Eryobha ˆreghasaki obhokumi bho Abhurahamu
22
Riiche koheta eriibhagha, Eryobha reghasaki obhokumi bho Abhurahamu, rekamobherekera rekabhugha, “Oo Abhurahamu!”Abhurahamu aghiitabha, “Neenyi hano, neghoghutëghëërëra.”
2 Eryobha rekamobhoorera rekabhugha, “Mwimoki omoona waacho Isaka, uno anyi omwene chiri, uno omosiighiri, oghi nawe mo‑se e Moriya, mo‑gheghoro kino neghokwërëki. Hano mokohika iyo, omoruusi amaruusi gha ghosireekereri.”
3 Mbe, atabhoori yaache moomake, Abhurahamu akabhooka, akabhanura chaaku che ghwekeeri amaruusi gha ghosireekereri. Aghasëëmi atikere yaache, aghaghëgha abhatamishi bhabhere, haghirohamu no omoona waache Isaka. Niho aghaghööta anchëra e kwërëkëra ahaghiro hano are abhooriiru ne Eryobha.
4 Orosiko ro ghatato ro rughëndö roobho, Abhurahamu aghaghëgha amiisho, akarighi ahaghiro hayo gho kurë. 5 Akabhabhoorera abhatamishi bhaache akabhugha, “Musaaghe hano na atikere ino. Eni no omoona waane, tooghaye yiire, kubha torisëngërë Eryobha. Toramara, ntoghugharuka.”
6 Niho Abhurahamu akiimoki chaaku chiire che ghwekeeri amaruusi, akamwitweki omoona waache Isaka. Iwe omwene akiimoki omororo ne eghighësö, ibho bhabhere bhakëëndërëra no orughëndö.
7 Hano bhaare mo‑nchëra bharaghe, Isaka akamobherekera ishe akabhugha, “Oo taata!”
Ishe woose aghiitabha akabhugha, “Oo omoona waane! Neghoghutëghëërëra.”
Isaka akabhoori, “Nerighi hano ntoonyi na chaaku no omororo, amare angʼöndu e koruusi amaruusi gha ghosireekereri hayi enyi?”
8 Abhurahamu akamugharokeri akabhugha, “Oo omoona waane! Eryobha eryene niryo rekwibhönëra angʼöndu e koruusi amaruusi gha ghosireekereri.” Mbe, ibho bhabhere, bhakëëndërëra no orughëndö roobho.
9 Hano bhahikiri ahaghiro hano Eryobha reere remwërëkëriiri, Abhurahamu akaabhëka ahaghiro ha koruuseri amaruusi, aghatoora‑ho chaaku chiire ighoro. Hano amariri akamubhöha mwërëëti waache Isaka, akamuraari ighoro e chaaku chiire. 10 Aghaghöröröki okubhökö kooche akiimoki eghighësö, kubha amosinche mwërëëti waache.
11 Hayo niho oghwire riiraka ikoro re marayika o Mutëmi Waryobha reramobherekera koru Mwishaaro rerabhugha, “Oo Abhurahamu, Abhurahamu!”
Aghiitabha, “Hano neenyi neghoghutëghëërëra.”
12 Marayika uyo akabhugha, “Otasaki komunyahaara mwërëëti waacho, no otamukörëra ghyokyose! Ibheere ˆnekarighi kubha nokorisëngëra Eryobha, gho kubha toriimiri omoona waacho gho koreruuseri amaruusi, nangabha niwe omwene chiri.”
13 Abhurahamu aghaghëgha amiisho, akarighi anguruki,a chahëmbë cheeche ncheere chighöötiri mo‑ghisaka. Mbe, aghaköra bhwango akayirëëta anguruki iyo, akayeruusi amaruusi gha ghosireekereri, ekiimeerera eribhaara re moona waache.
14 Abhurahamu akaharoka ahaghiro hayo Yehoobha‑Yiire, ne egheteemoro keeche, “Omutëmi nakwibhönëra.” Nibhu abhaato bhahaabhugha mbagha reero, “Mo‑gheghoro ke Mutëmi Waryobha, nekubhönëka.”
15 Akamara marayika o Mutëmi Waryobha akamobherekera wiiki Abhurahamu ro kabhere koru Mwishaaro akabhugha, 16 “Omutëmi Waryobha nakobhugha, ‘Gho kubha tonyiimiri omoona waacho omwene chiri, ˆnekaraheri eni mwene kubha, 17 obhuhëënë, neghoghwitabheri. Wiiki orwibhoro roocho, nekorwengera chwee, ndookubha kinya chanchöta che Mwishaaro, na kinya omwishekeenya o mo‑nyancha. Orwibhoro roocho, ndokohicha emeghya ghe bhabhisa bhaabho. 18 Kohetera orwibhoro roocho, amatöngö ghoose gha chaase ngaghwitabheru gho kubha noghasookiri amangʼana ghaane.’”
19 Akamara Abhurahamu aghagharuka kwo bhatamishi bhaache, bhaghagharuka bhoose haghirohamu mbagha Bheeri‑Sheebha, na Abhurahamu akëëndërëra kumanya hayo.
Abhaana bha Nahoori
20 Amangʼana ghayo ghaache koheta, Abhurahamu akabhooreru kubha, “Miirika woose namwibhooriire ömöönyu Nahoori abhaana bha ghesubhe. 21 O mumbërë niwe Usi, na uno akomoosera niwe Bhuusi. Aghooseru wiiki na Kemuweeri ishe Araamu, 22 na Keseeti, na Haaso, na Bhiritaashi, na Yiturabhu na Bhetuweeri.” 23 Bhetuweeri naare ishe Rebheka. Miirika akamwibhorera Nahoori ömööbhö Abhurahamu abhaana bhayo bhanaane. 24 Rewuma uno are omurëëkari o Nahoori, woose akamwibhorera abhaana abhande, Tebha, na Ghahamu, na Tahashi, na Maaka.