Omutëmi Waryobha ˆakamuragha komwitabheri Isaka kinya Abhurahamu
26
Ekamara aghëëcha ihaari eghasöha mo‑se iyo, ghotigha yiire irweriire eriibhagha riire re Abhurahamu.a Eghaghëri Isaka asaamere Gheraari mo‑se e Bhabhiriisiti kwo mutëmi Abhimeereeki.2 Hano are akeere kobhooka, Omutëmi Waryobha akamorwera Isaka akamobhoorera akabhugha, “Otaghe Miisiri, amare wiikare mo‑se ino neghokobhoorera. 3 Wiikare mo‑se iyo kinya omughëni, na neeni neekubha haghirohamu na niiye, na neghoghwitabheri. Eriiraheri rino nemoheere iso Abhurahamu, niryo na niiye neghoghukörëra. Iye na abhaato bha rwibhoro roocho, nekobhaha chaase chino choose.b 4 Nekorwengera orwibhoro roocho, ndookubha rwaru kinya chanchöta che Mwishaaro. Wiiki nekoruha chaase chino choose. Gho kohetera orwibhoro roocho, amatöngö ghoose gha chaase ngaghwitabheru. 5 Neghuköra hangʼu gho kubha Abhurahamu naare aransooka na ghwishereri amangʼana ghaane, ne emeghiro gheene, na ghoose ghano neere neramuraghereri.” 6 Gho ghayo, Isaka akamanya iyo Gheraari.
7 Mbe, orosiko rumu abhaato bha mo‑se iyo bhakamobhoori ighoro e mukaache. Iwe akabhagharokeri akabhugha, “Uno n‑omwito.” ꞉Naatiiniri kobhugha kubha mukaache, ꞉niituuriri kubha, “Abhaato bha se iyo mbaghotora koonyita gho ghiri e Rebheka gho kubha mumangi chwee.”
8 Hano Isaka are ikeere iyo gho chaasiko chaaru, Abhimeereeki omutëmi o Bhabhiriisiti aghasongoreri mwitirisha, akamorighi Isaka aramutahata mukaache Rebheka. 9 Niho Abhimeereeki akamobherekera Isaka, akamobhoori akabhugha, “Mahëënë Rebheka m‑mkaacho! Ngwake ombooriire kubha n‑ömöönyu?”
Isaka akamugharokeri akabhugha, “꞉Netiiniri neekabha neriihëëbha kubha mbanganyiitiri gho ghiri yaache.”
10 Niho Abhimeereeki akamobhoorera akabhugha, “Neke kino otuköriire? Nengabheere abhönëkë omooto umu o mo‑se ino amisi na mukaacho, nongatusöhiri mo‑mabhe.” 11 Niho, Abhimeereeki akabhashaangʼi abhaato bhaache bhoose, akabhugha, “Omooto wowoose uno akomoturi Isaka, hamu mukaache, obhuhëënë naghwitu.”
Koreghesera ebhesima bhe manche
12 Omooka uyo Isaka akabhusura ambusuro yaache mo‑se iyo, aghaghësa omunöghö mwaru chwee ghokera bhino are abhuswire, gho kubha Omutëmi Waryobha ꞉naamwitabhiiri. 13 Isaka akaamiha, akëëngëra kubhöna ebheghiro mbagha akabha mwame chwee. 14 Akabha omotughi o changʼömbë, na changʼöndu, na naare na abhatamishi bhaaru chwee. Obhwame bhuyo bhoghaghëri Abhabhiriisiti bhamorigheri eriihari. 15 Niho Abhabhiriisiti bhakabherinda ebhesima bhe manche bhyose bhe Isaka kwo maröbhë. Ebhesima bhiyo mbeere bhetukuru na abhatamishi bha Abhurahamu ishe waache. 16 Niho Abhimeereeki akamobhoorera Isaka akabhugha, “Nooru mo‑kyaro kiito, gho kubha iye ˆoghatokeri changuru.”
