Isaka ˆakamokwira Rebheka
24
Eriibhagha riyo Abhurahamu naare omugharuka o meeka myaru chwee, no Omutëmi Waryobha naare amwitabhiiri kwo bheghiro bhyose. 2 Orosiko rumu, Abhurahamu akamobhoorera omutamishi waache omokoro, omwimeerereri o bheghiro bhyose na abhaato bha mo‑ka yaache kubha, “Neghoghusabha uraheri gho ghotoora okubhökö koocho haase e ritango reene.a 3 Na neeni neghokoriishi ariingʼa kwo riina re Mutëmi Waryobha, Eryobha ri ighoro na haase, kubha tokomokwiri omoona waane omukari wowoose koru mo‑bhaakë bha mo‑se e Kanaani ino nimanyiri‑mu. 4 Amare oghi mo‑se yaane na mo‑rwibhoro roone ro simoka, omutabharere‑ho Isaka omoona waane omoghiikoro iyo.”5 Omutamishi uyo akamobhoorera akabhugha, “Ibheere omuukë uyo hamu araanga ghwishereri kuucha mo‑se ino, nibhu ekubha? Ne erabha hangʼu, nemugharoki omoona waacho mo‑se ino oruure?”
6 Abhurahamu akabhugha, “Otasaki komugharoki omoona waane iyo! 7 Omutëmi Waryobha, Eryobha re Mwishaaro, rino ꞉renduusiri koru mo‑ka e taata, na koru mo‑se ino nibhoriiru, reghasiikëra na neeni, rekandahereri kubha ndekobhaha abhaato bha rwibhoro roone ase ino. Iryo ndeghotoma marayika waache aghukangate, kubha amubhönërë mwërëëti waane omukari koru iyo. 8 Aribha omukari uyo araanga ghwishereri kuucha na niiye, eriiraheri reene riyo nekuraheriiri retaghoghughööta, amare otamugharoki iyo omoona waane.”
9 Niho omutamishi uyo aghatoora okubhökö kooche haase e ritango re Abhurahamu, omutëmi waache, akamurahereri ighoro e mangʼana ghayo. 10 Akamara akiimoki changamiya ikomi che mutëmi waache, akabhooka ino anyi na chaatuho che manga maaru. Niho aghaghööta anchëra e kwërëkëra mo‑moghya uno ore orabherekeru Nahoori, mo‑se e Mesobhotamiya.
11 Hano omutamishi uyo ꞉ahikiri haghuhe no omoghya uyo, neere mughörööbha eriibhagha rino abhakari bhahaaghi ghutaha amanche. Aghachehighami changamiya cheeche rubhareka ro eghesima kino keere anche e moghya uyo.
12 Niho aghasabha Eryobha akabhugha, “Oo Omutëmi Waryobha, Eryobha re mutëmi waane Abhurahamu! Reero ino, neghoghusabha unsakeri amangʼana ghano, ubhe omuhëënë kwo omutëmi waane Abhurahamu. 13 Mööhi! Neenyi rubhareka ro ghesima kino ke manche, na abhaakë bha mo‑moghya uno mbakuucha ghutaha amanche‑mu. 14 Mbe, na ibhe hangʼu, omuukë uno nekomobhoorera iki anyongo yaache ahë amanche nenyo, nawe angarokeri abhughe, ‘Noonyo! Koru na changamiya cheecho neghochiha amanche chenyo,’ uyo abhe niwe omukari uno umwahoriire omutamishi waacho Isaka. Gho ghayo, niho nekumanya kubha nomuköriire obhuhëënë omutëmi waane.”
15 Hano are akeere arasabha Eryobha, hayo hayo akarwera‑ho omuukë umu, eriina reeche Rebheka, asambekiri anyongo yaache. Rebheka uyo naare muuke o Bhetuweeri, omoona o Miirika muka Nahoori. Nahoori uyo naare ömööbhö Abhurahamu. 16 Rebheka naare muchömu chwee, wiiki naare akeere komisi no omosubhe wowoose wuure. Mbe, akahiringita mo‑ghesima, aghataha amanche aghiichori anyongo yaache, akamara aghatiira kohoroka mo‑ghesima.
