Yakobho ˆakamungʼösa Rabhaani
31
Mbe, Yakobho akooghu amangʼana kubha, abhaana bha Rabhaani mbakwirereeri gho kobhugha, “Yakobho ˆaghaghëgha ebheghiro bhyose bhe taata wiito, nibhyo bhekamwamihi hangʼu.” 2 Yakobho hano arooche obhosho bho Rabhaani, akamënya kubha, tamosiighiri kinya are amosiighiri hayo ekimbërë.3 Niho, Omutëmi Waryobha akamobhoorera Yakobho akabhugha, “Gharuka mo‑se e bhiisokoro, ne e bhahiiri bhaacho. Eni neekubha haghirohamu na niiye.”
4 Mbe, Yakobho aghatoma abhaato bhabhabherekere abhakari bhaache, Raheeri na Reeya, kubha bhatëmëërane a‑keriisho, hano are arariisheri chaatugho cheeche. 5 Hano ꞉bhaahikiri, akabhabhoorera akabhugha, “Nerighi kubha iso taghansiigha kinya are ansiighiri ekimbërë. Amare Eryobha re taata waane, ndibheere haghirohamu na neeni. 6 Mweche kubha nemuhökiiri iso, gho changuru cheene choose. 7 Iwe, nangʼiiniri gho ghugharura amareho ghaane mara ikomi. Koru hangʼu Eryobha retamwishereriiri anyahaare.
8 “Iso hano abhughiri, ‘Chaatugho che matondetonde, ncheekubha amareho ghaacho,’ niho chaatugho choose chekiibhoru che matondetonde. Hano abhughiri, ‘Chaatugho choose che mingʼöörë, ncheekubha amareho ghaacho,’ niho wiiki chaatugho choose chekiibhoru che mingʼöörë. 9 Hangʼu nibhu Eryobha ꞉riimokiri chaatugho chi iso, rekaaha eni.
10 “Orosiko rumu, hano reehikiri eriibhagha re chaatugho ghughëgha chanda, nekarööta eriröötö. Mo‑riröötö riyo nekarighi chandome choose chino cheere cherarehi n‑che mingʼöörë, na che matondetonde, na che makabhara. 11 Marayika o Ryobha aghasiikëra na neeni mo‑riröötö riyo arabhugha, ‘Oo Yakobho!’ Neghiitabha nerabhugha, ‘Niho neenyi!’
12 “Akamboorera akabhugha, ‘Mööhi, chandome choose chino chekorehi n‑che mingʼöörë, na che matondetonde, na che makabhara, gho kubha nerooche kinya Rabhaani aghuköriire. 13 Eni, neeni Eryobha riire riire rekorweriire Bheteeri, ahaghiro hano undaheriiri gho ghotoora ambiro na koyehomeerera amaghuta. Ibheere, bhooka oru mo‑se ino, ugharuke mo‑se ino wibhoriiru.’ ”
14 Niho Raheeri na Reeya bhakamugharokeri Yakobho bhakabhugha, “Itu ntooghuye na niiye gho kubha ghetaanyi‑ho wiiki gheghiro kino toghughabha awiito. 15 Iwe naghotubhara itu kinya abhaghëni, gho kubha natoghoriri, ne ebheghiro bhino are atoghoriri namariri kobhire bhyose. 16 Mahëënë obhwame bhoose bhuno, Eryobha ndebhughëghiri koru gho taata wiito, m‑bho bhwito, itu na abhaana bhiito. Mbe, ghoose ghano Eryobha rekobhooriire, oghakörë.”
17 Niho, Yakobho aghisëëmi mo‑rughëndö, aghatiiri abhaana bhaache na abhakari bhaache mo‑changamiya. 18 Akiimoki chaatugho cheeche choose, haghirohamu no obhwame bhooche bhoose bhuno abhwine Bhataani‑Araamu. Aghasëëma orughëndö ro ghugharuka mo‑se e Kanaani, o‑Isaka ishe waache.
19 Hano bhaare bhakeere ghutanura, eriibhagha riyo Rabhaani naare aghiire konunga amachööki gha changʼöndu cheeche. Gho ghayo, Raheeri ꞉naabhwine omweya o kwibha emisambu ghe kubhaacha ghi ishe.
20 Hano Yakobho ꞉atanwire, woose ꞉naamongʼiiniri Rabhaani, Omushaami, aghatanura atamuraghiri. 21 Gho ghayo, Yakobho akiimoki obhwame bhooche bhoose bhuno abhwine o Rabhaani, akamungʼösa. Akamara aghatëënya orooche ro Ebhuraati, akëërëkëra eribhaara re bheghoro bhe Ghiriyaati.
