Abhaana abhande bha Abhurahamu
25
Abhurahamu ꞉naakwiriri omukari owonde, eriina reeche naare arabherekeru Ketura. 2 Ketura woose akamwibhorera Abhurahamu abhaana, Simuraani, na Yokishaani, na Metaani, na Mitiyaani, na Ishibhaaki na Shuwa.3 Yokishaani woose akamwibhora Sheebha na Tetaani. Tetaani naare ishe o Bhashuuri, na Abharetuushi, na Abharewumi. 4 Abhaana bha Mitiyaani mbaare Ebha, na Ebheeri, na Hanooki, na Abhita na Erita. Bhayo bhoose, mbaare bha mo‑rwibhoro ro Ketura.
5 Abhurahamu akamughabhi Isaka ebheghiro bheeche bhyose. 6 Amare abhaana bha bharëëkari bhaache akabhaha chaatuho hano are akeere muhöru, akamara akabhahira mo‑se ayende e roghoro kubha bhabhe kurë no omoona waache Isaka.
Oroko ro Abhurahamu
7 Abhurahamu aghiikara emeeka eriighana rimu na miröngö mohungate ne etaano. 8 Hano chaasiko chemoriire naare amanyiri eriimanya irë ni ichömu chwee na re rubhango. Aghaghöötana na abhaato bhaache. 9 Abhaana bhaache, Isaka na Ishimaeri, bhakamoryeka mo‑koobho e Makibheera, haghuhe na Maamure, mo‑moghondo uno ore o Ebhurooni mwërëëti o Sohaari, Omohiti. 10 Omoghondo uyo, Abhurahamu naare awoghoriri kwo Bhahiti, hayo niho Abhurahamu aryekuru, akabha haghirohamu na mukaache Saara.
11 Abhurahamu achekumara ghoku, Eryobha reekabha reramwitabheri Isaka. Isaka akamanya haghuhe ne ekerika ke Bheeri‑Rahayi‑Rooyi.
Orwibhoro ro Ishimaeri
12 Runo niro orwibhoro ro Ishimaeri mwërëëti o Abhurahamu uno Haaghiri Omomiisiri, omutamishi o Saara ꞉ibhooriire Abhurahamu. 13 Ghano n‑amariina gha bhaana bha Ishimaeri, kurëngʼaana na kinya ꞉bhiibhwiru. Omutange naare arabherekeru Nebhayooti, abhande mbaare Ketaari, na Atibheeri, na Mibhisaamu, 14 na Mishama, na Tuuma, na Maasa, 15 na Hatati, na Teema, na Yeturi, na Nabhiishi na Ketema. 16 Bhayo nibho abhaana bha Ishimaeri bhano ꞉bhaare abhakangati bha simoka bha matöngö ikomi na bhabhere.a Obhwikari bhoobho ne ebhyaro bheebho ebhekoro ne ebhesuuhu, ꞉mbiimënyëkiine kwo mariina ghaabho.
17 Ishimaeri aghiikara emeeka eriighana rimu na miröngö etato na mohungate. Hano akuure, aghaghöötana na abhaato bhaache. 18 Orwibhoro ro Ishimaeri, ꞉ndumanyiri korwera mo‑se e Habhira mbagha Shuuri. Ase iyo neere haghuhe no orobhebhe ro Miisiri, kwërëkëra Ashuuru. Orwibhoro ruyo rotaare roroghwana no orwibhoro oronde ro bhaana bha Abhurahamu.
Kwibhoru kwo Esaawu na Yakobho
19 Orwibhoro ro Isaka, mwërëëti o Abhurahamu niro runo. 20 Hano Isaka are ne emeeka miröngö ene, akamokwira Rebheka omuukë o Bhetuweeri, Omushaami koru Bhataani‑Araamu. Rebheka naare ömööbhö Rabhaani, Omushaami. 21 Isaka akamusabha Omutëmi Waryobha gho ghiri e mukaache, gho kubha moghomba are. Omutëmi woose, aghiishereri amasabhi ghayo gha Isaka, niho Rebheka akabhöna anda. 22 Anda iyo, neere e bhisare bhibhere bhino bheere bherakiringichana mo‑nda. Niho Rebheka akabhugha, “Aribha hangʼu keenyi, obhuhöru neke bhoghunsakeri?” Gho ghayo, aghaye kobhoori Omutëmi Waryobha.
23 Omutëmi Waryobha akamugharokeri akabhugha,
“Mo‑nda yaacho, ncheenyi‑mu chaase ibhere,
na amatöngö abhere ghayo ngaghutamana korwera mo‑nda yaacho.
Ase imu, neekubha no obhotoro bhokoro ghokera ayende,
no omokoro naakubha aramuhökëri omonyi.”
24 Hano chaasiko cheeche che kwibhora ꞉cheehikiri, Rebheka akiibhora ebhisare. 25 Uno are akangatiri kwibhoru naare mubhararatu, omobhere waache woose noore wichwire amachööki, nikyo ꞉ghiighëriri bhakamoroka Esaawu. 26 O kabhere hano ibhwiru, akaacha aghöötëriire eghetingiro ke Esaawu, nikyo ꞉bhaamorokiri Yakobho. Hano Rebheka akwibhora Esaawu na Yakobho, Isaka naare ne emeeka miröngö esaasabhe.
Esaawu ˆaghaghori aghabho e bhutange bhooche
27 Abhaana bhayo bhaghakora, Esaawu akabha mosubhesubhe mwibhyema, naare anariri ghuye mwiteregho, amare Yakobho iwe naare muhörëëru, anariri emeremo ghe ka. 28 Isaka naare amosiighiri chwee Esaawu gho kubha naare asiighiri kurë chaanyama che chatyenyi che mwiteregho. Amare Rebheka iwe naare amosiighiri Yakobho.
29 Orosiko rumu, Yakobho naare aratërëka chandengu, Esaawu akaru kobhyema arooghu anchëra chwee. 30 Akamobhoorera Yakobho akabhugha, “Neghoghusabha uhe ebhiinyakurë ebhibhararatu bhiyo bhwango neri, n‑inchëra chwee neenyi.” Niho Esaawu abhwine eriina re Etoomu.
31 Yakobho akamugharokeri akabhugha, “Ibheere, nongoreri aghabho yaacho e bhutange.”
32 Nawe aghagharokeri akabhugha, “Tëghëërëra, eni nekaraarëra ghoku na anchëra, aghabho yaane e bhutange, neke eghontoori?”
33 Yakobho akamobhoorera akabhugha, “Nundahereri ibheere.” Ibheere Esaawu akamurahereri, akamoghoreri aghabho yaache e bhutange.
34 Niho Yakobho akamuha Esaawu omughaate na chandengu. Esaawu akarë na kunyo, akamara aghaye. Mbe, hangʼu nibhu Esaawu ꞉ataraahiri aghabho yaache e bhutange.