17 Niho omutamishi uyo akangohi ghutëmëërana nawe, akamobhoorera akabhugha, “Nunsakeri amanche masuuhu gha mo‑nyongo yaacho nenyo!”
18 Nawe akamugharokeri akabhugha, “Oo omutëmi waane! Gha ghano noonyo.” Aghaköra bhwango aghiiki anyongo yaache haase, akamuha amanche. 19 Hano amariri komuha amanche, akamobhoorera akabhugha, “Neghachitahëra amanche changamiya cheecho choose chenyo mbagha chihaabhe.” 20 Mbe, aghaköra bhwango, aghachitoreerera amanche mo‑riitore ghano ꞉ghaare mo‑nyongo yaache. Akamara aghaye arayaara mo‑ghesima ghutaha amanche aghande na ghochiha changamiya cheeche choose.
21 Omutamishi uyo akamoomeri amiisho, ino akiriri kiri, kubha arighi aribha Omutëmi Waryobha narohikeriini bhoheene orughëndö rooche hamu tiyaanyi.
22 Hano changamiya chiyo ꞉chiimariri kunyo amanche, omutamishi uyo akiimoki abhëtë e mwinyeero ino iköruru gho sahaabhu, akamuha omuukë uyo. Akamuha no obhutööti bhubhere bho sahaabhu. Ebheghiro bhiyo bhyose mbeere ne eriighori ikoro. 23 Akamobhoori akabhugha, “Iye m‑muuke waawe onyi? Neghusabha omboorere. Ntokubhöna omweya o komisi awaanyu?”
24 Rebheka akamugharokeri akabhugha, “Eni n‑omuuke o Bhetuweeri neenyi, omoona o Miirika, muka Nahoori.” 25 Wiiki akamobhoorera akabhugha, “Awiito, mboonyi‑ho obhunyaaki ne ebhiinyakurë bhe ghwisha changamiya cheecho. Wiiki omweya o komisi abhaghëni niho onyi.”
26 Omutamishi uyo, akiihiinya na komusëngëra Omutëmi Waryobha, 27 arabhugha, “Aghongibhu Omutëmi Waryobha, Eryobha re mutëmi waane Abhurahamu, gho kubha ꞉nëërëkiri Abhurahamu obhuchömu no obhuhëënë bhooche. Omutëmi nankangatiri eni mo‑nchëra mbagha mo‑bhahiiri bha mutëmi waane!”
28 Mbe, omuukë uyo aghaye ahönta kobhabhoorera bhaömööbhö na nyina ghoose ghano gharweriire. 29 Rebheka naare no ömööbhö uno are arabherekeru Rabhaani. Rabhaani uyo akangohi koru aka ghuye ghutëmëërana no omutamishi uyo mo‑ghesima. 30 Rabhaani naare amariri korighi abhëtë ino ere mwinyeero no obhutööti mo‑mabhökö gha mööbhö. Wiiki naare amariri kooghu kinya Rebheka abhabhooriire amangʼana gha mutamishi uyo.
Niho akamutambana omooto uyo akamubhöna imeeriire haghuhe na changamiya cheeche, rubhareka ro ghesima. 31 Akamobhoorera akabhugha, “Niho toonyi awiito uno witabhiiru no Omutëmi Waryobha. Ngwake wimeeriire hano anche? Nimariri ghusëëmi anyumba, no omweya niho onyi o changamiya cheecho.”
32 Hayo hayo, omutamishi uyo aghaye aghasöha mo‑ka iyo. Bhaghiiki emerigho ghino gheere mo‑changamiya, bhaghachiha obhunyaaki na ha koriisheri. Bhakamuha omutamishi uyo na abhaato bhano ꞉bhaare nawe amanche gha ghwishaabha amaghoro.
33 Niho abheene aka bhakamuhökëri omutamishi uyo ebhiinyakurë, amare akabhugha, “Nteekurë gheghiro mbagha nebhabhoorere ghano nekwënda ghosiikëra.”
