28
Mbe, Isaka akamobherekera Yakobho, akamwitabheri na komuraghereri akabhugha, “Otasaki ghokwira omukari mo‑se ino e Kanaani. 2 Tanura oghi mo‑se e Bhataani‑Araamu, mo‑ka yi isokoro Bhetuweeri, ghwi ishe nyako. Wibhönërë omukari mo‑bhaakë bha nyakorome Rabhaani.3 “Eryobha re Bhotoro Bhoose reghwitabheri, ubhe no orwibhoro rwaru na rekwengere, kubha ubhe na amatöngö maaru. 4 Rebhiitabheri, iye haghirohamu no orwibhoro roocho gho kohikeerani eriiraghano rino remoheere isokoro Abhurahamu. Nangabha umanyiri mo‑se ino e bhughëni, ubhönë koyighabha, gho kubha ase ino, Eryobha ndeere rimariri komuha Abhurahamu.”
5 Niho Isaka akamotoma Yakobho, aghaye mo‑se e Bhataani‑Araamu, aghiikara o‑Rabhaani nyinarome. Rabhaani uyo m‑mwërëëti o Bhetuweeri, Omushaami, ömööbhö Rebheka, nyina Esaawu na Yakobho.
Esaawu ˆakamokwira muuke o Ishimaeri
6 Ibheere Esaawu akarighi kubha Isaka namariri komwitabheri Yakobho, na komotoma ghuye mo‑se e Bhataani‑Araamu, kubha aghi ghutabhara omukari. Wiiki akamënya kubha hano Isaka ꞉amwitabhiiri Yakobho, ꞉namoshaangʼiri akabhugha atakwira abhaakë bha mo‑se e Kanaani. 7 Namënyiri kubha Yakobho nabhasookiri ishe na nyina, gho ghuye mo‑se e Bhataani‑Araamu.
8 Niho Esaawu akarighi kubha abhaakë bha se e Kanaani bhataamoteghiiri ishe. 9 Ibheere aghaye o‑Ishimaeri, mwërëëti o Abhurahamu, akamokwira Maharati, ömööbhö Nebhayooti, omuukë o Ishimaeri. Akamughöötani na abhakari bhaache abhande.
Yakobho ˆakarööta eriröötö
10 Yakobho hano aghiire Bhataani‑Araamu, naare ararwera Bheeri‑Sheebha, arëërëkëra Haraani. 11 Hano ahikiri ahaghiro nyarebhe, akamisi hayo gho kubha eryobha ndeere rimariri ghosikera. Niho, akiimoki eriibhohe rimu, akaresighamera akamisi. 12 Hano are amisiri akarööta eriröötö. Mo‑riröötö riyo, akarighi angachi yimeeriiru hano mo‑se no orusöngë rooche rohikiri Mwishaaro. Mo‑ngachi iyo, akarighi bhamarayika bha Ryobha bharatiira na ghwika ighoro yaache, 13 no Omutëmi Waryobha naare imeeriire haghuhe na Yakobho.a
Niho akamobhoorera akabhugha, “Eni neeni Omutëmi, Eryobha ri isokoro Abhurahamu ne Eryobha ri iso Isaka. Ase ino urëërë, neghokuha iye, haghirohamu no orwibhoro roocho. 14 Orwibhoro roocho ndookubha rwaru chwee kinya orotu ro se, na ndoghusancha chambaara choose che se. Kohetera iye, no orwibhoro roocho, abhaato bha matöngö ghoose gha chaase ngaghwitabheru. 15 Tëghëërëra, eni neenyi haghirohamu na niiye, haghiro hohoose hayo oghuye, neekubha neraghochonga. Wiiki neghoghugharoki mo‑se ino. Nteeghoghotigha, mahëënë neghoghukörëra ghano nekuraghiire.”
16 Niho Yakobho aghiitaki koru mo‑chandöörö, akabha ariihëëbha, “Aa, mahëënë Omutëmi Waryobha naanyi ahaghiro hano, na neeni nteere nyeeche!” 17 Aghatiina, akabhugha wiiki, “Hëënë, ahaghiro hano, haghotiini chwee, ghyake! Mahëënë, hano n‑anyumba e Ryobha. Wiiki niho ekehita ghe ghusöhëra Mwishaaro keenyi.”
18 Atabhoori moomake, Yakobho akabhooka, akiimoki eriibhohe riyo are asighamiire, akarimeereri kinya ambiro. Wiiki akarehomeerera amaghuta ighoro yaache, 19 akahabherekera ahaghiro hayo Bheteeri.b Amare hayo kare, omoghya o haghiro hayo noore orabherekeru Ruusu.
20 Akamara, Yakobho aghatoora eriiraheri akabhugha, “Oo Waryobha, orabha haghirohamu na neeni mo‑rughëndö roone, oranchonga na kuuha ebhiinyakurë na changibho, 21 mbagha nigharuke gho taata waane kwo murëmbë, nekaraheri kubha, iye Omutëmi Waryobha nookubha Eryobha reene. 22 Wiiki eriibhohe rino ꞉niimeeriiri hano ke mbiro, ndeekubha anyumba yaacho. Mo‑bhwame bhoose bhuno okuuha, neekubha nerakoruuseri imu ghwi ikomi.”