Yakobho ˆakahika o‑Rabhaani
29
Akamara Yakobho akëëndërëra no orughëndö rooche, akahika mo‑se e bhaato bha roghoro. 2 Niho akarighi eghesima mo‑kibhara, na amakinda atato gha changʼöndu gharyanyiri haghuhe nakyo, gho kubha hayo niho abhariishi ꞉bhaare bharanyiisheri. Eghesima kiyo nkeere kehunyuru ne eriibhohe ikoro. 3 Amakinda ghoose gha changʼöndu ngahiikomana rubhareka ro ghesima kiyo, abhariishi bhayo, mbahahiringiti eriibhohe riyo, kubha bhachitahërë amanche chenyo. Bharaamara bhakehunya ne eriibhohe riyo wiiki.4 Niho Yakobho akabhabhoori abhariishi bhayo akabhugha, “Bhahiiri bhaane, inyu n‑abhaato bha hayi moonyi?”
Nabho bhakamugharokeri bhakabhugha, “Itu n‑abhaato bha Haraani toonyi.”
5 Yakobho akabhabhoori wiiki akabhugha, “Momweche Rabhaani omoochokoro o Nahoori?”
Nabho bhakamugharokeri bhakabhugha, “Hee, ntomweche.”
6 Yakobho akëëndërëra kobhabhoori, “Iwe m‑muhöru?”
Nabho, bhakamugharokeri bhakabhugha, “Hee, m‑muhöru, mööhi, koru omuukë waache Raheeri kawuure haare akuucha na changʼöndu.”
7 Yakobho akabhabhoorera wiiki akabhugha, “Ndighi hakeere omwishe, na taanyi eriibhagha re koryanyi changʼöndu. Mbe, monyiishi changʼöndu, moramara mughëndë ghocheriishi.”
8 Abhariishi bhayo, bhakabhugha, “Tiyaanyi, totaaghotora ghochenyiishi, mbagha amakinda ghoose ghabhe ghiikomiine haghirohamu, ne eriibhohe rino rehunyiri mo‑ghesima, ribhe rehiringituru, niho tochenyiishi changʼöndu.”
9 Hano Yakobho are akeere arasiikëra na abhariishi bhayo, Raheeri akahika hayo, anyi na changʼöndu chi ishe, gho kubha niwe are omoriishi. 10 Hano Yakobho amorooche Raheeri omuukë o Rabhaani, ömööbhö nyina, haghirohamu na changʼöndu che nyinarome, aghaye mo‑ghesima. Hano ahikiri, akarehiringiti eriibhohe riire, akanyiishi changʼöndu che nyinarome. 11 Niho akamutahata Raheeri na aghasëëma korera kwo riiraka ikoro. 12 Yakobho akamobhoorera Raheeri kubha iwe m‑mohiiri wi ishe, na kubha iwe n-omoona o Rebheka. Hayo hayo, Raheeri aghaye arahe awaabho, akahika akomobhoorera ishe amangʼana ghayo.
13 Hano Rabhaani oghwire amangʼana ighoro e Yakobho mwiho waache, aghaye arahe komoturungʼanera. Niho akamutahata na komoghënëhi awaache. Yakobho aghasëëma komobhoorera amangʼana gha bhohiiri bhoobho. 14 Niho Rabhaani akamobhoorera akabhugha, “M‑bhoheene, iye n‑omohiiri waane onyi o mo‑bhyanda, na amasaahë ghiito n‑ghamu.” Yakobho aghiikara omwëri moghima, anyi o‑nyinarome.
Yakobho ˆakabhakwira Reeya na Raheeri
15 Omwëri uyo uche ghosira, Rabhaani akamobhoorera Yakobho akabhugha, “Iye m‑mwiho waane onyi, amare iyo teghughëri kubha uhökëri bhoowa. Nomboorere hangʼana hayi okwënda nekorehe.”
