Abhurahamu na Saara ˆbhakaraghu kubhöna omoona
18
Orosiko rumu omwishe mo‑omu omororo kayi, Abhurahamu naare ikeere mo‑ghisëku ke riibhuru reeche, niho Omutëmi Waryobha akamorwera haghuhe ne emete emekoro ghino ꞉bhaare bharasëngërëra iyo Maamure. 2 Hano Abhurahamu ꞉aghëghiri amiisho, akarighi abhaato bhatato bhiimeeriire kurë hasuuhu ambërë yaache. Hano abharooche akahoroka mwibhuru reeche, aghaye bhwango kobhaturungʼanera.Hano abhahikiire, akiihiinya mbagha haase. 3 Akabhugha, “Oo abhakoro bhaane! Eni n‑omutamishi waanyu neenyi! ˆNekabhasasaama, motaheteera mwange ghusöha awaane. 4 Muuche mokurëëtëru amanche gha ghwishaabha amaghoro, na moramara moweere mo‑kiriiri ke mote uno. 5 Mughanye, nebharëëtërë ebhiinyakurë, muraaghërë, mubhönë changuru che kwëndërëra no orughëndö roonyu, gho kubha mwichiri mo‑mutamishi waanyu.”
Nabho bhakamugharokeri bhakabhugha, “M‑bhoheene! Köra kinya obhughiri.”
6 Niho Abhurahamu aghagharuka bhwango mwibhuru, akamobhoorera mukaache akabhugha, “Oo Saara, angohi! Wimoki ebhirëngërë bhitato bhe bhotu obhomite, obhukande, ukare emighaate.”a
7 Akamara Abhurahamu akahoroka bhwango, aghaye mo‑changʼömbë cheeche, akaahura akaheeri kamu kanoru ghachömu, akamuha umutamishi waache umu, aghaghasincha bhwango bhwango na ghoghatërëka.
8 Hano amariri ghutërëka bhoheene, Abhurahamu akiimoki amaghuta ameero, na amabhëërë, haghirohamu na chaanyama chiire, akabharëëtëra abhaghëni bhayo ebhiinyakurë. Hano bhaare bhararaaghëra, Abhurahamu nawe akabha imeeriire haghuhe nabho mo‑mote uyo.b
9 Abhaghëni bhayo, bhakamobhoori Abhurahamu, “Oo Abhurahamu! Mukaacho Saara hayi anyi?”
Abhurahamu akabhagharokeri akabhugha, “Mwibhuru anyi.”
10 Umu o bhayo akabhugha, “Mahëënë, kwo riibhagha kinya rino, mo‑mooka uno okuucha neghugharuka, na mukaacho Saara naakubha no omoona o ghesiite.”
Kwo riibhagha riyo, Saara naare imeeriire anyuma e ghisëku ke riibhuru aratëghëërëra. 11 Abhurahamu na Saara, mbaare bhakunguhiri chwee. Nawe Saara, mo‑mangʼana gha bhakari naare atenekiire. 12 Niho Saara aghasëka, aghiisiikërëra mo‑motema waache, “Eni nekunguhiri chwee! No omosubhe waane woose nakunguhiri. Mbe, mo‑bhokungu bhoone bhuno neghotora ghuchömëru na kubhöna omoona?”
13 Niho Omutëmi Waryobha akamobhoori Abhurahamu akabhugha, “Iye! Ngwake Saara ˆaghasëka, gho kwibhoori arabhugha, ‘Mahëënë nekwibhora omoona kwo riibhagha rino re bhokungu bhoone bhuno?’ 14 Kana! Neenyi‑ho angʼana ino ekomutama Omutëmi Waryobha? Mbe, kwo riibhagha kinya rino, mo‑mooka uno okuucha neghugharuka, na Saara naakubha no omoona o ghesiite!”
15 Saara aghatiina aghasiikëra obhobhiihi akabhugha, “Oo, Omutëmi eni ntisëkiri!”
Amare Omutëmi akabhugha, “Nangabha okwanga, iye nuusëkiri.”