Rabhaani ˆakamotuna Yakobho
22 Hano cheere chehetiri chaasiko ishato, Rabhaani akabhooreru kubha Yakobho ˆakangʼösa. 23 Niho, Rabhaani akabhakoma bhaömööbhö, bhakamotuna Yakobho gho chaasiko mohungate, bhakamubhöna mo‑bheghoro bhe Ghiriyaati. 24 Niho Eryobha rekamorwera Rabhaani, Omushaami mo‑riröötö obhotiko, rekamobhoorera rekabhugha, “Wikabhaahe, otamukörëra Yakobho angʼana yoyoose yiire!”
25 Hano Rabhaani amobhwine Yakobho mo‑bheghoro bhe Ghiriyaati, Yakobho naare asimiri eriibhuru reeche hayo. Rabhaani woose, haghirohamu na bhaömööbhö, ibho bhoose bhaghasimi amabhuru ghaabho hayo.
26 Niho, Rabhaani akamobhoorera Yakobho akabhugha, “Iye! Neke kino ˆoghankörëra? Nghwake ˆokangʼiina, ˆokabhiimoki abhaakë bhaane kinya bhano bhaghööturu mwihe! 27 Ngwake ungʼösiri gho kwibhisa, tomboriire, kubha nekuraghe gho ghuchömëru, na kwo myembo ne ebhitome ne ebherereesi? 28 Ngwake otaheere eriibhagha re kuragha abhaakë bhaane nangabha abhaachokoro bhaane gho kobhatahata? Gho ghuköra hangʼu, nuköriri ghighëëghë!
29 “Neenyi no obhotoro bho ghokunyahaara, amare, obhotiko bho kobhookera reero, Eryobha ri iso Isaka ndembooriire rekabhugha, ‘Wikabhaahë, otamukörëra Yakobho angʼana yoyoose yiire!’ 30 Nyeeche kubha noonyi na amiigha chwee gha ghugharuka awaanyu kwo bhiibhori bhaacho, nikyo ꞉ghiighëriri okabhooka gho kwibhisa. Amare, ngwake wiibhiri emisambu gheene ghe kubhaacha?”
31 Yakobho akamugharokeri Rabhaani akabhugha, “꞉Niingʼösiri gho kwibhisa gho kubha ꞉neetiiniri, neghiituuri kubha nokuhöka abhaakë bhaacho gho changuru. 32 Ibheere oramubhöna omooto wowoose uno anyi ne emisambu gheecho, atabha muhöru! Ambërë e bhahiiri bhiito, wërëki egheghiro ghyokyose kino keenyi ghekeecho, ughëghë.” Kwo riibhagha riyo, Yakobho taare eche kubha Raheeri niibhiri emisambu ghe kubhaacha ghi ishe. 33 Niho, Rabhaani aghatabhara emisambu gheeche mo‑riibhuru re Yakobho, na Reeya, na abhatamishi bhaare bhabhere, amare taatoriri ghoghibhöna.
Antenero aghasöha mwibhuru re Raheeri. 34 Hano Rabhaani are akeere kohika, Raheeri akiimoki emisambu ghiyo, aghaghebhisa haase e maraarero gha ngamiya. Aghiikara ighoro yaache. Rabhaani aghaghitabhara mwibhuru ryose, tagherooche.
35 Niho Raheeri akamobhoorera ishe akabhugha, “Ongwere bheghongi taata, otakarara, nteeghotora kwimeerera ambërë yaacho, gho kubha neenyi mo‑chaasiko cheene.” Niho, Rabhaani aghatabhara emisambu gheeche ghiyo, amare taaghabhwine.
36 Gho ghayo, Yakobho aghakarara chwee, akamobhoori Rabhaani akabhugha, “Neke neghusareriiri mbagha ˆokaacha orantuna hangʼu?” 37 N‑gheghiro ke ghekeecho kino ˆokabhöna mo‑merigho gheene, kino ghighëriri ˆoghataaghori emerigho gheene ghyose? Okyërëki ambërë e bhahiiri bhaane, na abhahiiri bhaacho, ibho bhatutaani itu bhabhere.
38 “Niikeere awaacho emeeka miröngö ebhere. Na kwo riibhagha riyo ryose, teere‑ho ambërëtë, koru angʼöndu yaacho ino eteere anda, koru nteriire anguruki mo‑rikinda reecho. 39 Ntiimara nkurëëtëra atugho yaacho ino yiituru na atyenyi e mwiteregho, amare neere ndareha eni mwene! Wiiki iye noore orandehi ghyokyose kino kiibhuru obhotiko hande omwishe.
