Yakobho ˆakamongʼiina ishe
27
Hano Isaka are akunguhiri na amiisho ghaache ghataare ni inguru che ghotora korighi wiiki, akamobherekera mwërëëti waache omokoro Esaawu, akamobhoorera akabhugha, “Omoona waane.”Nawe aghiitabha, “Taata, neghoghutëghëërëra.”
2 Isaka akabhugha, “Mööhi, eni ibheere nekunguhiri, no orosiko ro ghoku koone nterweche. 3 Mbe, imoki ebhiröönërö bheecho, asheeki no obhuta bhoocho, oghi mwiteregho obhyeme atyenyi gho ghiri yaane. 4 Oramara unkörërë ekiinyakurë ghichömu kino nesiighiri undëëtërë neri. Niho neghwitabheri, nekeere netaamara neku.”
5 Hano Isaka are arasiikëra na mwërëëti waache Esaawu, Rebheka woose naare aratëghëërëra amangʼana ghayo. Hano Esaawu aghiire kobhyema, 6 Rebheka akamobherekera mwërëëti waache Yakobho, akamobhoorera akabhugha, “Nyoghwire iso waanyu aramobhoorera omokoro waacho Esaawu arabhugha, 7 ‘Oghi ombyemere atyenyi undëëtërë, unkörërë ekiinyakurë ghichömu neri, kubha neghwitabheri ambërë e Mutëmi Waryobha, netaamara neku.’ 8 Ibheere omoona waane untëghëërërë, ryoryose rino neghokobhoorera ukörë. 9 Nooghi mo‑rikinda re chambërëtë, undëëtërë ebherome bhibhere ebhichömu, kubha nemukörërë iso ekiinyakurë kino asiighiri. 10 Neramara, omohirere ari, aghwitabheri akeere ghoku.”
11 Yakobho akamugharokeri, “Tiyaanyi yiima! Omokoro waane Esaawu, omobhere waache wichwire amachööki, amare eni omobhere waane m‑mutërëru. 12 Hande abhe Taata nakumbabhaata, na kumanya kubha nemongʼiiniri. Gho ghayo, neekubha nirëtiire eriihiimo taanyi orubhango.”
13 Nyina akamobhoorera akabhugha, “Omoona waane, eriihiimo riyo ribhe ighoro yaane. Nukörë kinya ꞉neekobhooriire, nooghi undëëtërë ebherome bhiyo!”
14 Niho Yakobho aghaye, akiimoki ebherome bhiyo, akamurëëtëra nyina waache, bhakabhesincha. Nyina aghaköra ekiinyakurë ghichömu kino Isaka are asiighiri. 15 Hano Rebheka ꞉amariri, aghasöha mwibhuru, akiimoki changibho inchömu che mobhureni omokoro Esaawu. Akamobheeki Yakobho, omoona waache omonyi. 16 Akiimoki amashaako gha chambërëtë chiire, akamobheeki Yakobho mo‑mabhökö na ahaghiro ahanyööhu ha mwighöti. 17 Akamara akiimoki ekiinyakurë kiyo eghichömu no omughaate uno are akariri, akamuha Yakobho.
18 Niho Yakobho akamutambana ishe, akamobherekera akabhugha, “Taata!”
Ishe aghiitabha, “Neenyi hano. N‑niwe omoona waane?”
19 Yakobho akamugharokeri akabhugha, “Neeni Esaawu, mwërëëti waacho omokoro, niköriri kinya ꞉ombooriire. Nobhooke wiikare, ori atyenyi ino niitiri, kubha onyiitabheri.”
20 Isaka akamobhoori, “Nibhu ekabha okabhöna atyenyi e ghwita bhwango hangʼu moona waane?”
Yakobho akamugharokeri akabhugha, “Omutëmi Waryobha waacho, nankangatiri.”
21 Hayo niho, Isaka akamobhoorera, “Nwishuke hano nekubhabhaate toogho omoona waane, kubha nimënyë aribha hëënë n‑iye omoona waane Esaawu, hamu tiyaanyi.” 22 Niho Yakobho akamwishukerera ishe, Isaka akamubhabhaata akabhugha, “Eriiraka n‑de Yakobho, amare amabhökö n‑gha Esaawu.” 23 Taamumënyiri Yakobho, gho kubha amabhökö ghaache ngaare ghiichwire amachööki kinya gha mokoro waache Esaawu. Niho Isaka aghisëëmi komwitabheri Yakobho. 24 Akamobhoori wiiki, “Iye hëënë n-omoona waane Esaawu?”
Iwe aghagharokeri akabhugha, “Hee, n‑eni.”
25 Niho ishe akamobhoorera akabhugha, “Nundëëtërë ebhiinyakurë bhiyo neri moona waane, kubha neghwitabheri.” Yakobho akamurëëtëra ebhiinyakurë bhiyo akarë, akamara akamuha na adivaayi akanyo.
26 Isaka akamobhoorera, “Nonyishukeerere hano moona waane, untahate.” 27 Yakobho aghiishuka, akamutahata ishe waache. Hano Isaka oghwire ekeneeso ghe changibho cheeche, akamwitabheri arabhugha,
“Aa! Ekeneeso ke moona waane,
n‑kenga ekeneeso ke moghondo,
uno Omutëmi Waryobha awitabhiiri.
