Orwibhoro ro Esaawu
36
Runo niro orwibhoro ro Esaawu, eriina reeche erende niwe Etoomu. 2 Esaawu ꞉naakwiriri abhakari bha mo‑se e Kanaani, Ata omuukë o Erooni, o mo‑se e Bhahiti, na Ohoribhama iwe naare omuukë o Ana no omoochokoro o Sibheyooni o ritöngö re Bhahibhi, 3 na Bhasemati omuukë o Ishimaeri, omosubhaati o Nebhayooti.4 Ata akamwibhorera Esaawu omoona eriina reeche Eribhaasi. Bhasemati woose ꞉naamwibhoriire omoona eriina reeche Rewuweeri. 5 Ohoribhama iwe akamwibhorera abhaana bhatato amariina ghaabho ngaare Yehushi, na Yaraamu na Koora. Bhayo nibho abhaana bha Esaawu bhano ꞉ibhooriire mo‑se e Kanaani.
6 Akamara, Esaawu akiimoki abhakari bhaache, na abhaana bhaache bha ghesubhe na bha ghikari, na abhaato bhoose bha mo‑ka yaache. Wiiki akiimoki na chaatugho cheeche choose, ne ebheghiro bhino are abhwine mo‑se e Kanaani. Niho aghasaamera mo‑se ayende ino enyi kurë no ömööbhö Yakobho. 7 ꞉Naaköriri hangʼu, gho kubha obhwame bhoobho mboore bhwaru chwee koru bhatangatoriri ghwikarana haghirohamu. Ase ino ꞉bhaare bhamanyiri tengabhiishiri bhombe ghwikara na ghotugha chaatugho, kurëngʼaana no obhwaru bho chaatugho cheebho. 8 Gho ghayo, Esaawu, eriina reeche erende niwe Etoomu, aghaye kumanya mo‑bheghoro bhe se e Seyiri.
9 Runo niro orwibhoro ro Esaawu, ishe o Bhaetoomu, abhiikari bha mo‑bheghoro bhe mo‑se e Seyiri. 10 Amariina gha bhaana bha Esaawu nigho ghano, Eribhaasi uno ibhwiru na Ata muka Esaawu, na Rewuweeri uno ibhwiru na Bhasemati omukari owonde.
11 Amariina gha bhaana bha ghesubhe bha Eribhaasi nigho ghano, Temaani, na Omaari, na Seebho, na Ghatamu na Kenaasi. 12 Eribhaasi naare no omurëëkari, eriina reeche naare arabherekeru Tiimuna. Akamwibhorera omoona owonde o ghesubhe, eriina reeche Amareeki. Bhayo nibho abhaachokoro bha Esaawu mo‑mukari waache Ata.
13 Amariina gha bhaana bha Rewuweeri nigho ghano, Nahati, na Seera, na Shama na Miisa. Bhayo nibho abhaachokoro bha Esaawu mo‑mukari waache Bhasemati.
14 Abhaana bhatato bha kebhureni bhano Ohoribhama muka Esaawu amwibhooriire nibho bhano, Yehushi, na Yaraamu na Koora. Ohoribhama uyo naare omuukë o Ana, omoochokoro o Sibheyooni.
Abhakangati bha Etoomu
15 Amariina gha bhakangati bha matöngö gha mo‑rwibhoro ro Esaawu nigho ghano. Eribhaasi uno are omutange, iwe akabhiibhora, Temaani, na Omaari, na Seebho, na Kenaasi, 16 na Koora, na Ghatamu na Amareeki. Bhano nibho bhaare abhakangati bha se e Etoomu. Bhayo bhoose n‑orwibhoro ro Eribhaasi, abhaachokoro bha Ata muka Esaawu.
17 Runo n‑orwibhoro ro Rewuweeri mwërëëti o Esaawu, abhaachokoro bha Bhasemati, Nahati, na Seera, na Shama na Miisa. Omooto woose naare omukangati o se yaache. Bhayo bhoose n‑abhaana bha Rewuweeri mo‑se e Etoomu.
18 Orwibhoro ro Ohoribhama, muka Esaawu niro runo, Yehushi, na Yaraamu, na Koora. Omooto woose naare omukangati o se yaache. Bhayo bhoose, mbaare abhaana bha Ohoribhama, omuukë o Ana.