17 Mbe, Isaka akaru iyo, aghaye kwabhëka eriibhuru reeche mo‑möörö o Gheraari, akamanya iyo. 18 Niho akoohora wiiki ebhesima bhe manche, bhiire bheere bhetukuru kwo riibhagha riire re Abhurahamu ishe waache, hano are akeere anyi muhöru, ebhesima bhino Abhabhiriisiti mbaare bhabherindiri hano Abhurahamu akuure. Niho Isaka akabhiha amariina ghaare ghaare, ghano ishe waache are abheheere.
19 Abhatamishi bha Isaka bhaghatuka mo‑möörö o Gheraari, bhakabhöna eghesima keraru amanche meero chayi. 20 Abhariishi bha mo‑möörö uyo, bhakareghesa na abhariishi bha Isaka bharabhugha, “Amanche ghano n‑ghaghiito.” Niho Isaka aghakeroka eghesima kiyo Eseki,c gho kubha abhariishi bha Gheraari mbaare bharakereghesera na abhariishi bhaache.
21 Bhakamara abhariishi bha Isaka bhaghatuka eghesima ekende, kiyo kyose, bhaghakereghesera. Nikyo ꞉ghiighëriri Isaka aghakeroka eghesima kiyo Sitina.d
22 Akamara, Isaka akaru iyo, aghaye ahaghiro ahande, ghotuka eghesima ekende. Amare kiyo, bhataakereghesiire, niho aghakiha eriina Rehobhootie akabhugha, “Ibheere Omutëmi Waryobha natoheere omweya o ghwisha, na ntoghuchaama bhoheene mo‑se ino.”
23 Niho Isaka akaru iyo, aghaye mbagha Bheeri‑Sheebha. 24 Obhotiko bhuyo bhuyo, Omutëmi Waryobha akamorwera, akamobhoorera akabhugha, “Eni, neeni Eryobha ri iso Abhurahamu. Otatiina, gho kubha, neenyi haghirohamu na niiye, neghoghwitabheri na korwengera orwibhoro roocho, gho ghiri e Abhurahamu omutamishi waane.”
25 Niho Isaka akaabhëka‑ho ahaghiro ha koruuseri amaruusi, akamusëngëra Omutëmi Waryobha. Akaabhëka iyo eriibhuru reeche, na abhatamishi bhaache bhaghasëëma ghotuka eghesima ekende.
26 Eriibhagha riyo Abhimeereeki akaru Gheraari haghirohamu no omorwachi waache Ahusati, na Bhikoori omontomonkoro o bhakëëya bhaache, bhakamtambana Isaka. 27 Isaka akabhabhoori akabhugha, “Ngwake mokaacha kondighi eni, ino mundëghiri, na muhëëbhiri bhowaanyu?”
28 Bhakamugharokeri bhakabhugha, “Ntorooche hëënë kubha Omutëmi Waryobha naanyi haghirohamu na niiye. Gho ghayo, ntorooche kubha m‑bhoheene tubhe haghirohamu kwo murëmbë. Ntokwëndëru tukörë asooto haghirohamu na niiye. 29 Itu ntoghuköriire bhoheene eriibhagha ryose, gho kubha totaghoturiri iye toghaghotigha ughëndë kwo murëmbë. Ntoghusabha otoore eriiraghano kubha toghotukörëra obhobhe bhobhoose. Ni ibheere, witabhiiru no Omutëmi Waryobha.”
30 Mbe, Isaka akabhakörëra obhughëni, bhakaraaghëra na kunyo. 31 Hano bhookiire, bhakarishani ariingʼa, akamara Isaka akabhahërëëkërëra, bhaghataana kwo murëmbë.
32 Orosiko ruyo ruyo, abhatamishi bha Isaka, bhakaacha komobhoorera amangʼana kubha, “Eghesima kino toore totukiri, ngekoru amanche.” 33 Mbe, Isaka aghakeroka eghesima kiyo Shibha.f Nikyo ꞉ghiighëriri omoghya uyo nokobherekeru Bheeri‑Sheebha mbagha reero.
Esaawu ˆaghakwira abhakari bha ritöngö erende