30
Hano Raheeri arooche kubha takomwibhorera Yakobho abhaana, aghasëëma komorigheri ömööbhö eriihari. Akamobhoorera Yakobho akabhugha, “Numbönërë abhaana, aribha taanyi hangʼu, neeghoku!”2 Yakobho akamukararëra chwee Raheeri, na akamobhoorera akabhugha, “Kana! Eni n‑Eryobha, rino rekuhööchëriire otiibhora?”
3 Niho Raheeri akamobhoorera akabhugha, “Omutamishi waane Bhiiriha naanyi hano, omisi nawe kubha anyiibhorere abhaana. Gho kohetera ghokooche, na neeni woose nibhe no orwibhoro.”
4 Niho Raheeri akamuha Yakobho omutamishi waache Bhiiriha abhe omurëëkari waache, Yakobho akamisi nawe.
5 Bhiiriha akabhöna anda, akamwibhorera Yakobho omoona o kebhureni. 6 Niho Raheeri akabhugha, “Eryobha ndinköriire bhoheene, ndyoghwire amasabhi ghaane, naaheere na neeni woose omoona o ghesubhe.” Gho ghayo, akamoroka Taani.a
7 Bhiiriha omutamishi o Raheeri akabhöna anda wiiki, akamwibhorera Yakobho omoona o kabhere o kebhureni. 8 Wiiki Raheeri akabhugha, “ˆNekahendana chwee no omwito, ˆnekamokera.” Gho ghayo, akamoroka omoona uyo, Nabhutaari.b
9 Hano Reeya arooche kubha aghatigha kwibhora, akiimoki Siiribha omutamishi waache, akamuha Yakobho abhe omurëëkari waache. 10 Siiribha akamwibhorera Yakobho omoona o kebhureni. 11 Niho Reeya akabhugha, “Runo n‑orubhango ruchömu!” Gho ghayo, akamoroka Ghaati.c
12 Siiribha omutamishi o Reeya, akamwibhorera Yakobho omoona o kabhere o kebhureni. 13 Niho Reeya akabhugha, “Ngʼoni eni! Ibheere abhakari bhaghëndi bhaane, mbakomberekera ngʼoni.” Gho ghayo, akamoroka Asheeri.d
14 Eriibhagha re ghughësa angano, Rubheeni aghaye a‑moghondo, akabhöna chatungucha,e akamurëëtëra nyina waache Reeya. Niho Raheeri akamobhoorera Reeya akabhugha, “Neghoghusabha uhe chatungucha echimu che moona waacho.”
15 Nawe Reeya akamobhoorera akabhugha, “Kana, teghwishiri konduusi omosubhe waane? Wiiki nokwënda kwimoki na chatungucha che omoona waane?”
Raheeri akabhugha, “Oraaha chatungucha che moona waacho, reero Yakobho nakuucha komisi mo‑moocho.”
16 Omughörööbha hano Yakobho are aragharuka koru a‑moghondo, Reeya aghaye komoturungʼanera akamobhoorera akabhugha, “Reero nokwëndëru omisi mo‑moone. Nekobhwine gho koruusi chatungucha che omoona waane.” Niho Yakobho akamisi o‑Reeya obhotiko bhuyo.
17 Eryobha reghaghatëghëërëra amasabhi gha Reeya, aghaghëgha anda, akamwibhorera Yakobho omoona o ghataano o kebhureni. 18 Reeya akabhugha, “Omutëmi Waryobha akandeha, gho kubha nemoheere mosubhe waane omutamishi waane!” Gho ghayo, akamobherekera Isakaari.f
19 Reeya akabhöna anda wiiki, akamwibhorera Yakobho omoona o ghasaasabhe o kebhureni. 20 Akabhugha, “Eryobha ndeheere atuho inchömu. Ibheere, mosubhe waane naghonsooka, gho kubha nimariri komwibhorera abhaana bhasaasabhe bha ghesubhe.” Gho ghayo, omoona uyo, akamoroka Sabhurooni.g 21 Antenero Reeya akamwibhora omoona o ghikari, akamobherekera Tiina.
22 Rekamara Eryobha rekamohiita Raheeri, rekooghu amasabhi ghaache, rekamuha obhotoro bho kwibhora. 23 Raheeri akabhöna anda, akiibhora omoona o kebhureni, akabhugha, “Kwi ibheere, Eryobha ndenduusiri chaasoni.” 24 Akamoroka omoona uyo Yusubhu,h gho kubha ꞉naabhughiri, “Omutëmi Waryobha anyëngërë omoona owonde o kebhureni.”