19 Mbe, ruyo niro orwibhoro ro Esaawu. Omooto woose naare omukangati o ritöngö reeche.
Orwibhoro ro Seyiri
20 Orwibhoro ro Seyiri, o ritöngö re Bhahoori, abhiikari bha mo‑se e Etoomu, nibho bhano. Rootani, na Shobhaari, na Sibheyooni, na Ana, 21 na Tishooni, na Eseeri na Tishaani. Omooto woose naare omukangati o ritöngö reeche, kwo Bhahoori orwibhoro ro Seyiri mo‑se e Etoomu.
22 Abhaana bha Rootani nibho bhano, Hoori na Hemaamu. Tiimuna naare omosubhaati o Rootani.
23 Abhaana bha Shobhaari mbaare, Aribhaani, na Manahati, na Ebhaari, na Sheebho na Unaamu.
24 Abhaana bha Sibheyooni mbaare, Aya na Ana. Ana uyo, niwe arooche ekerika ke manche amatuuku hano are arariishi chaatikere che Sibheyooni, ishe waache.
25 Abhaana bha Ana mbaare, Tishooni no omuukë umu eriina reeche Ohoribhama.
26 Abhaana bha Tishooni mbaare, Hemutaani, na Ishebhaani, na Itiraani na Keerani.
27 Abhaana bha Eseeri mbaare, Bhirihaani, na Saawani na Akaani.
28 Abhaana bha Tishaani mbaare, Usi na Araani.
29 Abhakoro na abhakangati bha Bhahoori nibho bhano, Rootani, na Shobhaari, na Sibheyooni, na Ana, 30 na Tishooni, na Eseeri na Tishaani. Mooto woose naare omukangati o ritöngö reeche mo‑se e Seyiri.
Abhatëmi bha se e Etoomu
31 Hano Isiraeri ere ekeere ghukangatu no omutëmi wowoose wuure, mbaare‑ho abhatëmi bhano bhakangatiri ase e Etoomu. Ghano nigho amariina ghaabho.
32 Bheera omoona o Bheyoori, ꞉naakangatiri ase e Etoomu. Obhwikari bhooche obhokoro, mboore mo‑moghya o Tinihabha.
33 Hano Bheera akuure, omweya waache oghaghöötu na Yobhaabhu mwërëëti o Seera, o mo‑moghya o Bhoosira.
34 Hano Yobhaabhu woose akuure, omweya waache aghaghöötu na Hushaamu o mo‑se e Bhatemani.
35 Hano Hushaamu woose akuure, omweya waache oghaghöötu na Hatati, mwërëëti o Bhetati. Hatati uyo obhwikari bhooche mboore mo‑moghya omokoro uno ore orabherekeru Abhiti. Uno niwe abharööniri na kobhahicha Abhamitiyaani mo‑se e Mowaabhu.
36 Hano Hatati akuure, omweya waache oghaghöötu na Saamura o mo‑moghya o Masireka.
37 Saamura hano akuure, omweya waache oghaghöötu na Shawuri o korwera mo‑moghya o Rehobhooti, uno ore haghuhe no orooche ro Ebhuraati.
38 Hano Shawuri akuure, omweya waache oghaghöötu na Bhaari‑Hanaani, omoona o Akibhoori.
39 Bhaari‑Hanaani omoona o Akibhoori hano akuure, omweya waache oghaghöötu na Hataari. Hataari uyo obhwikari bhooche obhokoro mboore mo‑moghya uno ore orabherekeru Bhaawu, na mukaache naare arabherekeru Mehetabheeri, omuukë o Matireti, omoochokoro o Mesahaabhu.
40 Bhano nibho abhakangati bha rwibhoro ro Esaawu, kurëngʼaana na amatöngö na chaase cheebho, Tiimuna, na Ariibha, na Yeteti, 41 na Ohoribhama, na Era, na Bhinooni, 42 na Kenaasi, na Temaani, na Mibhusaari, 43 na Magheteeri na Iraamu. Bhayo nibho abhakoro bha amatöngö ghano ghasëëmuru na Etoomu, niwe Esaawu ishe o Bhaetoomu. Bhayo bhoose ꞉mbaataruru kurëngʼaana no obhwikari bhoobho na chaase cheebho chino ꞉bhaare bharakangata.