Ghosireekereru gho Sotoma na Ghomora
19
Eriibhagha re mughörööbha, bhamarayika bhabhere bhayo, bhakahika mo‑moghya o Sotoma. Rooti naare ikeere mo‑kehita ke moghya uyo. Hano abharooche, akabhooka aghaye kobhaturungʼanera, akiihiinya mbagha haase. 2 Akabhugha, “Abhatëmi bhaane, niho toonyi mo‑ka yaane, eni n‑omutamishi waanyu neenyi. Moghotora ghwishaabha amaghoro, na mubhe abhaghëni bhaane kwo bhotiko bho reero. Bhorake mokwëndërëra no orughëndö roonyu.”Ibho bhakamugharokeri bhakabhugha, “Tiyaanyi! Itu hano mo‑kibhara tokomisi.”
3 Rooti akabhahënërëra chwee! Antenero, bhaghiishereri. Bhakahutata, bhaghasöha awaache. Niho akabhakörëra obhughëni, akabhakarera emighaate ghino ghetahaghaasa, akabhaha, bhaakarë.
4 Hano bhaare bhakeere komisi, abhasubhe bhoose koru chambaara choose che moghya o Sotoma, abhabhureni na abhagharuka, bhakayinaareri aka e Rooti. 5 Bhakamobherekera, “Oo Rooti! Abhasubhe bhaare ꞉bhaare bhasöhiri awaacho hano, hayi bhaanyi? Nobhahoroki anche! Ntokwënda komisi nabho!”
6 Rooti akahoroka anche, aghiighara orwighe anyuma yaache. 7 Akabhabhoorera, “Bhahiiri bhaane, motighe tooghu! Abhaato bhano, motabhakörëra amabhe ghano! 8 Mumööhi! Neenyi na abhaakë bhabhere hano. Koru bhataamara bhamisi na abhasubhe. Muuhë omweya nebharuusi nebhahë, mobhakörërë kinya mokwënda. Amare abhasubhe bhano bhaanyi muno, motaköra ngʼana yoyoose ighoro yaabho, gho kubha ibho m‑bhaghëni bhaane.”
9 Abhasubhe bhayo bhakamugharokeri kwo riiraka ikoro bharabhugha, “Notorwere‑ho! Hano iye ꞉wiichiri hano m‑mughëni ore, ibheere ˆoghiiköri omoteni o kiina? Mbe, ibheere, ntoghoghuköra kebhe chwee ghokera kinya toore törëënda ghukörëra abhaghëni bhaacho bhayo!” Hayo hayo, bhakamotughuta Rooti, bhakëënda kobhuna orwighe.
10 Ibheere abhaghëni bhaare ꞉bhaare mo‑nyumba bhaghaghöröröki amabhökö ghaabho, bhakamusöhi Rooti mo‑nyumba, bhaghiighara orwighe gho changuru. 11 Niho bhamarayika bhayo bhakabhahukuri abhasubhe bhaare bhoose, abhakoro na abhasuuhu, koru bhataatoriri korighi eghisëku wiiki.
12 Abhaato bhaare bhabhere, bhakamobhoorera Rooti bhakabhugha, “Oo Rooti! Noonyi no omooto owonde hano? Hamwabhe noonyi na abhaana bha kebhureni hamu bha ghiike, hande abharwachi bha bhuku bha bhaakë bhaacho, hamu abhahiiri bhaacho, bhano bhamanyiri mo‑moghya uno? Obharuusi hano bhwango. 13 Köra hangʼu gho kubha, amasari gha bhaato bha mo‑moghya uno, ˆghakaheteereri ekirëngërë na komohikera Omutëmi Waryobha. Nikyo ꞉atotomiri, tuuche kowosireekereri.”
14 Rooti aghaye kwo bhaku bhaache bhano ꞉bhaare bhararwachera obhuku abhaakë bhaache. Niho akabhahatëka arabhugha, “Mukörë bhwango! Moru mo‑moghya uno, gho kubha Omutëmi Waryobha nakwënda kowosireekereri.” Amare abhaku bhaache bhayo, bhakamorighi kinya nakobhakaara.
15 Hano bhookiire atabhoori moomake, bhamarayika bhayo bhakamuhatëka Rooti bharabhugha, “Köra bhwango! Omwimoki mukaacho, na abhaakë bhaacho bhabhere, moru muno, motaacha ghosireekerera, hano omoghya uno okubha orasireekereru!”
16 Rooti akabha ariyonooni, amare Omutëmi Waryobha akamorigheri changori. Niho bhamarayika bhaare bhakamughööta Rooti na mukaache kwo mabhökö, haghirohamu na abhaakë bhaache bhabhere. Bhakabhahoroki anche e moghya. 17 Hano bhaabhahorokiri anche e moghya, marayika umu akabhabhoorera akabhugha, “Mungʼösë, mwitoori, amare, motamööhi anyuma! Koru motaacha kwimeerera mo‑möörö uno. Mungʼösërë mo‑bheghoro, motaacha ghosireekereru!”
