Yusubhu ˆakarööta eriröötö
37
Mbe, Yakobho ꞉naamanyiri mo‑se e Kanaani, mo‑se ino ishe are amanyiri‑mu kinya omughëni.2 Ghano nigho amangʼana gha orwibhoro ro Yakobho. Hano Yusubhu are omobhureni o meeka ikomi na mohungate, naare arariishi changʼöndu na chambërëtë haghirohamu na bhaömööbhö, abhaana bha Bhiiriha na Siiribha, abhakari bhi ishe. Yusubhu naare aramobhoorera ishe ighoro e mangʼana amabhe gha bhaömööbhö.
3 Mbe, Yakobhoa ꞉naamosiighiri chwee Yusubhu ghokera abhaana bhaache bhoose, gho kubha naare amwibhwire mo‑bhugharuka bhooche. Niho, amotumiire Yusubhu andachana indë inchömu ino ere iköruru kwo bhukaari. 4 Bhaömööbhö, bhaache korighi kinya ishe amosiighiri chwee Yusubhu kobhakera, bhakamurëgha, koru bhataatoriri ghosiikëra nawe wiiki kwo murëmbë.
5 Orosiko rumu obhotiko, Yusubhu ꞉naaröötiri eriröötö rino riighëriri bhaömööbhö bhamurëghë chwee. 6 Yusubhu aghaye akabhabhoorera akabhugha, “Bhamura, mutëghëërërë eriröötö rino niröötiri. 7 Niröötiri kubha itu bhoose ntoore torabhöha chaasa che changano a‑moghondo. Hayo hayo, asa yaane ekabhooka, ekiimeerera tingʼi. Niho chaasa cheenyu chekaacha kwinaareri asa yaane na kwiihiinya ambërë yaache!”
8 Bhaömööbhö bhakamobhoori bhakabhugha, “Ibheere nokwënda ghotobhoorera iye nookubha oratukangata itu? Nookubha no obhotoro ghotokera itu?” Bhakëëngëra komurëgha chwee ighoro e riröötö na amangʼana ghaache ghayo.
9 Akamara Yusubhu akarööta eriröötö erende wiiki, akabhabhoorera bhaömööbhö akabhugha, “Inyu, mutëghëërërë, niröötiri eriröötö erende. Mo‑riröötö rino, ꞉neerooche eryobha, no omwëri, na chanchöta ikomi ni imu, chihiinyiri ghokoone.”
10 Hano amobhooriire ishe eriröötö riyo, ishe akamuhaarëra gho kobhugha, “N‑iröötö ke riyo? Nokwënda kobhugha eni na nyako, na bhaömöönyu bhoose ntookuucha ghokwihinyera iye mbagha haase?” 11 Abhakoro bhaache bhayo, bhakamorigheri eriihari chwee. Amare, ishe akayetoora angʼana iyo mo‑motema waache, akabha arayihëëbha.
Yusubhu ˆakanaatibhu na bhaömööbhö
12 Orosiko rumu, bhaömööbhö Yusubhu bhaaghaye koriishi chaatugho chi ishe waabho haghuhe na Shekeemu. 13 Niho, Isiraeri akamobhoorera Yusubhu akabhugha, “Kinya weeche, bhaömöönyu mbaghiire koriishi chaatugho iyo Shekeemu. Ibheere nekwënda neghotome ghokoobho.”
Yusubhu akamugharokeri akabhugha, “Taata! Neeghuye nebharighi.”
14 Gho ghayo, ishe akamobhoorera akabhugha, “Nooghi obharighi bhaömöönyu na chaatugho aribha bhaanyi bhoheene. Oramara undëëtërë amake ghaabho.” Niho Yakobho akamotoma Yusubhu koru mo‑möörö o Hebhurooni.
Yusubhu hano ahikiri Shekeemu, 15 omooto umu akamubhöna Yusubhu arataratara mo‑kibhara. Omooto uyo akamobhoori akabhugha, “Neke oghutabhara?”
16 Yusubhu akamugharokeri akabhugha, “Neghutabhara bhaomwito. Iye weeche hano bhakoriisheri chaatugho cheebho omboorere?”
17 Omooto uyo akamobhoorera akabhugha, “Mbaruure hano, gho kubha ꞉neebhooghwire bharabhugha kubha bhaaghaye Tosaani.” Niho, Yusubhu akabhatambana bhaömööbhö mbagha iyo Tosaani.
