Yakobho ˆaghatëmëërana na Esaawu
33
Hano rehetiri eriibhagha, Yakobho aghaghëgha amiisho ghaache, akarighi Esaawu araacha na abhaato amaghana ane. Niho akabhanungukani abhaana bhaache kwo Reeya na kwo Raheeri na kwo abhatamishi bhaabho Bhiiriha na Siiribha. 2 Akabhakangati abhatamishi bhaache na abhaana bhaabho ambërë. Niho Reeya na abhaana bhaache bhakabharööbhëra, bhakarööbhëru na Raheeri no omoona waache Yusubhu. 3 Akamara omwene aghakangata ambërë, aghaye ariihiinya mbagha haase gho sooko mara mohungate, mbagha hano amotingʼiri ömööbhö.4 Esaawu hano amorooche Yakobho, aghaye arahe komoturungʼanera, akamutahata akamoghwera mwighöti, bhoose bhaghasëëma korera.
5 Niho Esaawu aghaghëgha amiisho, akarighi abhakari na abhaana, akamobhoori Yakobho akabhugha, “Aa! M‑bhawe bhano onyi haghirohamu nabho?”
Yakobho akamugharokeri akabhugha, “Bhano n‑abhaana bhano Eryobha reheere omutamishi waacho gho ghareeya yaache.”
6 Niho, abhatamishi bhaare bha ghikari haghirohamu na abhaana bhaabho, bhakamwishukerera Esaawu, bhakiihiinya. 7 Akamara Reeya na abhaana bhaache, bhoose bhaghiishuka, bhakiihiinya. Antenero, Raheeri no omoona waache Yusubhu, bhakaacha. Ibho bhoose, bhakiihiinya.
8 Niho Esaawu akamobhoori akabhugha, “Kana! Amakinda ghoose ghano nitemeriine nagho mo‑nchëra, egheteemoro keeche neke?”
Yakobho akamugharokeri akabhugha, “Nechetomiini kubha nibhönë aghareeya koru ghokoocho, omutëmi waane.”
9 Esaawu akamobhoorera akabhugha, “Mwito, eni neenyi ne ebheghiro bhyaru mbekoonyisha. Ebheghiro bhino onyi nabhyo bhibhe bhebheecho iye mwene.”
10 Yakobho akamobhoorera wiiki akabhugha, “Teenyi hangʼu, aribha hëënë wisheriiri ghongënëhi, mbe, neghoghusabha wimoki atuho yaane. Obhuhëënë aribha nerooche obhosho bhoocho, n‑kinya korighi obhosho bho Ryobha, gho kubha nonturungʼaniire gho ghuchömëru chwee. 11 Mbe, neghoghusabha wishereri atuho ino neghotomaniiri, gho kubha koru eni Ryobha ndentooriri, neenyi ne ebheghiro bhyose bhino nekwënda.” Hangʼu nibhu Yakobho amusasaamiri Esaawu, antenero aghaghëgha atuho yaache.
12 Niho Esaawu akamobhoorera akabhugha, “Ntwëndërërë no orughëndö rwito, na neeni neghoghukangata.”
13 Yakobho akamobhoorera akabhugha, “Omutëmi waane, iye nokorighi kubha abhaana bhano m‑bhasuuhu, na chaatugho chino neenyi nacho ncheghughööki, na neeni nekwënda nechetughe, gho kubha cherasendu bhwango, nangabha orosiko rumu, ncheeghoku choose. 14 Mbe, neghoghusabha omutëmi waane ukangate, na neeni omutamishi waacho nekuucha kiihoro kurëngʼaana no orughëndö ro makinda gha chaatugho chino na abhaana, mbagha hano nekohika mo‑se e Seyiri.”
15 Esaawu woose akamobhoorera akabhugha, “N‑kumangi neghotighere abhaato bhaane abhande.”
Amare Yakobho akabhoori, “Ngwake oghuköra hangʼu? Yiishiri kubha niishereriiru bhoheene ambërë e mutëmi waane.”
16 Mbe, orosiko ruyo ruyo, Esaawu aghagharuka Seyiri. 17 Amare iwe Yakobho na abhaato bhaache, bhaaghaye ahaghiro ahande. Hano are iyo, akaabhëka anyumba ne ebhebhuru bhe chaatugho cheeche. Gho ghayo, ahaghiro hayo Yakobho akaharoka Sukooti.a
Yakobho ˆakamanya haghuhe na Shekeemu
18 Hano Yakobho are amungʼösiri Rabhaani, koru Bhataani‑Araamu, antenero akahika bhoheene mo‑moghya o Shekeemu mo‑se e Kanaani, na ghotoora eriibhuru reeche haghuhe no omoghya uyo. 19 Ahaghiro hano are atooriri eriibhuru reeche riyo, akahaghora koru mo‑rwibhoro ro Hamoori, ishe Shekeemu, kwo bheteneka eriighana rimu bhe chambiiri na aghatoora eriibhuru reeche hayo. 20 Hayo akaabhëka ahaghiro ha koruuseri amaruusi na koharoka, Eri‑Eroohe‑Isiraeri.b