18 Rooti akabhasasaama akabhugha, “Tiyaanyi, abhakoro bhaane! 19 Mööhi! Eni n‑omutamishi waanyu neenyi. Eni niishereriiru ambërë yaanyu, mbagha moghangwera bheghongi na moghantoori. Amare ebheghoro n‑kurë chwee bheenyi, nteeghotora kungʼösëra‑ho, Oo! Neghosireekerera nekeere mo‑nchëra, na neeghoku ntaamara kohika haare. 20 Mööhi! Haghuhe haare, noonyi‑ho omoghya mosuuhu, muuhë omweya ningʼösërë‑mu, niho, neghotooribhu.”
21 Umu o bhamarayika bhayo, akamugharokeri akabhugha, “Oo! ˆNeghiishererani na amasabhi ghaacho. Omoghya uyo obhughiri, ntekowosireekereri. 22 Angohi! Ungʼösërë‑mu. Nteeghuköra angʼana yoyoose kwo bhwango, mbagha nerighi kubha nohikiri‑mu.” Nikyo omoghya uyo, ˆokabherekeru Sowaari.a
23 Hano Rooti are ahikiri mo‑moghya o Sowaari, eryobha ndeere rimariri kurasa. 24 Niho Omutëmi Waryobha aghiiki omororo muhaari o kebhiriiti koru ighoro, oghaghwera mo‑meghya ghe Sotoma na Ghomora. 25 Aghasireekereri emeghya ghiyo, no ömöörö woose, na abhiikari bhoose, ne emimërö ghyose.
26 Hano Omutëmi are araghesireekereri, muka Rooti naare aramoru Rooti anyuma, aghiishoorori anyuma gho kwihiinyërëra. Aghiigharura akabha ambiro e moonyo.
27 Mbe, hano bhookiire moomake, Abhurahamu aghaye ahaghiro hano are imeeriire no Omutëmi Waryobha. 28 Hano ahikiri, akamööhi eribhaara re Sotoma na Ghomora, na mo‑möörö woose. Akarighi eryoki ndeere reraghunda, kinya eryoki re riinata ikoro.
29 Hano Eryobha reere rerasireekereri emeghya ghe mo‑möörö, ꞉ndehiitiri amasabhi gha Abhurahamu. Gho ghayo, ꞉ndeemoruusiri Rooti koru mo‑nyaako inkoro ino ebhwine emeghya ghiire Rooti are amanyiri‑mu.
Obhwikari bho Rooti na abhaakë bhaache bhabhere
30 Rooti na abhaakë bhaache bhabhere bhaghatiira koru Sowaari bhaaghaye bhakamanya mo‑koobho a‑gheghoro, gho kubha ꞉naatiiniri ghwikara Sowaari.
31 Orosiko rumu, omuukë waache omokoro akamobhoorera omonyi waache akabhugha, “Taata namariri ghokunguha. Hano twichiri ghwikara, taanyi‑ho omosubhe o ghotokwira, kinya asughara enyi ahaghiro hoose. 32 Mbe, tomonyiishi taata adivaayi, mbagha areewu totore komisi nawe, hayo niho tokubhöna abhaana, na orwibhoro rwito rotore ghusancha.”
33 Ibheere obhotiko bhuyo bhuyo, bhakamonyiishi ishe adivaayi mbagha akareewu, omuukë waache omokoro akamisi nawe. Amare ishe taamanyiri eriibhagha rino muuke waache amisiri nawe, ne eriibhagha aruure‑mu.
34 Atabhoori yaache hano bhookiire, omuukë uyo omokoro akamobhoorera omonyi waache akabhugha, “Mööhi! Icho obhotiko, ꞉neemisiri na taata. Ibheere! Reero tomonyiishi wiiki, kubha iye woose oghi omisi nawe. Niho itu bhoose tokubhöna abhaana, na orwibhoro rwito ndokwëndërëra.”
35 Mbe, obhotiko bhuyo bhuyo, bhakamonyiishi ishe mbagha akareewu, niho omuukë omonyi woose aghaye komisi ni ishe. Amare, ishe taamënyiri eriibhagha rino omuukë waache omonyi ichiri akamisi nawe, koru eriibhagha rino aruure‑mu.
36 Gho ghayo, abhaakë bhayo bha Rooti bhombe bhabhere bhakabhöna chanda koru ghwi ishe waabho. 37 Omuukë omokoro aghitoora omoona o ghesiite, akamoroka Mowaabhu. Uyo niwe ishe o Bhamowaabhu bha reero. 38 Omuukë waache omonyi, woose aghitoora omoona o ghesiite, akamoroka Bhenaami. Uyo niwe ishe o Bhamooni bha reero.