28 Eryobha reghwiterere orume ro Mwishaaro,
na rekuhë ase ino enyi ne eriiröbhë ichömu.
Ribhe rerakuha omunöghö na adivaayi kwo bhwaru.
29 Abhaato bha matöngö aghande, bhakuhökëri,
bhabhe bharakwihiinyera gho sooko.
Ubhe omukangati o bhaömöönyu,
na bhabhe bharabhuna ebheru ambërë yaacho.
Omooto wowoose uno aghokwihiima, woose nakwihiimu,
na wowoose uno aghoghwitabheri, woose naghwitabheru.”
Esaawu woose ˆaghasabha itabheru
30 Hano Isaka amariri komwitabheri Yakobho, hangʼu aruure ambërë ishe, hayo hayo Esaawu woose akaru kobhyema. 31 Woose aghaköra ebhiinyakurë bhichömu, na komohirëra ishe waache na komobhoorera, “Mbe, taata, bhooka wiikare ori anyama e mwiteregho, kubha onyiitabheri.”
32 Isaka ishe waache akamobhoori akabhugha, “Iye n‑niwe?”
Akamugharokeri akabhugha, “N‑eni Esaawu, omutange waacho.”
33 Hayo hayo, Isaka aghasëëma ghosingisa chwee, akabhugha, “Ibheere n‑niwe uno andëëtiire anyama e mwiteregho? Nimariri kuraaghëra na nimariri komwitabheri hano ore okeere kohika. Mbe, gho ghayo, iwe namariri ghwitabheru na mahëënë naghwitabheru.”
34 Hano Esaawu oghwire bhuyo ishe abhughiri, aghiitumata, akarera kwo riiraka ikoro kwo bhororo. Akamobhoorera ishe akabhugha, “Oo Taata, ˆneghaghusasaama onyiitabheri na neeni!”
35 Isaka akamugharokeri akabhugha, “Omosuuhu waacho, ꞉niichiri kwo bhongʼiini, iwe namariri ghwitabheru mo‑mweya waacho.”
36 Esaawu akabhugha, “Nikyo ꞉ghiighëriri akabherekeru Yakobho,a nitooriri mo‑mweya waane mara kabhere, gho nchëra e bhongʼiiningʼiini. Kumbere akiimoki aghabho yaane e bhutange, ibheere wiiki akiimoki omweya waane o ghwitabheru!” Niho, akamobhoori ishe akabhugha, “Taata ibheere, rotaanyi‑ho koru orubhango rumu runo rusaaghiri gho ghiri yaane?”
37 Ishe akamugharokeri akabhugha, “Yakobho, nimariri komuköra kinya omukangati waacho. Na bhaömööbhö bhoose, nimariri komuha bhabhe abhatamishi bhaache. Eryobha ndekomotoori gho komuha omunöghö na adivaayi. Ibheere moona waane, neghoghukörëra ke iye?”
38 Esaawu akamobhoorera ishe akabhugha, “Taata, orubhango runo ore naro n‑ndumu hangʼu? Oo taata, neghusabha na neeni onyiitabheri!” Hayo, Esaawu akarera wiiki kwo riiraka ikoro.
39 Isaka akamobhoorera akabhugha,
“Obhwikari bhoocho, mbookubha kurë na ase e riiröbhë ichömu re ebhiinyakurë,
nookubha kurë no orume ro Mwishaaro.
40 Nokumanya kwo riihë,
na nookubha oramuhökëri omonyi waacho.
Hano oghutabhaabhuka,
niho okwiruusi mo‑bhukangati bhooche.”
Yakobho akamungʼösa Esaawu
41 Esaawu akamurëgha Yakobho, gho ghiri e rubhango runo ahaabhuru ni ishe. Akiihëëbha akabhugha, “Oroko ro taata ˆroghatingʼi. Hano tokumara chaasiko che komorerera, niho nekomwita omonyi waane Yakobho.”
42 Hano Rebheka oghwire amangʼana gha Esaawu, akamobherekera Yakobho, akamobhoorera akabhugha, “Omoona waane, wikabhaahe! Ömöönyu Esaawu nitëngʼiire kubha nakorehani asiire, nakwënda aghwite. 43 Ibheere, nukörë kinya neghokobhoorera, obhooke oru hano, ungʼösërë Haraani kwo mwito Rabhaani. 44 Wiikare nawe kwo riibhagha mbagha obhukarari bho möönyu hano bhoghosira. 45 Hano obhukarari bhooche bhookubha bhosiriri, na kwebhu amabhe ghano omuköriire, neghoghotomera omooto, ache ghokwimoki. Ngwake nekweru na abhaana bhabhere kwo orosiko rumu?”
46 Niho Rebheka aghaye akamobhoorera Isaka akabhugha, “Eni nimariri ghutamu chwee gho ghiri e bhakari bhano bha Esaawu bha ritöngö re Bhahiti. Aribha Yakobho woose nakuucha akwire abhakari bha mo‑se ino, eriimanya reene ndeekubha na bhwëra ke?”