Rabhaani akamobhoorera akabhugha, “Mbe, notobhoorere!”
34 Omooto uyo akabhugha, “Eni n‑omutamishi o Abhurahamu neenyi. 35 Omutëmi Waryobha namwitabhiiri omutëmi waane, nabheere mokoro na mwame chwee. Namoheere amakinda makoro gha chambori na changʼömbë. Namoheere changamiya na chaatikere, ne ebhikörë bhe chambiiri na bhe chasahaabhu, haghirohamu na abhatamishi bha ghesubhe na bha ghikari.
36 “Nawe Saara omukari o mutëmi waane, akamwibhorera omoona o ghesubhe mo‑bhokungu bhooche, iwe Abhurahamu akamuha ebheghiro bheeche bhyose. 37 Niho omutëmi waane akandishi ariingʼa akabhugha, ‘Otamokwiri mwërëëti waane omukari wowoose wuure koru mo‑bhaakë bha se ino nimanyiri e Kanaani. 38 Amare oghi mbagha awiito o‑taata, na kwo bhahiiri bhaane, omutabharere omoona waane Isaka omukari.’
39 “Nekamobhoori nekabhugha, ‘Ibheere, hamwabhe omuukë uyo araanga kuucha mo‑se ino, nibhu ekubha?’
40 “Nawe aghangarokeri akabhugha, ‘Omutëmi Waryobha uno nighöötiri ameeghi ghaache, iwe naghoghotomera marayika waache ahinane haghirohamu na niiye. Nakohikeerani orughëndö roocho, omwimokeri mwërëëti waane omukari koru mo‑bhahiiri bhaane, mo‑rwibhoro ro taata waane. 41 Hano okohika mo‑bhahiiri bhaane, bharaanga ghokuha omuukë uyo, toghughöötu ne eriiraghano re riiraheri reene.’
42 “Reero, hano nehikiri mo‑ghesima, neghasabha Omutëmi, ‘Oo Omutëmi Waryobha, Eryobha re mutëmi waane Abhurahamu! Neghoghusabha ohikeerani orughëndö roone reero rubhe bhoheene. 43 Mööhi! Niimeeriire haghuhe ne eghesima ke manche ghano. Mbe, neghusabha ibhe hangʼu, eriibhagha omuukë araacha ghutaha amanche nekomusabha, “Nuuhë amanche masuuhu nenyo koru mo‑nyongo yaacho,” 44 nawe angarokeri abhughe, “Noonyo! Koru na changamiya cheecho neghochiha amanche chenyo,” mbe, uyo niwe uno iye Omutëmi Waryobha omwahuriire omoona o mutëmi waane.’
45 “Mbe! Eriibhagha rino neere nekeere kumara ghusabha mo‑motema waane, hayo hayo Rebheka akarwera iyo, asambekiri anyongo yaache. Akahiringita mo‑ghesima ghutaha amanche. Nekamobhoorera nekabhugha, ‘Nunsakeri amanche nenyo.’ 46 Aghaköra bhwango aghiiki anyongo yaache, akamboorera akabhugha, ‘Mbe, noonyo! Koru na changamiya cheecho, neghochitahëra amanche chenyo.’ Niho nekanyo, na changamiya cheene choose aghachitahera cheekanyo.
47 “Niho nekamobhoori nekabhugha, ‘Iye m‑muuke waawe onyi?’ Aghangarokeri kubha, ‘Eni m‑muuke o Bhetuweeri, mwërëëti o Nahoori uno Miirika ꞉amwibhooriire.’ Hayo niho, nekamotoorera abhëtë mwinyeero, na komobheeki obhutööti mo‑mabhökö. 48 Nekiihiinya gho komusëngëra na komoghongi Omutëmi Waryobha, Eryobha re mutëmi waane Abhurahamu, rino rinkangatiri mo‑nchëra yaane na konyëërëki omuukë o mohiiri o mutëmi waane kubha abhe omukari o moona waache.