18 Hano Yusubhu are akeere kurë, bhaömööbhö bhakamorighi, bhaghaköra ekiina ghe komwita. 19 Bhaghaghambana abheene kwo bheene bharabhugha, “Mumööhi! Omurööti o maröötö ˆakaacha. 20 Mbe, ntoghi tomwite, tomurëkërë mwiribha. Toraacha ghuye aka, ntokomobhoorera taata kubha, atyenyi ahaari e mwiteregho nemwitiri. Toramara ntokorighi bhuyo ghaakubha amaröötö ghaache ghayo!”
21 Amare hano Rubheeni oghwire amangʼana ghayo, aghatabhara anchëra e komotoori Yusubhu koru mo‑mabhökö ghaabho. Niho akabhabhoorera abhasuuhu bhaache akabhugha, “Bhamura, totamwita! 22 Motaacha ghwita amasaahë ghaache, amare momurëkërë mwiribha rino hano, koru motamoturi.” ꞉Naabhughiri hangʼu, gho kubha ꞉nëëndiri komotoori Yusubhu koru mo‑mabhökö ghaabho, na aramara amugharoki ghwi ishe.
23 Hano Yusubhu abhahikiire, bhaömööbhö bhakamoruusi angibho yaache yiire anchömu. 24 Bhakamara bhakamughööta, bhakamurëkëra‑mu. Amare eriiribha riyo retaare na amanche.
25 Bhakamara bhaghiikara kuraaghëra. Hano bhaare bhararaaghëra, bhaghaghëgha amiisho ghaabho, bhakarighi omurööbhö o Bhayishimaeri mbaare bhararwera Ghiriyaati bharaghe Miisiri. Changamiya cheebho, ncheere chighëghiri ebheneeso, na seeri na manemane.b
26 Niho Yuuta akabhabhoorera bhaömööbhö akabhugha, “Erabha toramwita omonyi wiito, na kobhisa amasaahë ghaache, m‑bhwëra ke tokubhöna? 27 Konga tomoghori kwo Bhayishimaeri, amare totamwita, iwe n‑omosuuhu wiito, anyama yaache na amasaahë ghaache n‑ghamu na niitu.” Hangʼu nibhu Yuuta abhabhooriire bhaömööbhö, bhoose bhaghiishererani nawe.
28 Hano abhasorocha bhayo Abhayishimaeri bhahikiri hayo, bhaömööbhö Yusubhu bhakamoruusi mwiribha, bhakamoghori kwo riighori re ebheteneka bhe chambiiri miröngö ebhere. Niho Abhayishimaeri bhakamohira Yusubhu mbagha Miisiri.
29 Hano bhamoghoriri Yusubhu, Rubheeni naare kurë na bhaömööbhö, ache ghugharuka mwiribha riire, akabhöna Yusubhu ataanyi‑mu! Hayo hayo aghatandura amaghööti ghaache kwo macheeche. 30 Aghagharuka kwo bhaömööbhö, akabhabhoorera akabhugha, “Yusubhu taanyi mwiribha! Ibheere hayi neeghuye?”
31 Bhakamara, bhaghasincha ambërëtë, bhaghatöbhëka‑mu andachana yiire e Yusubhu mo‑masaahë gha mbërëtë iyo.
32 Niho bhakahira angibho yiire ghwi ishe, bhakabhugha, “Itu ntutööriri angibho ino. Oyimööhi bhoheene, orighi hamwabhe n‑e moona waacho.”
33 Niho ishe waabho akayimööhi, akayimënya, akarera, “Wuuu yaaya! Ino n‑angibho e moona waane! Atyenyi ahaari e mwiteregho, nemurööniri na komure. Mahëënë, Yusubhu natenuru ebhetenekateneka!” 34 Akamara Yakobho aghaghatandura amaghööti ghaache kwo macheeche, akiinata amaghööti gha maghönërac mo‑keribhichi. Akamara chaasiko chaaru aramorerera omoona waache.
35 Abhaana bhaache bhoose, bha ghesubhe na bha ghikari, bhakamutambana komughambisani na komorwacha, amare akaanga bhatamughambisani. Akabhugha, “Montighe bhamura, eni nekwëndërëra komwihiinyërëra omoona waane, mbagha eriibhagha rino neeghoku.” Hangʼu nibhu ishe amoreriire Yusubhu.
36 Hano abhasorocha bhaare bhahikiri Miisiri, bhakamoghori Yusubhu kwo mokoro umu, eriina reeche Bhootibha. Bhootibha naare umu o bhakangati bha mutëmi Bharaawo, na niwe are omokoro o bhaashirikare.