16 Rabhaani naare na abhaakë bhabhere, omokoro naare arabherekeru Reeya, no omonyi Raheeri. 17 Reeya amiisho ghaache ghataare machömu, amare Raheeri iwe muchömu are no oghesho gheghotegheri. 18 Yakobho naare amosiighiri Raheeri, niho akamobhoorera Rabhaani akabhugha, “Neghokuhökëri emeeka mohungate, onkwiri Raheeri omuukë waacho omonyi.”
19 Rabhaani akabhugha, “M‑bhoheene neghokwiri Raheeri, ghokera komokwiri kwo mooto owonde wowoose wuure. Andereya ghwikara na neeni hano.” 20 Mbe, Yakobho akamuhökëri Rabhaani emeeka mohungate, gho komokwira Raheeri. Iwe ghokooche akarighi kubha n‑chaasiko insuuhu hangʼu kurëngʼaana no obhosiighi bhuno are nabho kwo Raheeri.
21 Niho Yakobho akamobhoorera Rabhaani akabhugha, “Eriibhagha rino tughambiine kubha nekuhökëri ˆreghasira, mbe, nuuhë omukari waane nemwimoki.”
22 Mbe, Rabhaani aghaköra obhughëni na kobharaghani abhaato bhoose bha iyo. 23 Amare hano bhwiriri, Rabhaani akamongʼiina Yakobho gho komohirëra omuukë waache omokoro Reeya, na Yakobho akamisi nawe. 24 Rabhaani ꞉naamoruusiri omutamishi waache o ghikari Siiribha, kubha abhe aramuhökëri Reeya.
25 Hano bhookiire, Yakobho aghiitaki, mbeno! Uno n‑Deeya. Niho akamobhoori Rabhaani akabhugha, “Ngʼana ke ino unköriire? Ntekuhökiiri gho ghiri e Raheeri? Ghwake ˆokangʼiina?”
26 Rabhaani akamugharokeri akabhugha, “Gho sughara yiito, teenyi bhoheene omonyi akwiru, no omokoro akeere‑ho. 27 Nuumare singa chaasiko mohungate che riirugha re muuke waane omokoro. Niho wiiki neghokuha omonyi waache Raheeri. Amare, nokuuhökëri wiiki emeeka eghende mohungate.”
28 Yakobho aghiishereri. Hano ahikiri chaasiko chiyo mohungate che riirugha re Reeya, Rabhaani akamuha Raheeri, omuukë waache omonyi abhe mukaache. 29 Rabhaani namoruusiri omutamishi waache o ghikari Bhiiriha, kubha abhe aramuhökëri Raheeri. 30 Mbe, Yakobho akamisi na Raheeri, amare akamosiigha Raheeri ghokera Reeya. Wiiki Yakobho akamuhökëri Rabhaani emeeka eghende mohungate.
Abhaana bha Yakobho
31 Hano Omutëmi Waryobha arooche kubha Reeya tasiighuru, akamuha obhotoro bho kwibhora, amare Raheeri iwe akabha moghomba. 32 Reeya akiihööcha, aghitoora omoona o ghesiite, akabhugha, “Omutëmi Waryobha namariri korighi anyaako yaane, ibheere mosubhe waane naghonsiigha.” Gho ghayo, akamoroka Rubheeni.a
33 Reeya akabhöna anda wiiki, akamwibhora omoona o ghesubhe, akabhugha, “Omutëmi Waryobha naaheere wiiki omoona o kebhureni, gho kubha narooche kubha ntesiighuru.” Gho ghayo, akamoroka Simiyooni.b
34 Akabhöna anda wiiki, akamwibhora omoona owonde o kebhureni, akabhugha, “Ibheere omosubhe waane naakubha haghirohamu na neeni gho ghonsiigha gho kubha, nimariri komwibhorera abhaana bhatato bha kebhureni.” Gho ghayo, akamoroka Raawi.c
35 Reeya akabhöna anda ayende wiiki, akamwibhora omoona o kebhureni, arabhugha, “Ibheere nekomoghongi Omutëmi Waryobha.” Gho ghayo, akamoroka Yuuta.d Niho Reeya aghatena kwibhora.