinda reene.”
Tamaari akamobhoorera akabhugha, “Nuuhë ekimanyenkereri ghe kwërëki kubha nokundëëtëra.”
18 Yuuta akamobhoori, “Nokwënda nekuhë ekimanyenkereri ke?”
Nawe akamugharokeri akabhugha, “Nuuhë abhëtë yaacho e mohuuri haghirohamu no omusanga waache na ahimbo iyo ughöötëriire.” Mbe, Yuuta akamuha bhyose bhiyo, akamisi nawe. Tamaari akabhöna anda. 19 Hano Tamaari agharokiri aka, akaruusi asheera ino are ikundekiiri a‑mutu, akabheeka wiiki amaghööti ghaache gha bhosino.
20 Akamara Yuuta aghatoma musaani waache Hiira omooto o Aturaami, kubha amohirere omukari wuure ekemweti, kubha amugharokeri ekimanyenkereri kino amotighiire. Hiira akamutabhara, amare tamobhwine. 21 Hiira akabhoori abhiikari bha Enayimu akabhugha, “Omukari omusöngörëëri uno are hano rubhareka ro nchëra, hayi anyi?”
Nabho bhakamugharokeri bhakabhugha, “Taanyi hano omukari omusöngörëëri.”
22 Niho, Hiira aghagharuka o‑Yuuta, akamobhoorera akabhugha, “Ntemobhwine! Koru na abhiikari bha iyo, mbambooriire kubha, ‘Taamara abha‑ho omukari omusöngörëëri hano.’ ”
23 Yuuta akabhugha, “Tigha abhiimoki ebheghiro bhiyo, totaacha ghosookibhu. Iye mwene norooche kubha neghotomiri omohirere ekemweti kino, amare tomobhwine.”
24 Hano emyëri etato ghehetiri, Yuuta akabhöna amangʼana kubha, “Tamaari omukamoona waacho nabheere omusöngörëëri. Wiiki namariri kwihööcha!”
Niho, Yuuta aghatena ekiina akabhugha, “Momohoroki anche, momweki no omororo mbagha aku.”
25 Hano bhaare bharamohoroki anche, Tamaari aghatoma amangʼana ghwi ishebhiyaara arabhugha, “Omwene ebheghiro bhino, niwe aheere anda. Mbe, neghoghusabha obhimënyë m‑bhya we, abhëtë e mohuuri haghirohamu no omusanga waache na ahimbo ino.”
26 Hayo hayo Yuuta akabhimënya ebheghiro bhiyo, akabhugha, “Tamaari m‑muhëënë ghokera eni, gho kubha ntiimara mokwiri kwo moona waane Sheera.” Mbe, korwera hayo Yuuta taamisiri wiiki na Tamaari.
27 Ekabha eriibhagha re kwibhora kooche Tamaari ˆrekahika, mbeere‑mu ebhisare mo‑nda yaache. 28 Hano obhosongo bho kwibhora bhomoriire, umu o bhisare bhiire akahoroki okubhökö kooche anche, omotuuti aghakubhöha okubhökö kuyo no orochi rubhararatu, akabhugha, “Uno niwe ashamiri kohoroka.” 29 Amare, hano omoona uyo aghugharokiri okubhökö mo‑nda, ömööbhö niwe ashamiri kwibhoru. Omotuuti akabhugha, “Ngwake iye okahoroka gho changuru?” Gho ghayo, eriina reeche akaroku Bhereesi.a 30 Niho akamara akiibhoru ömööbhö waache uno are no orochi rubhararatu mo‑kubhökö, iwe akaroku Seera.b