Abhurahamu ˆakabhasabhera abhiikari bha Sotoma
16 Hano bhamariri kuraaghëra bhakabhooka. Abhurahamu akabhahërëëkërëra, bhakahika ahaghiro hano bhaare bharatora korighi omoghya o Sotoma. 17 Niho Omutëmi Waryobha akiihëëbha, “Kana ibheere, nemobhise Abhurahamu angʼana ino nekwënda ghuköra? 18 Kwo bhuhëënë iwe naakubha taata o ritöngö ikoro. Wiiki gho kohetera ghokooche amatöngö gha chaase choose ngaghwitabheru. 19 Nemwahwire kubha iwe abhashaangʼi abhaana bhaache no orwibhoro rooche, rubhe roramutëghëërëra Omutëmi Waryobha, gho ghuköra amangʼana gha bhuhëënë. Gho ghuköra hangʼu na neeni nekomohikeraneri Abhurahamu eriiraghano reene.”
20 Hayo Omutëmi Waryobha akabhugha, “Nyoghwire eriirera ryaru ighoro e meghya ghe Sotoma na Ghomora. Amasari ghaabho ghaghaghasha chwee! 21 Mbe, ibheere, neghwikera‑ho, niirigheri ghano bhaköriri aribha gharëngʼiine ne eriirera rino rehikiire. Aribha taanyi hangʼu nekumënya.”
22 Mbe, abhaato abhande bhabhere bhaghaghööta anchëra e kwërëkëra Sotoma. Amare Omutëmi Waryobha aghasaagha imeerera haghirohamu na Abhurahamu. 23 Niho Abhurahamu akamwishukerera Omutëmi Waryobha, akamobhoori, “M‑mahëënë kubha, abhaato abhahëënë na bhano bhataanyi abhahëënë, nokobhasireekereri haghirohamu? 24 Tobhughe kubha mo‑moghya mbangabhönëkiri abhaato abhahëënë miröngö etaano. Kwo ghiri yaabho, toghotora kowoghwera bheghongi omoghya woose, koru otawosireekereri? 25 Tiyaanyi! Tokwëndëru ghwita bhano bhiimeeriire mo‑bhuhëënë, haghirohamu na bhano bhataanyi abhahëënë. Tekurëngʼaanera bhano bhiimeeriire mo‑bhuhëënë, bhateneru ekiina kinya abhabhe. Omoteni o kiina o se, naghotena ekiina kwo bhuhëënë!”
26 Omutëmi Waryobha akamugharokeri akabhugha, “Mo‑moghya o Sotoma, erabha nerabhöna‑mu abhaato miröngö etaano bhano bhiimeeriire mo‑bhuhëënë, nekowoghwera bheghongi omoghya woose gho ghiri yaabho!”
27 Abhurahamu akabhugha, “Nangabha nebhwine obhotoro bho ghosiikëra no Omutëmi Waryobha, amare eni n‑orotu ne eriibhu neenyi. 28 Oo Omutëmi! Aribha bharabhönëka‑ho abhahëënë abhaato miröngö ene na bhataano, noghosireekereri omoghya uyo woose gho ghosuuha abhaato bhataano bhano bhiimeeriire mo‑bhuhëënë?”
Omutëmi Waryobha akamugharokeri akabhugha, “Tiyaanyi! Nerabhöna‑mu abhaato miröngö ene na bhataano bhano bhiimeeriire mo‑bhuhëënë, ntekowosireekereri.”
29 Abhurahamu akëëngëra kobhugha wiiki, “Aribha bharabhönëka‑mu abhaato miröngö ene?”
Omutëmi Waryobha akamugharokeri akabhugha, “Ighoro e bhaato bhayo miröngö ene abhahëënë, ntekowosireekereri.”
30 Abhurahamu akamusasaama akabhugha, “Oo Omutëmi waane, otakarara! Neghoghusabha onyisherereri wiiki. Hamwabhe bharabhönëka‑mu abhaato miröngö etato abhahëënë?”
Omutëmi akamugharokeri akabhugha, “Mo‑moghya uyo, aribha bharabhönëka abhaato miröngö etato abhahëënë, ntekowosireekereri.”
31 Abhurahamu akabhugha, “Nisakiri ghosiikëra no Omutëmi, naho bharabhönëka abhaato abhahëënë miröngö ebhere?”
Omutëmi Waryobha akamugharokeri akabhugha, “Mo‑moghya uyo, aribha bharabhönëka abhaato miröngö ebhere abhahëënë, ntekowosireekereri.”
32 Antenero, Abhurahamu akabhugha, “Oo Omutëmi, ˆneghaghusasaama chwee, neghusabha nesiikërë rimu hangʼu. Nibhu ekubha aribha bharabhönëka abhaato ikomi abhahëënë?”