Eryobha ˆrekamuha Abhuramu ekyërëkërëri ke riiraghano
17
Hano Abhuramu ꞉ahikiri emeeka miröngö kende na kende, Omutëmi Waryobha akamorwera akamobhoorera akabhugha, “Eni n‑Eryobha re Bhotoro Bhoose. Weeghe ameeghi ghaane, na wëndërërë kubha muhëënë ambërë yaane. 2 Eni nekorehikeerani eriiraghano ghate yaane na niiye, no orwibhoro roocho nekorwengera chwee.”3 Hayo Abhuramu akabhuna ebheru akahiinya obhosho mbagha haase gho komusëngëra. Niho Eryobha rekamobhoorera rekabhugha, 4 “Rino niryo eriiraghano reene na niiye, nookubha ishe o matöngö maaru. 5 Korwera reero tokobherekeru wiiki Abhuramu,a amare nookubha orabherekeru Abhurahamu,b gho kubha, neghuköriri kubha ishe o matöngö maaru. 6 Neghoghuköra ubhe no orwibhoro rwaru chwee, na mo‑rwibhoro roocho ngakubhönëka amatöngö, na abhatëmi mbaakubha‑mu.
7 “Eni Eryobha nekoriköra eriiraghano ghate yaane na niiye ribhe re miishe ghyose, orwibhoro kwo rwibhoro. Neekubha hangʼu hangʼu ghate yaane no orwibhoro roocho. Wiiki eriibhagha ryose neekubha Eryobha reecho ne Eryobha re rwibhoro runo rokuucha anyuma yaacho. 8 Neghokuha iye no orwibhoro roocho ase yoose e Kanaani ino umanyiri ibheere kinya omughëni, ibhe eyaanyu emiishe ghyose. Wiiki eni neekubha Eryobha reebho.”
9 Niho wiiki, Eryobha rekamobhoorera Abhurahamu rekabhugha, “Iye ughöötë eriiraghano reene, iye no orwibhoro roocho na chanyiibhoro cheecho choose. 10 Rino niryo eriiraghano rino mokwëndëru morighöötë iye na chanyiibhoro cheecho, omooto woose o ghesubhe uno anyi ghate yaanyu asaaru. 11 Mubhe morasaaru, na kiyo ngeekubha ekyërëkërëri ghe kohikeerani eriiraghano rino ghate yaane eni na niinyu. 12 Mo‑rwibhoro roocho roose omoona woose o ghesubhe ghate yaanyu ariibhoru, arahiki chaasiko inyaanye momusaare. Ino teenyi mo‑rwibhoro roocho orwene, amare nekwëndëru mubhe morasaara omoona woose o bhatamishi, bhano bhaghoruru hande bhano ꞉bhiibhwiru mo‑chanyumba cheenyu. 13 Omoona woose o ghesubhe, uno ibhwiru mo‑ka yaacho hamu uno aghoruru gho chambiiri cheecho, nakwëndëru asaaru. Kiyo n‑ekingʼöchö ke riiraghano reene mo‑mebhere gheenyu, kohikeerani eriiraghano re miishe ghyose. 14 Omosubhe woose uno atasaaruru, nakwahöru koru mo‑bhaato bhaache, wiiki naakubha asariri eriiraghano reene.”
Abhurahamu ˆakaraghu kubhöna omoona o ghesubhe
15 Omutëmi akamobhoorera wiiki Abhurahamu akabhugha, “Korwera reero, mukaacho Saraayi otamobherekera wiiki Saraayi. Eriina reeche ndeekubha Saara.c 16 Eni nekomwitabheri, akwibhorere omoona o ghesiite! Hëënë nekomwitabheri Saara abhe nyina o matöngö. Na mo‑rwibhoro rooche ruyo abhatëmi mbakubhönëka‑mu.”
17 Niho Abhurahamu akabhuna ebheru akahiinya obhosho mbagha haase, aghasëka na ghwisiikërëra mo‑motema waache kubha, “Nibhu nguköra niibhore omoona ino neenyi ne emeeka eriighana rimu? Saara woose nibhu aghuköra abhönë omoona ino naanyi ne emeeka miröngö kende?”
18 Akamara Abhurahamu akarebhoorera Eryobha akabhugha, “Neghoghusabha omotighe Ishimaeri woose abhönë orubhango ruyo.” 19 Eryobha rekamugharokeri rekabhugha, “Tiyaanyi! Amare mukaacho Saara naghokwibhorera omoona o ghesiite, eriina reeche omoroke Isaka. Neghuköra wiiki eriiraghano reene ghokooche na kwo rwibhoro rooche emiishe ghyose!
20 “Na kwo ribhaara re Ishimaeri, nimariri kooghu eriisabhi reecho ighoro yaache. Woose nekomwitabheri, nekomuköra abhe na abhaana bhaaru. Abhaana bhayo, nekobheengera chwee! Naakubha ishe o bhakangati ikomi na bhabhere,d nekomuköra naakubha sookoro o ritöngö inkoro chwee. 21 Amare eriiraghano reene riire, ndeekubha kwo Isakae omwene chiri. Na kwo riibhagha renga rino, omooka uno okuucha, Saara naghokwibhorera omoona.” 22 Hano eryobha ꞉riimariri ghosiikëra na Abhurahamu, rekamotigha.
23 Orosiko ruyo ruyo, Abhurahamu aghaye akamwimoki mwërëëti waache Ishimaeri, haghirohamu na abhatamishi bhoose bhano ꞉bhiibhwiru mo‑ka yaache, koru na bhano bhaghoruru. Bhayo bhoose, akabhasaara orosiko ruyo ruyo, kinya Eryobha ꞉reemobhooriire.