Eryobha ˆrekahëënëhi eriiraghano reeche o‑Yakobho
35
Orosiko rumu, Eryobha rekamobhoorera Yakobho rekabhugha, “Neeni Eryobha rino rekorweriire, hano ore oramungʼösa omokoro waacho Esaawu. Mbe! Bhooka bhwango, oghi wiikare Bheteeri. Onyaabhëkërë‑ho ahaghiro ha koruuseri amaruusi.”2 Niho Yakobho akabhabhoorera abhaato bha mo‑ka yaache na bhoose bhano are nabho akabhugha, “Emisambu ghyose ghe matöngö aghande ghino moonyi naghyo, moghite kurë haare, na mwiyeri. Mugharure amaghööti ghaanyu, mobheeke aghande. 3 Toramara, ntooghuye Bheteeri, kubha neghi neryabhëkërë Eryobha ahaghiro ha koruuseri amaruusi, gho kubha Eryobha riyo, niryo reere rerantoori mo‑rosiko ro nyaako yaane. Wiiki niryo reere haghirohamu na neeni mo‑rughëndö roone.”
4 Bhakamara, bhaghakoma emisambu ghyose ghino ꞉bhaare naghyo, haghirohamu ne ebhinëndë bhe mo‑matu, bhakamuha Yakobho, akabhetukera haase e mote uno okobherekeru omwarooni, haghuhe no omoghya o Shekeemu, niho bhaghatanura. 5 Hano Yakobho na abhaato bhaache bhasëëmiri orughëndö roobho, Eryobha rekabhatiini abhiikari bha meghya ghe rubhareka, kubha bhatasaki kobhatambana.
6 Mbe, Yakobho haghirohamu na abhaato bhaache bhoose bhano are nabho, bhakahika Ruusu, mo‑se e Kanaani. Eriina erende re Ruusu m‑Bheteeri. 7 Hano bhahikiri hayo, akaabhëka ahaghiro ha koruuseri amaruusi, akaharoka Eri‑Bheteeri.a Kino ghighëriri akaharoka hangʼu n‑gho kubha, hayo niho Eryobha riyërëkiini ghokooche, hano are aramungʼösa Esaawu ömööbhö.
8 Kwo riibhagha riyo niryo omurëri o Rebheka uno are arabherekeru Tebhoora, akuure. Akaryeku haase e mote o mwarooni haghuhe na Bheteeri. Gho ghayo, ahaghiro hayo hakabherekeru Arooni‑Bhakuti.b
9 Hano Yakobho are agharokiri koru mo‑se e Bhataani‑Araamu, Eryobha rekamorwera wiiki, na komwitabheri, 10 rerabhugha, “Eriina reecho niiye Yakobho. Amare tokobherekeru wiiki kwo riina riyo, ibheere eriina reecho ndeekubha Isiraeri.”c Hangʼu remorokiri Isiraeri. 11 Eryobha rekamobhoorera wiiki rekabhugha, “Eni n‑Eryobha re Bhotoro Bhoose. Mbe, ubhe no orwibhoro rwaru ro ghokera hayo! Mo‑rwibhoro roocho, nimu rekorwera eritöngö ikoro, na amatöngö maaru, haghirohamu na abhatëmi. 12 Ase ino ꞉nihëërë Abhurahamu na Isaka, niyo neghokuha iye no orwibhoro roocho.” 13 Mbe, hano Omutëmi Waryobha amariri ghosiikëra na Yakobho, akamotigha hayo aghatiira ighoro.
14 Mbe, ahaghiro hano Eryobha resiikiire nawe, Yakobho akiimeereri‑ho ambiro e riibhohe re kimanyenkereri. Akaruusi amaruusi gho kohomerera‑ho adivaayi na amaghuta. 15 Ahaghiro hayo Eryobha resiikiire nawe, Yakobho akaharoka Bheteeri.d
Raheeri ˆaghaku gho komwibhora Bhenchamiini
16 Yakobho na abhahiiri bhaache bhoose bhakëëndërëra no orughëndö roobho ro koru Bheteeri. Hano bhaare bhakeere kohika Ebhuraati, obhosongo bhuhaari bho kwibhora bhokamure na komunyaaki Raheeri. 17 Hano are aranyaaka chwee no obhosongo bhuyo, omotuuti waache akamobhoorera akabhugha, “Otatiina, gho kubha ˆokabhöna wiiki omoona owonde o ghesubhe.” 18 Hano Raheeri are aranyaakani na akörö arateghesana ghoku, akamoroka omoona uyo Bhenooni.e Amare ishe akamoroka Bhenchamiini.f
19 Niho Raheeri aghaku, akaryeku mo‑nchëra yiire eghuye Ebhuraati, niyo Bheserehemu e reero. 20 Mo‑mbeehera yaache, Yakobho akiimeereri‑ho ambiro e eriibhohe. Mbagha reero eriibhohe riyo ndekwërëki hano Raheeri aryekuru.
21 Isiraeri, eriina erende niwe Yakobho, akëëndërëra no orughëndö rooche, na kwabhëka eriibhuru reeche ambërë e munara o Eteeri. 22 Hano Isiraeri are ariikara mo‑se iyo, Rubheeni mwërëëti waache, akamisi na Bhiiriha omurëëkari wi ishe. Isiraeri akooghu amangʼana ghayo.
Abhaana bha ghesubhe bha Yakobho
Yakobho naare na abhaana bha ghesubhe ikomi na bhabhere.
23 Abhaana bha ghesubhe bha Reeya mbaare, Rubheeni omutange o Yakobho, na Simiyooni, na Raawi, na Yuuta, na Isakaari, na Sabhurooni.
24 Abhaana bha ghesubhe bha Raheeri mbaare, Yusubhu na Bhenchamiini.
25 Abhaana bha ghesubhe bha Bhiiriha omutamishi o ghikari o Raheeri mbaare, Taani na Nabhutaari.
26 Abhaana bha ghesubhe bha Siiribha omutamishi o ghikari o Reeya mbaare, Ghaati na Asheeri. Bhano n‑abhaana bha ghesubhe bha Yakobho bhano ꞉ibhooriire mo‑se e Bhataani‑Araamu.
Isaka ˆaghaku
27 Mbe, Yakobho aghagharuka Maamure, o‑Isaka ishe waache, iyo Kiriyaati‑Aribha niho Hebhurooni. Hayo niho Abhurahamu na Isaka ꞉bhaamanyiri kinya abhaghëni. 28 Hano Isaka are ne emeeka eriighana rimu na miröngö enaane, 29 aghaku anyi omugharuka o meeka myaru na ghughöötana na abhaato bhaache. Niho abhaana bhaache Esaawu na Yakobho bhakamoryeka.