Abhurahamu ˆakamongʼiina Abhimereeki
20
Niho Abhurahamu akaru Maamure, aghaghënda mbagha eribhaara re Neghebhu. Hano ahikiri iyo aghaköra obhwikari ghateghate e meghya ghe Kateeshi na Shuuri. Niho wiiki, aghaye ghwikara Gheraari gho chaasiko insuuhu. 2 Eriibhagha are hayo, akabhabhoorera abhaato kubha, mukaache Saara n‑ömööbhö. Niho omutëmi Abhimeereeki o Gheraari aghatoma abhaato bhaghi bhamurëëtë Saara. Hano ahikiri, akamwimoki kubha mukaache.3 Amare Eryobha rekamutambana Abhimeereeki obhotiko mo‑riröötö, na rekamobhoorera, “Oo Abhimeereeki, iye nooghoku, gho kubha omukari uno ughëghiri, m‑kari o mooto!”
4 Abhimeereeki naare akeere komisi na Saara, niho akabhugha, “Oo Omutëmi, noghwita abhaato bhano bhataanyi ne eriisari? 5 Abhurahamu omwene niwe ꞉abhughiri kubha, omukari uyo n‑ömööbhö! Wiiki na Saara omwene akabhugha Abhurahamu n‑ömööbhö! Rino niköriri, neriköriri gho körö inchömu, gho kubha eni niköriri netaanyi na bhobhe bhobhoose!”
6 Niho Eryobha rekamobhoorera mo‑riröötö riyo rekabhugha, “Mbe! Nimënyiri kubha nuköriri ghayo gho körö inchömu, nikyo ghighëriri eni neghakurëki otaköra amabhe, nteghwishereriiri omoturi. 7 Ibheere omugharoki omukari uyo kwo mosubhe waache. Abhurahamu m‑murööti, naghoghusabhëra ubhe muhöru. Naho oraanga komugharoki, umënyë obhuhëënë nooghoku haghirohamu na abhaato bhaacho bhoose.”
8 Atabhoori yaache moomake, Abhimeereeki akabhabherekera abhakangati bhoose bha mo‑bhutëmi bhooche. Hano bhiichiri akabhabhoorera ghoose ghano arooche mo‑riröötö reeche. Abhaato bhayo bhaghatiina chwee! 9 Niho Abhimeereeki akamobherekera Abhurahamu. Hano ichiri, Abhimeereeki akamobhoori akabhugha, “M‑mangʼana ke ghano otuköriire? Neke neghusareriiri, mbagha ˆoghankörëra amabhe ghano, haghirohamu na abhaato bha bhutëmi bhoone? Nunköriire amangʼana ghano ghataakwëndëru!” 10 Ibheere Abhimeereeki akabhoori Abhurahamu akabhugha, “Neke ghighëriri ukörë hangʼu?”
11 Abhurahamu akamugharokeri akabhugha, “Kino ghighëriri neghaköra hangʼu, ꞉niihëëbhiri kubha mo‑moghya uno, taanyi‑ho omooto omuhëënë uno akoresooka Eryobha. Neghatiina motaacha koonyita gho ghiri mughëghë omukari waane. 12 Haghirohamu na ghayo, kwo bhuhëënë n‑omwito, taata n‑umu, amare bhayiima nibho bhaghotwahukani, nikyo ghighëriri akabha mukari waane. 13 Hano Eryobha rembooriire kubha neru awiito, na ghuye ghwikara mo‑se e bhughëni, nekamusabha omukari waane kubha, ‘Ahaghiro hohoose hano tooghuye, abhughe kubha eni n‑ömööbhö neenyi. Gho ghuköra hangʼu niho okwërëki obhuhëënë bhoocho ghokoone.’”
14 Niho Abhimeereeki akamugharokeri Abhurahamu omukari waache Saara, akamuha changʼöndu, na changʼömbë, na abhatamishi bha ghesubhe na bha ghikari. 15 Wiiki Abhimeereeki akamobhoorera Abhurahamu akabhugha, “Ase ino yoose okorighi n‑eyaane. Mbe, waahure ahaghiro hohoose hano okwënda kumanya, umanye.”
16 Niho Abhimeereeki akamobhoorera Saara akabhugha, “Mööhi, nekamuha ömöönyu ebheteneka bhe riighori ikoro bhe chambiiri egheku kimu, gho kwërëki bhoose bhano ꞉bhaare haghirohamu na niiye kubha, tughöötë eriisari. Hayo n‑kwërëki kubha, teenyi‑ho ngʼana ambe ino niköriri ighoro yaacho.”
17 Akamara Abhurahamu akarisabha Eryobha, niho Eryobha rekamuhöri Abhimeereeki haghirohamu na mukaache, na abhabhaghati bhaache, bhatore kwibhora wiiki. 18 Hayo ekimbërë, Omutëmi Waryobha naare ahööchëriire chanda che nyumba e Abhimeereeki kubha bhatabhöna abhaana gho ghiri e Saara, muka Abhurahamu.