Abhurahamu ˆaghaghora ambeehera e koryekera Saara
23
Saara ꞉niikeere eghita ke meeka eriighana rimu na miröngö ebhere na mohungate. Ghiyo nighyo gheere emeeka ghe riimanya re Saara. 2 Aghakwera Kiriyaati‑Aribha, niwe omoghya o Hebhurooni chaasiko chino, mo‑se e Kanaani. Abhurahamu akamorerera na kwihiinyërëra.3 Niho Abhurahamu akahoroka aghatigha erihundughu re mukaache, aghaye ghosiikëra na Abhahiti abhiikari bha se yiire, akabhugha, 4 “Nimanyiri ghate yaanyu hano kinya omughëni, muuhë ahaghiro nehaghore habhe hahaane neryeke‑mu mukari waane.”
5 Abhahiti bhayo, bhakamugharokeri Abhurahamu bhakabhugha, 6 “Oo omutëmi wiito, otutëghëërërë! Iye niiye omukangati omosubhesubhe ghate yiito, mbe, nwiyahurere ahaghiro hohoose hano okwënda omoryeke mukaacho. Taanyi‑ho omooto uno aghokwima hamu ghokurëki ahaghiro ha koryeka mukaacho.”
7 Niho Abhurahamu akiimeerera, akiihiinya ambërë e Bhahiti bhoose. 8 Akabhabhoorera akabhugha, “Aribha ˆmokaaha omweya kubha nemoryeke omukari waane, ˆnekabhabhoorera momusabhe Ebhurooni mwërëëti o Sohaari gho ghiri yaane, 9 kubha angoreri akööbhö yaache e Makibheera, ino enyi mo‑robhebhe ro moghondo waache. Momusasaame angoreri kwo riighori rino rekurëngʼaana no omoghondo uyo ghate yaanyu, kubha nehaghëghë habhe hahaane ha koryekera.”
10 Ebhurooni Omohiti omwene, naare ghate e Bhahiti bhano ꞉bhaare bhiikomiine mo‑kehita ke omoghya uyo. Niho akamugharokeri Abhurahamu ambërë yaabho akabhugha, 11 “Tiyaanyi, omutëmi waane! Neghoghusabha untëghëërërë. Eni ˆneghakuha omoghondo woose, na akööbhö ino enyi muyo ambërë e bhaato bhano, kubha oghi oryeke‑mu mukaacho.”
12 Abhurahamu akiihiinya ambërë e Bhahiti bhoose. 13 Akamobhoorera Ebhurooni na abhaato bhoose bharatëghëërëra, “Neghoghusabha, untëghëërërë! Neghokuha chambiiri che ghwisha ghoghora moghondo uyo, na neghoghusabha wimoki amareho ghano, kubha nibhönë ahaghiro ha koryeka erihundughu re mukari waane.”
14 Ebhurooni akamugharokeri Abhurahamu akabhugha, 15 “Oo omutëmi waane nuntëghëërërë! Omoghondo uyo noonyi ne eriighori re chashekeeri amaghana ane.a Eriighori riyo retaanyi gheghiro ghokoocho na ghokoone? Iye motindekere‑mu mukaacho.”
16 Niho Abhurahamu na Ebhurooni bhaghiishererani, Abhurahamu akamurëngëra ekirëngërë kino bhiishereriini ambërë e Bhahiti, chashekeeri amaghana ane. ꞉Naarehiri gho kirëngërë ke hëënë, kino abhaghori bha chaasiko chiyo ꞉bhaare bhararëngëra.
17 Mbe, gho ghayo, Abhurahamu ꞉nahaabhuru omoghondo o Ebhurooni uno ore Makibheera, kwërëkëra Maamure, haghirohamu na akööbhö, ne emete ghyose kubha ghibhe ghegheeche. 18 Angʼana iyo ꞉niiköruru ambërë e Bhahiti bhoose, bhano ꞉bhaare bhiikomiine mo‑kehita ke moghya uyo.