Kwibhoru kwo Isaka
21
Niho Omutëmi Waryobha akahiita eriiraghano reeche gho Saara,a akamukörëra kinya are amobhooriire. 2 Mbe, Saara aghaghëgha anda, akamwibhorera Abhurahamu omoona o ghesiite mo‑bhugharuka bhooche, kwo riibhagha riyo riyo kinya Eryobha reere remobhooriire. 3 Abhurahamu akamoroka omoona uyo, Isaka.b4 Hano Isaka ꞉ahikiri chaasiko inyaanye, Abhurahamu akamusaara kinya Eryobha reere remuraghëriiri. 5 Abhurahamu naare ne emeeka eriighana rimu hano Isaka ibhwiru.
6 Saara nawe akabhugha, “Omutëmi nanköriire amasëkö, na wowoose uyo arooghu amangʼana ghano, naghusëka haghirohamu na neeni.” 7 Niho akëëngëra ghosiikëra arabhugha, “N‑niwe angamobhooriire Abhurahamu kubha eni Saara neghughööki omoona? Wiiki nemwibhooriire omoona o ghesubhe mo‑bhugharuka bhooche!”
Haaghiri na Ishimaeri ˆbhakahëëbhu
8 Isaka akëëndërëra ghokora, no orosiko runo atuusuru, Abhurahamu aghaköra anyangi inkoro. 9 Orosiko ruyo Saara akamorighi Ishimaeri uno ibhwiru na Abhurahamu kwo Haaghiri Omomiisiri aramuchëëra omoona waache.c 10 Niho Saara akamobhoorera Abhurahamu akabhugha, “Ibheere! Omuhëëbhë omukari omubhaghati uno haghirohamu no omoona waache, gho kubha omoona o mubhaghati uno taaghotora ghughabha haghirohamu no omoona waane Isaka.”
11 Amangʼana ghayo gha Saara ghakamunyahaara Abhurahamu chwee, gho kubha Ishimaeri woose m‑mwërëëti waache. 12 Niho Eryobha rekamobhoorera rekabhugha, “Oo Abhurahamu! Otabha na amacheeche ighoro e moona uno, no omubhaghati waacho. Ghyokyose kino Saara aghokobhoorera, ukörë, gho kubha gho kohetera Isaka nokubhöna orwibhoro runo rokobherekeru ro roocho. 13 Ighoro e moona o mubhaghati waacho, nekomuköra woose abhe taata o ritöngö, gho kubha woose m‑mwërëëti waacho.”
14 Mbe, atabhoori yaache moomake, Abhurahamu akiimoki ebhiinyakurë ne eghikö ke manche, akamusambeki Haaghiri akamuhëëbha haghirohamu no omoona waache. Bhaghaghööta anchëra na kwinaaranaara mo‑riibhara re Bheeri‑Sheebha.
15 Hano amanche ꞉ghaasiriri mo‑ghikö muyo, Haaghiri akamuraari omoona waache uyo haase mo‑ghisaka. 16 Iwe aghaye hano hakurëngʼaana obhurë bho kurëkëra omobhya aghiikara, aghiisiikërëra omwene arabhugha, “Eni, nteeghotora korighi kinya omoona waane aghoku.” Eriibhagha are ikeere hayo, aghasëëma korera kwo riiraka ikoro.
17 Eryobha rekamooghu omoona uyo ararera. Marayika o Ryobha uno are Mwishaaro akamobhoori akabhugha, “Haaghiri! N‑nyaako ke ino onyi nayo? Otatiina! Eryobha ndyoghwire eriiraka re moona koru haare are. 18 Imeerera! Ughëndë omobhooki omoona waacho, omughöötë okubhökö, gho kubha nekomuköra abhe ishe o ritöngö ikoro.”
19 Mbe, Eryobha rekamohunyura Haaghiri amiisho ghaache, akarighi eghesima ke manche. Niho akiimoki eghikö, aghaye aghataha amanche na komuha omoona waache.
20 Eryobha reekabha haghirohamu no omoona uyo, aghakora, akabha omobhureni. Omobhureni uyo aghaye kumanya mwibhara, nawe naare mosubhesubhe chwee o koruta obhuta. 21 Iwe naare amanyiri mwibhara re Bharaani, nyina akamokwiri omukari koru mo‑se e Miisiri.
Abhurahamu na Abhimereeki ˆbhaghitoorera eriiraghano
22 Eriibhagha riyo Abhimeereeki, haghirohamu na Bhikoori omokoro o bhaashirikare bhaache, bhakamutambana Abhurahamu, bhakamobhoorera bhakabhugha, “Eryobha ndeenyi haghirohamu na niiye gho gheghiro ghyokyose kino oghuköra. 23 Ibheere, undahereri kwo riina re Eryobha, kubha tokongʼiina eni, koru abhaana bhaane, haghirohamu no orwibhoro roone. Kinya eni neere muhëënë ghokoocho, iye woose nokwëndëru ubhe muhëënë ghokoone na gho se ino wikeere kinya omughëni.”
24 Abhurahamu akabhugha, “Ghayo, ˆnekaraheri.”
25 Kwo riibhagha riyo riyo, Abhurahamu naare aramwirerereri Abhimeereeki, ighoro e eghesima ke manche kino abhatamishi bha Abhimeereeki ꞉bhaamuhökiri. 26 Ibheere Abhimeereeki akamobhoorera akabhugha, “Eni temweche omooto uno ꞉aköriri hangʼu, iye tuumara omboorera ighoro e mooto uyo. Reero ino niho nekooghu amangʼana ghaache.”
27 Niho Abhurahamu akarëëta changʼömbë na changʼöndu, akamuha Abhimeereeki, bhaghaköra eriiraghano haghirohamu. 28 Abhurahamu akaahura chachooro mohungate. 29 Abhimeereeki akamobhoori Abhurahamu akabhugha, “Ngwake ˆokaahura chachooro mohungate echeene?”
30 Abhurahamu akamugharokeri akabhugha, “Wimoki chachooro mohungate koru mo‑mabhökö ghaane, ibhe ekyërëkërëri kubha n‑eni ꞉neetukiri eghesima kino.” 31 Niho akahabherekera ahaghiro hayo Bheeri‑Sheebha,d gho kubha niho bhaköriire eriiraghano.
32 Hano bhamariri ghotoora eriiraghano iyo Bheeri‑Sheebha, Abhimeereeki aghatanura haghirohamu na Bhikoori omokoro o bhaashirikare bhaache, bhaghagharuka mo‑se e Bhabhiriisiti.