40 “Eni eriimanya reene hangʼu reere, omwishe neghatëmu no omu, no obhotiko neghatëmu na ambeho, na nekabhori chandöörö. 41 Niikeere haghirohamu na niiye emeeka miröngö ebhere ghyose kwo nyaako. Nekuhökiiri emeeka ikomi ne ene, gho ghiri e ghokwira abhaakë bhaacho bhabhere, ne emeeka eghende esaasabhe, nekariishi chaatugho cheecho. Amare iye nugharwire amareho ghaane mara ikomi!
42 “Kinya Eryobha re sookoro Abhurahamu, Eryobha rino resookuru na taata waane Isaka ndengabheere retabha eribhaara reene, obhuhëënë nongantighiri nitanure amabhökö bhoowa! Amare Eryobha niryo rerooche anyaako yaane ne emeremo emiköngʼu ghino ꞉niiköriri kwo mabhökö ghaane, reghaghushaangʼi obhotiko bho kobhookera reero.”
Yakobho na Rabhaani ˆbhaghatoora eriiraghano
43 Rabhaani akamugharokeri akabhugha, “Bhano n‑abhaakë bhaane, abhaana bhayo n‑abhaachokoro bhaane, na amakinda gha chaatugho ghano n‑ghaghaane, na bhyose bhino okorighi hano m‑bhebheene. Amare ibheere neghotora ghuköra ke ighoro e bhaakë bhaane, na abhaana bhaabho bhano bhiibhwire? 44 Mbe, ibheere, ntukörë eriiraghano. Eriiraghano riyo, ribhe obhwibhateri ghate yaacho na neeni.”
45 Niho Yakobho aghaghëgha eriibhohe, akarimeereri kinya ambiro e kobhahiiti. 46 Akabhabhoorera bhoose akabhugha, “Mokome amabhohe!” Bhoose bhaghakoma amabhohe bhakiiri erituumu. Niho bhakamara bhakaraaghëra ebhiinyakurë haghuhe ne erituumu riyo re mabhohe. 47 Rabhaani akaharoka ahaghiro hayo gho ghighambo ghe Kiyaramayiki Yeghaarisahatuta.a Amare Yakobho iwe akaharoka ahaghiro hayo Ghareeti, mo‑ghighambo ghe Kebhuraaniya n‑erituumu re kobhahiiti.
48 Rabhaani akamobhoorera Yakobho akabhugha, “Erituumu rino re mabhohe, n‑ekibhateri ghate yaacho na neeni reero.” Nikyo ꞉ghiighëriri bhakaharoka Ghareeti. 49 Erituumu re mabhohe riyo wiiki rekaroku Miisibha,b gho kubha Rabhaani ꞉naabhughiri, “Amiisho gha Mutëmi Waryobha, ghatumööhërëri bhombe, nangabha totaanyi haghirohamu. 50 Orabhanyaaki abhaakë bhaane, hande orakwira abhakari abhande ghokera bhano, ohiite kubha Eryobha niryo eriibhateri ghate yaane na niiye, nangabha ataanyi‑ho koru omwibhateri umu uno aghotorighi.”
51 Rabhaani akamobhoorera Yakobho wiiki akabhugha, “Mööhi erituumu rino re mabhohe, na ambiro ino ꞉niimeeriiri ghate yaane na niiye. 52 Erituumu re mabhohe na ambiro ino nikyo ekyërëkërëri kubha eni ntekwambuka erituumu rino ghokunyahaara, iye woose tokwambuka ambiro ne erituumu rino kuucha eribhaara reene kunyahaara. 53 Eryobha re Abhurahamu, ne Eryobha re Nahoori, Eryobha re bhataata bhiito, retutaani ghate yiito!” Niho, Yakobho akaraheri kwo riina re Mutëmi Waryobha, uno asookuru na taata waache Isaka. 54 Niho, Yakobho akaruusi amaruusi, iyo mo‑gheghoro, na kobharaghani bhahiiri bhaache, kubha bhaache bharaaghërë haghirohamu. Hano bhamariri kuraaghëra, bhakamisi hayo.
55 Atabhoori moomake, Rabhaani akabhooka, akabhatahata abhaachokoro na abhaakë bhaache, akabhiitabheri. Akamara aghatanura aghagharuka awaache.