Yakobho ˆakaamiha
25 Hano Raheeri ꞉amariri kwibhora Yusubhu, Yakobho akamobhoorera Rabhaani akabhugha, “Nonyisherereri nigharuke awiito, mo‑se yaane. 26 Uhe abhakari bhaane na abhaana bhaane, bhano ꞉neebhabhwine gho ghokuhökëri. Iye mwene weeche kinya nekuhökiiri bhoheene, nonyisherereri nebhooke nabho.”
27 Rabhaani akamobhoorera akabhugha, “Neenyi ne eriisabhi reene. Orasiigha ghunkörëra amachömu, mbe, neghusabha wëndërërë ghwikara na neeni hano, gho kubha gho kuraghoru koone, nerooche kubha Omutëmi Waryobha nanyitabhiiri gho ghiri yaacho. 28 Omboorere amareho ghaacho, neghokoreha.”
29 Yakobho akamobhoorera, “Iye mwene weeche kinya nekuhökiiri. Gho kohetera ghokoone, weeche kinya chaatugho cheecho chibheere chaaru. 30 Hano neere nekeere kohika, weeche ebheghiro bheecho bhesuuhu bheere, amare korwera hano nehikiri awaacho, Omutëmi Waryobha aghaghwitabheri, bhekiyëngëra chwee hohoose hano neghiire. Mbe, ibheere, nyingake nekobhahökëri abhaato bhaane eni mwene?”
31 Rabhaani akamobhoori akabhugha, “Nekuhë ke?”
Yakobho akamugharokeri akabhugha, “Eni otaaha ghyokyose, amare aribha noghunkörëra kinya neghokobhoorera, nekwëndërëra koriishi chaatugho cheecho na ghochechonga. 32 Onyisherereri nehete mo‑chaatugho reero, nyaahure changʼöndu choose che makabhara na che matondetonde ne echiirabhuru, na chambërëtë che makabhara na che matondetonde. Ghayo nigho ghaakubha amareho ghaane. 33 Gho ghayo, chaasiko chino chekuucha, obhuhëënë bhoone mbokorighibhu haheero hano okuucha kumööhi amareho ghaane. Mo‑chaatugho cheene, chambërëtë choose chino chetaanyi na amakabhara koru che matondetonde, hamu changʼöndu choose chino chetaanyi echiirabhuru cherarighibhu mo‑rikinda reene, chibharu kubha nchiibhuru.”
34 Rabhaani akamugharokeri akabhugha, “M‑bhoheene! Ghyokyose kino obhughiri, ˆneghaghiishereri.” 35 Orosiko ruyo ruyo, Rabhaani aghaye akaahura chandome choose che mingʼöörë na amakabhara, chambërëtë chankari choose chino cheere na amakabhara na che matondetonde, chaatugho chiyo choose chino cheere na amabhwashi ameero mo‑mobhere, na changʼöndu choose echiirabhuru, choose chiyo akabhaha bhaana bhaache bhachechonge. 36 Akamara Rabhaani akingʼara kurë na Yakobho, ahaghiro ha rughëndö ro chaasiko ishato. Iwe Yakobho aghasaagha arariishi chaatugho che Rabhaani chino chisaaghiri.
37 Yakobho akiimoki chandighi imbese, mo‑chaasa che mete ghe murubhuna, na che muroosi na che mwaramooni. Aghachoomori amaghökö, mbagha emingʼöörë emyero ghekarighibhu. 38 Aghachimeereri chandighi chiyo omwiri, ambërë e chaatugho chiyo mo‑matore gha konyiisheri. Hano chaatugho chekubha cheraacha kunyo manche, cherehi, chighëgha chanda. 39 Chaatugho chino ꞉chiighëghiri chanda ambërë e chandighi chiyo, chekiibhora chaatugho che mingʼöörë, na che matondetonde na che makabhara. 40 Yakobho akaahura ebhinyana bhe changʼöndu koru mo‑rikinda re Rabhaani. Akamara akabhyerekeri mo‑chaatugho che mingʼöörë ne echiirabhuru mo‑rikinda re Rabhaani. Gho nchëra iyo Yakobho akabhöna erikinda reeche omwene, koru tachisangeriini na che Rabhaani.
41 Hano chaatugho che mebhere emichömu cheere chërëënda korehi, Yakobho naare aratoora chandighi chiire ambërë e chaatugho mo‑matore gha konyiisheri amanche kubha cherehi haghuhe na chandighi chiire, chighëghë chanda. 42 Amare mo‑chaatugho chanduuku, tatooriri chandighi chiyo. Niho, Rabhaani akabha na chaatugho chanduuku, na Yakobho akabha na chaatugho chaanoru. 43 Antenero Yakobho akaamiha chwee, akabha na chambori chaaru, na chaatikere, na changamiya haghirohamu na abhatamishi bha ghikari na bha ghesubhe.