Abhaana bha Yakobho ˆbhakarehani asiire
34
Mbe, orosiko rumu, Tiina omuukë o Yakobho uno ibhwiru na Reeya, aghaye ghutaarera abhaakë bha se e Kanaani. 2 Hamoori Omohibhi niwe are omukangati o se iyo. Shekeemu, niwe are mwërëëti waache.Hano Shekeemu amorooche Tiina, hayo hayo akamotimba, akamisi nawe gho changuru. 3 Niho aghachömëru no omuukë uyo, akamosiigha chwee, aghasëëma ghosiikëra nawe amangʼana machömu gho komusasaama. 4 Niho Shekeemu aghaye ghosiikëra na Hamoori ishe waache, akabhugha, “Oo taata, neghoghusabha, ondwachere obhuku bho muuke uno.”
5 Mbe, Yakobho akabhöna amangʼana kubha Shekeemu namusariri omuukë waache Tiina, amare gho kubha abhaana bhaache mbaare a‑keriisho, aghakira na amangʼana ghayo, mbagha hano abhaana bhaache bhagharokiri koru koriishi.
6 Hamoori ishe waache Shekeemu, akamusëëta Yakobho asiikërë nawe. 7 Kwo riibhagha riyo, abhaana bha Yakobho bhaakabha bharuure a‑keriisho, bhaanyi aka. Hano bhooghwire kinya Shekeemu amusariri omuukë waabho, bhaghaghöötu no obhororo, na bhaghakarara chwee, gho kubha amangʼana ghayo n‑gha chaasoni ꞉ghaare kwo Bhiisiraeri. Wiiki m‑moghiro ore ghuköra amangʼana ghanga hangʼu!
8 Niho Hamoori akabhabhoorera akabhugha, “Omoona waane Shekeemu namosiighiri chwee omuukë waanyu. Nekobhasasaama, momwisherereri amokwire! 9 Motighe tubhe torakwirana ghate yiito. Ntookubha torakwira abhaakë bhaanyu. Inyu bhoose morakwira abhaakë bhiito. 10 Inyu moghwikara na niitu, na ase ino neekubha kinya eyaanyu. Mumanye‑mu, mubhe moraköra obhosorocha mwibhönërë obhwame.”
11 Niho Shekeemu akamobhoorera ishe Tiina na bhaömööbhö akabhugha, “Oo bhamura! ˆNekabhasasaama monyisherereri! Eni ghyokyose kino moransabha, nekoruusi. 12 Momboorere ekehingo na atuho, koru mbengabha bhyaru hangʼana hayi eni nekuhaanera, kurëngʼaana na kinya mookubha momboriire. Nekuhaanera, eghekoro, muuhë omuukë uno abhe mukaane.”
13 Mbe, gho kubha Shekeemu naare asariri obhuuke bho Tiina, niho abhaana bhayo bha Yakobho bhakabhagharokeri Shekeemu na Hamoori ishe waache gho kobhangʼiina 14 bharabhugha, “Totaaghotora ghuköra angʼana enga ino. Totaaghotora komokwiri omwito, mo‑mooto uno atasaaruru. Gho ghuköra hangʼu, n‑soni chwee ghokwito! 15 Mbe! Ntoghwishererani na niinyu kwo miishererani ghano, kubha omosubhe woose ghate yaanyu, abhe atubhiine na niitu gho ghusaaru. 16 Hayo niho tokobhakwiri abhaakë bhiito, na niitu ntokobhakwira abhaakë bhaanyu. Niho toghwikarana haghirohamu na ntookubha bhamu. 17 Amare, aribha motaaghwishereri ghusaaru, ntokomwimoki omuukë wiito, toghi nawe.”
18 Hano Hamoori na Shekeemu mwërëëti waache ꞉bhooghwire amangʼana ghayo, bhaghachömëru chwee. 19 Omobhureni uyo Shekeemu, takechiire ghuköra angʼana iyo, gho kubha, naare amosiighiri chwee omuukë uyo o Yakobho. Wiiki naare asookuru ghokera abhaato bhoose bha waabho.
20 Niho, Hamoori na Shekeemu mwërëëti waache, bhaaghaye mo‑kehita ke moghya waabho, ahaghiro hano bhahaakörëra ebhiina, bhakabhabhoorera abhaghëndi bhaabho bhoose bharabhugha, 21 “Abhaato bhano m‑bhasaani bhiito. Ntobhahe omweya, bhiikare haghirohamu na niitu mo‑se yiito na ghuköra obhosorocha, gho kubha ntoonyi na ase e ghotwisha bhombe nabho. Niho toghotora ghokwira abhaakë bhaabho, bhoose bhatore ghokwira abhaakë bhiito. 22 Amare ibho mbaghwishereri ghwikarana na niitu, tubhe bhamu, gho ghwisherererani angʼana imu, kubha mosubhe woose ghate yiito asaaru, kinya ibho bhasaaruru. 23 Ibheere motaakorighi kubha chaatugho cheebho no obhwame bhoose mbookubha bho bhwito? Mbe, ntwishererani nabho kubha bhiikarane haghirohamu na niitu.”
24 Abhasubhe bhoose bhano ꞉bhaare bhiikomiine mo‑kehita, bhaghiishererani na Hamoori na Shekeemu. Niho, abhasubhe bhoose bha moghya uyo bhaghasaaru.
25 Mbe, chiiche koheta chaasiko ishato, korwera hano abhasubhe bhoose bhasaruuru, bhakeere bharooghu obhosongo, abhaana bhabhere bha Yakobho, Simiyooni na Raawi, bhaömööbhö Tiina, bhakiimoki emehyo gheebho, bhakawusöhërëra omoghya otitëngʼiire ghusöhërëru, na ghwita abhasubhe bhayo bhoose. 26 Mo‑bhayo mbaare‑mu, Hamoori haghirohamu na mwërëëti waache, Shekeemu. Bhakamara bhakamwimoki Tiina koru mo‑nyumba e Shekeemu, bhaaghaye nawe.
27 Wiiki abhaana abhande bha Yakobho, bhaaghaye bhakawusöhërëra omoghya uyo, bhakaheta ighoro e mahundughu na kwimoki ebheghiro bhyose, gho kubha omuukë waabho naare asariiru‑mu. 28 Bhakiimoki changʼöndu, chambori, changʼömbë, chaatikere, na gheghiro kyose kino keere mo‑moghya uyo. Na bhyose bhino bheere mo‑meghondo, bhakabhiimoki. 29 Bhakiimoki obhwame bhoobho bhoose, abhaana na abhakari bhoose, ne ebheghiro bhino bheere mo‑chanyumba cheebho.
30 Mbe, Yakobho ache korighi hangʼu, akabhabhoorera Simiyooni na Raawi akabhugha, “Bhamura! Mööhi ibheere! ˆMokandëëtëra ekinaabhi, gho ghunköra nirëghu na abhiikari bha se ino, Abhakanaani na Abhabhereesi. Eni nteenyi na abhaato bhaaru, na aribha bharakomana haghirohamu na kundööna, eni neghosireekereru haghirohamu na abhaato bhaane.”
31 Ibho bhakamugharokeri bharabhugha, “Iwe! M‑bhuhëënë ke are nabho bho komukörëra omuukë wiito kinya omusöngörëëri?”