49 “Mbe! Ibheere momboorere, aribha mokwënda komukörëra omutëmi waane obhuchömu no obhuhëënë. Wiiki aribha taanyi hangʼu momboorere, nimënyë re ghuköra.”
50 Rabhaani na Bhetuweeri bhakamugharokeri bhakabhugha, “Angʼana ino, ntokorighi kubha neruure kwo Mutëmi Waryobha, itu totaaghotora ghuköra ghyokyose wiiki. 51 Rebheka kauno hano! Omwimoki, mughëndë haghirohamu nawe. Abhe omukari o moona o mutëmi waacho, kinya Omutëmi Waryobha abhughiri.”
52 Omutamishi o Abhurahamu, hano oghwire kinya bhabhughiri, akiihiinya mbagha haase gho sooko gho komoghongi Omutëmi Waryobha. 53 Akaruusi ebheghiro bhino ꞉bhiiköruru gho chambiiri, na gho sahaabhu, haghirohamu na changibho, akamuha Rebheka. Niho wiiki akamuha ömööbhö na nyina ebheghiro bhyaru bhe riighori.
54 Niho iwe na abhaato bhaare ꞉bhaare nawe haghirohamu, bhakaraaghëra na kunyo, na komisi hayo hayo mo‑ka iyo. Atabhoori yaache hano bhookiire, omutamishi wuure akabhabhoorera akabhugha, “Neghusabha monyisherereri nigharuke mo‑mutëmi waane.”
55 Ömööbhö Rebheka, haghirohamu na nyina bhakabhugha, “Omotighe singa omuukë wiito, ikare na itu kinya chaasiko ikomi, niho mumënyë ghuye nawe.”
56 Iwe aghagharokeri akabhugha, “Omutëmi Waryobha ꞉naamariri kohikeerani orughëndö roone. Mbe! Motankëëchëri! Montighe nigharuke kwo mutëmi waane.”
57 Ibho bhakabhugha, “Tigha tomobherekere omuukë wiito, tomobhoori.” 58 Bhakamobherekera Rebheka na komobhoori bharabhugha, “Oo Rebheka! Iye nwisheriiri ghuye no omooto uno ibheere?”
Iwe aghagharokeri akabhugha, “Hee neeghuye!”
59 Niho bhakamotigha Rebheka aghi no omubhaghati waache, no omutamishi o Abhurahamu na abhaato bhaache. 60 Abhahiiri bha Rebheka, bhakamwitabheri kwo rubhango bharabhugha, “Oo omosubhaati wiito! Eryobha reghukörë ubhe omwibhori o bheku ne ebheku! No orwibhoro roocho, rughëghë emeghya ghe bhabhisa bhaabho.”
61 Akamara Rebheka na abhatamishi bhaache bhaghatiira changamiya bhaghatanura, bhakamutambana omutamishi uyo. Hangʼu nibhu omutamishi o Abhurahamu amwimokiri Rebheka, bhaaghaye haghirohamu.
62 Kwo riibhagha riyo, Isaka naare agharokiri koru mo‑kerika ke Bheeri‑Rahayi‑Rooyi, akabha amanyiri eribhaara erende re Neghebhu. 63 Orosiko rumu omughörööbha, aghaye a‑moghondo kwihëëbha. Mbe, aghaghëgha amiisho akarighi changamiya cheraacha.
64 Rebheka hano aghëghiri amiisho akamorighi Isaka, aghiika bhwango mo‑ngamiya. 65 Akamobhoori omutamishi uyo, “N‑niwe wuure aghughënda a‑moghondo, akuucha ghototurungʼanera?”
Omutamishi uyo akamugharokeri akabhugha, “N‑omutëmi waane Isaka.” Mbe Rebheka akiimoki angibho yaache akiibhishi mo‑bhosho. 66 Omutamishi uyo aghasëëma komobhoorera Isaka ghoose ghano aköriri.
67 Mbe, Isaka akamusöhi Rebheka mwibhuru re Saara nyina waache, niho akamwimoki akabha mukaache, akamosiigha chwee. Omukari uyo o Isaka akamughambisani chwee gho ghiri e roko ro nyina.