Yakobho ˆaghisëëmi ghutëmëërana na Esaawu
32
Yakobho woose akëëndërëra no orughëndö rooche. Hano are mo‑nchëra, aghatëmëërana na bhamarayika bha Ryobha. 2 Hano Yakobho abharooche, akabhugha, “Bhuno n‑obhuraaro bho Ryobha!” Niho akaharoka ahaghiro hayo Mahanayimu.a3 Yakobho akabhatoma abhatamishi bhaache bhamukangate bhaghi kwo ömööbhö Esaawu iyo Seyiri, mo‑se e Etoomu. 4 Yakobho akabhabhoorera akabhugha, “Moghi momobhoorere omutëmi waane Esaawu kubha, omutamishi waacho Yakobho abhugha, ‘Niikeere mo‑bhughëni o‑Rabhaani mbagha ibheere. 5 Neenyi na changʼömbë, na chaatikere, na changʼöndu, na chambori, na abhatamishi bha ghesubhe na bha ghikari. Ibheere ˆneghaghotomera amangʼana ghano omutëmi waane, kubha mo‑nchëra neenyi neraacha, nerahika nibhönë aghareeya ambërë e miisho ghaacho.’”
6 Ibheere abhatamishi bhayo bhaaghaye, bhakamara bhaghagharuka, bhakamobhoorera Yakobho bhakabhugha, “Ntohikiri o‑ömöönyu Esaawu, woose mo‑nchëra anyi akuucha ghoghoturungʼanera. Wiiki naanyi na abhasubhe amaghana ane.” 7 Niho Yakobho aghatiina chwee na ghwitumata, aghataani abhaato bhano are nabho haghirohamu na chaatugho chino are nacho, changamiya, na changʼöndu, na chambori, ne ebhende bhyose bhino are nabhyo amakinda abhere. 8 ꞉Niihëëbhiri kubha, aribha Esaawu araacha na kurööna erikinda erimu, erende rino reekubha risaaghiri ndeghotora kungʼösa.
9 Akamara Yakobho aghasabha akabhugha, “Oo Eryobha re sookoro waane Abhurahamu, ne Eryobha re taata waane Isaka, Omutëmi Waryobha uno ombooriire nigharuke mo‑se yaane, kwo bhahiiri bhaane, okandagha kubha noghunkörëra amachömu. 10 Eni nteekurëngʼaanera ghukörëru bhoheene koru hasuuhu kinya obhuchömu bhuno ꞉unköriire kwo bhuhëënë eni omutamishi waacho. Hano nitëënyiri orooche runo ro Yorotaani, n‑ahimbo ayeene neere nayo mo‑kubhökö koone, amare ibheere neenyi na amakinda ghano abhere. 11 Eni neghoghusabha, ontoori koru mo‑mabhökö gha womwito Esaawu, gho kubha neghotiina kubha nakuucha kundööna, na koonyita haghirohamu na abhakari na abhaana bhaane. 12 Amare, iye nundaghiri ghunkörëra bhoheene na korwengera orwibhoro roone kubha rwaru kinya omwishekeenya o mo‑nyancha, uno otaghotoru kubharu.”
13 Obhotiko bhuyo, Yakobho akamisi hayo. Mo‑bheghiro bheeche bhino are nabhyo, akaahura bhino akomuha Esaawu, ömööbhö. 14 Akaahura chambërëtë, chankari amaghana abhere, na chandome miröngö ebhere, changʼöndu, chankari amaghana abhere, na changuruki miröngö ebhere. 15 Wiiki akaahura changamiya chankari miröngö etato haghirohamu ne ebhimööri bheebho, changʼömbë chankari miröngö ene na chaheeri ikomi, na chaatikere chankari miröngö ebhere na chaheeri che chaatikere ikomi.
16 Ibheere akabhaghööti abhatamishi bhaache, omooto woose ne erikinda reeche, akabhabhoorera akabhugha, “Mukangate ambërë yaane, na mubhe moratigherana omweya ghate e makinda ghaanyu.” 17 Akamuraghereri uno aghukangata kubha, “Hano oghutëmëërana no omwito Esaawu, arakobhoori, ‘Iye n‑omutamishi waawe onyi? Hayi oghuye? Na chaatugho chino n‑cha we?’ 18 Mbe, iye omugharokeri obhughe, ‘Chaatugho chino n‑che omutamishi waacho Yakobho. Nechetomiini chiyo chibhe atuho yaacho iye omutëmi waane Esaawu. Iwe omwene n‑anyuma hayo anyi aghotutambana.’”
19 Wiiki Yakobho akamuraghereri omutamishi o rikinda re kabhere, na re ghatato na aghande ghoose ghano gharöbhiire, akabhugha, “Hano moghutëmëërana na Esaawu, momobhoorere amangʼana ghayo ghayo. 20 Wiiki motatigha kobhugha kubha, ‘Omutamishi waacho Yakobho, n‑anyuma hayo anyi aghotutambana.’”
Yakobho ꞉naabhughiri hangʼu gho kubha ꞉niihëëbhiri kubha, hamwabhe nakomuhörëëri gho chaatuho chino amukangatiiri, hano akuucha korighani nawe kwo miisho, nyaghwisha nakomwishereri.
21 Gho ghayo, aghakangati chaatuho cheeche, amare iwe akamisi haare haare obhotiko bhuyo.
Yakobho ˆaghakiringichana ne Eryobha
22 Obhotiko bhuure bhuure, Yakobho akabhooka, akiimoki abhakari bhaache bhabhere, na abhatamishi bhaache Siiribha na Bhiiriha, na abhaana bhaache ikomi na umwa, akabhatëënyi amwambuko o ghitaaro ke Yabhooki. 23 Wiiki akamboki ebheghiro bheeche bhyose, akamara aghagharuka.
24 Yakobho aghasaagha omwene chiri. Niho omooto umu akaacha aghakiringichana nawe mbagha atabhoori moomake. 25 Hano omooto uyo arooche kubha taaghotora komokinda Yakobho, akamohuna mo‑nyinga e morubhabhare bho haase. Yakobho akiibhena mo‑choghochogho hano are arakiringichana nawe. 26 Niho, omooto uyo akabhugha, “Nontighe nighëndë gho kubha ˆbhooghake.”
Amare, Yakobho akamugharokeri akabhugha, “Nteeghoghotigha oghi aribha otanyitabhiiri!”
27 Omooto uyo, akamobhoori, “Eriina reecho, niiye we?”
Yakobho akamugharokeri akabhugha, “Eriina reene neeni Yakobho.”
28 Omooto uyo akamobhoorera akabhugha, “Tokobherekeru Yakobho wiiki, amare ubhe orabherekeru Isiraeri,b gho kubha nokiringichiine ne Eryobha, na abhaato abhande, oghakinda.”
29 Niho Yakobho akamobhoorera akabhugha, “Neghoghusabha omboorere eriina reecho.”
Amare, omooto uyo akamugharokeri akabhugha, “Ngwake okomboori eriina reene?” Akamara akamwitabheri iyo.
30 Niho, Yakobho akaharoka ahaghiro hayo Bhenuweeri,c akabhugha, “N‑gho kubha, nerochiine ne Eryobha obhosho kwo bhosho, ntekuure!”